यिर्मयाह 26

यहोवारे भवने मां यिर्मयाह नेबेरो सन्देश

1योशिय्याहेरे मट्ठे यहूदा प्रदेशेरे राज़े यहोयाकीमेरे राज़ केरनेरे शुरुआती मां, यहोवा मीं सेइं ज़ोवं, 2“यहोवा इन ज़ोते: मेरे भवनेरे अंगने मां खड़े भोइतां, यहूदारे सेभी नगरां केरे लोकां केरे सामने ज़ैना यहोवारे भवने मां आराधना केरने एज्जन, इना वचन ज़ैन केरे बारे मां ज़ोनेरे लेई अवं तीं हुक्म देईं; तैन मरां कोई वचन न रख। 3भोइ सकते कि तैना ई सन्देश शुन्तां अपनि-अपनि बुरी चाली करां फिरन ते अवं तैन केरो नुकसान केरने करां पसतेईं ज़ै तैन केरे बुरे कम्मां केरि वजाई मीं सोचोरो थियो। 4यहोवा मीं सेइं ज़ोवं, एल्हेरेलेइ तू तैन सेइं ज़ो, ‘यहोवा इन ज़ोते: अगर तुस मेरी शुन्तां मेरे कानूनेरे मुताबिक ज़ै मीं तुसन शुनाव न च़लथ, 5ते न मेरे दास नेबी केरे वचन्न पुड़ ध्यान देथ, (ज़ैन अवं तुसन कां बार-बार भेज़तो एवरोईं, पन तुसेईं तैन केरि न शुनी), 6त अवं इस भवने शीलो नगरेरो ज़ेरो तबाह केरेलो, ते इस नगरेरो एरहो सत्यानाश केरेलो कि दुनियारे सारे कौमां केरे लोक तैसेरी मसाल देइतां लानत देले।’”

यिर्मयाह मारनेरी केरनेरी साज़िश

7ज़ैखन यिर्मयाह इना वचन यहोवारे भवने मां ज़ोई राहोरो थियो, तैखन याजक ते नबी ते सब आम लोक शुनी राहोरे थिये। 8ज़ैखन यिर्मयाह तैन सब किछ ज़ोईं छ़डू ज़ैन तैस सारे लोकन सेइं ज़ोनेरो हुक्म यहोवा दित्तोरो थियो, तैखन याजकेईं ते नेबेईं ते सब आम लोकेईं एन ज़ोइतां तै ट्लाव, “तीं पक्‍की मौतरी सज़ाह मैल्हेली! 9तीं किजो यहोवारे नंव्वे सेइं ई नबूवत की, ‘ऐह भवन शीलो नगरेरो ज़ेरो तबाह भोइ गालो, ते एन नगर एन्च़रे उज़ड़ेलू कि तैस मां कोई न रेई गालो?’” एत्रू ज़ोइतां सब आम लोकेईं यहोवारे भवने मां यिर्मयाह नेबेरे खलाफ अकोट्ठे भोए।

10यहूदा प्रदेशेरे हाकिम इन गल्‍लां शुन्तां, राज़ेरे मेहले मरां यहोवारे भवने मां च़ेढ़ी आहे ते तैसेरे नंव्वे फाटके मां बिश्शी जे। 11तैखन याजकेईं ते नेबेईं हाकिमन ते सब लोकन सेइं ज़ोवं, “एन मैन्हु मौतरी सज़ारे काबले, किजोकि एनी एस नगरेरे खलाफ एरी नबूवत कियोरीए ज़ै तुसेईं भी अपने कन्नेईं सेइं शुनोरीए।”

यिर्मयाह नेबेरो बचाव

12तैखन यिर्मयाह सब हाकिमन ते सब लोकन सेइं ज़ोवं, “ज़ैना वचन तुसेईं शुनोरेन, तैना यहोवा अवं एस भवने ते एस नगरेरे खलाफ नबूवतरे तरीके पुड़ ज़ोनेरे लेई भेज़ोरोईं। 13एल्हेरेलेइ हुनी अपनो चाल च़लन ते अपना कम्मां सुधरा, ते अपने परमेशर यहोवारी गल्‍लां मन्ना; तैखन यहोवा तैस आफतरे बारे मां पसतालो, ज़ेसेरी चर्चा तैनी तुसन सेइं कियोरीए। 14हेरा, अवं तुश्शे कब्ज़े मां आईं; ज़ैन किछ तुश्शी नज़री मां भलू ते ठीक भोए तैन्ने मीं सेइं केरा। 15पन ई गल पक्‍की समझ़ा, कि अगर तुस मीं मारेले, त अपने आपे ते इस नगरे ते इस मां रानेबाले लोकन बेकसूरेरे मारनेबाले बनाले; किजोकि सच़्च़े यहोवा अवं तुसन कां एना सब वचन शुनानेरे लेई भेज़ोरोईं।”

यिर्मयाह नबी आज़ाद केरनो

16तैखन हाकिमेईं ते सब लोकन ते याजकन ते नेबन सेइं ज़ोवं, “ई मैन्हु मौतरी सज़ारे काबल नईं किजोकि तैनी इश्शे परमेशर यहोवारे नंव्वे सेइं असन सेइं ज़ोवरूए।” 17तैखन मुल्खेरे किछ बुज़ुर्गेईं खड़े भोइतां लोकन सेइं ज़ोवं, 18“यहूदारे राज़े हिजकिय्याहेरे राज़ केरनेरे वक्ते मां मोरेशेत नगरेरे रानेबाले मीका नबूवत केरतो थियो, तैनी यहूदारे सारे लोकन सेइं ज़ोवं: ‘सेना केरो यहोवा एन ज़ोते कि सिय्योन घेड़तां ऊडार बनाव गालू ते यरूशलेम उज़ड़ी गालू, ते भवने बालू पहाड़ जंगलेरी ठार भोइ गाली।’ 19कुन यहूदारे राज़े हिजकिय्याहे या कोन्ची यहूदी मैन्हे तै कोस्कोई माराव? कुन तैनी राज़े यहोवारो डर न मन्नो ते तैस कां बिनती न की? तैखन यहोवा ज़ै आफत तैन पुड़ छ़डनेरे लेई ज़ोवरू थियूं, तैसेरे बारे मां तै न पसतालो? एन्च़रे केरतां अस अपने प्राणां केरो बड़ो नुकसान केरमेले।”

ऊरिय्याह नबी

20फिरी शमायाहेरू मट्ठू ऊरिय्याह किर्यत्यारीम नगरेरो रानेबालो यहोवारे नव्वें सेइं नबूवत केरतो थियो, तैनी भी इस नगरेरे ते इस मुल्खेरे खलाफ ठीक एरी ही नबूवत की ज़ेन्च़रे यिर्मयाह हुन्ना की। 21ज़ैखन यहोयाकीम राज़ो ते तैसेरे सब सिपाही ते सब हाकिमेईं तैसेरू वचन शुन्नू, तैखन राज़े तैस मारनेरी कोशिश की; ते ऊरिय्याह एन शुन्तां डेरतां मिस्र मुल्खे जो च़लो जेव। 22तैखन यहोयाकीम राज़े तैस ट्लानेरे लेई मिस्र जो लोक भेज़े यानी अकबोरेरू मट्ठू एलनातान ते किछ होरे मैन्हु तैस सेइं साथी भेज़े। 23तैनेईं ऊरिय्याह नबी मिस्र मुल्खे मरां केढतां यहोयाकीम राज़े कां आनो; ते तैनी तै तलवारी सेइं माराव ते तैसेरी लाश आम लोकां केरे कब्रन मां दब्बाई।

24पन शापानेरू मट्ठू अहीकाम यिर्मयाहेरी मद्दत केरने लगू ते तैनी तै लोकन मारने न दित्तो।