Bhadrawahi Bible
यशायाह 3
यहूदा ते यरूशलेमे पुड़ न्याय
शुना, प्रभु सेना केरो यहोवा यरूशलेम ते यहूदारो सहारो मतलब अन्नेरो सारो ज़िरियो, ते पैनेरो सारो ज़िरियो दूर केरेलो; ते बहादर ते जंग लड़नेबाले सिपाही, न्यायी ते नबी, एजने बाले वक्तेरे बारे मां ज़ोनेबाले ते बुज़ुर्ग ते 50 सिपाही केरे प्रधान ते इज़्ज़तदार मैन्हु, सलाहकार ते माहिर कारीगिर, ते हर किसमेरे जैदू टूने भी दूर केरेलो। यहोवा इन भी ज़ोते, अवं मट्ठन तैन पुड़ हाकिम बनेइलो, ते बच्चे तैन पुड़ राज़ केरेले। लोक एप्पु मांमेइं एक्की होरि पुड़, ते हर कोई अपने पड़ोसी पुड़ अंधेर केरेलो, ते जुवान बुज़ुर्ग मैन्हन सेइं ते नीच़ मैन्हु इज़्ज़तदार लोकन सेइं बुरो बर्ताव केरेले।
तैस वक्ते कोई मैन्हु अपने बाजी केरे घरे मां गेइतां अपने ढ्लाए ट्लेइतां ज़ोलो, “तीं कां त लिगड़े, एई इश्शो हाकिम बन, ते इस उज़ड़ोरे मुल्खे अपने कब्ज़े मां केर;” पन तै तैस दिहाड़े कसम केरतां ज़ोलो, “मीं कां एसेरो कोई आलाज़ नईं; किजोकि मेरे घरे मां न त खानेरे लेई रोट्टीए ते न लिगड़न; एल्हेरेलेइ तुस मीं लोकां केरो हाकिम न च़ुनी सकेले।” यरूशलेम नगर त हिल्ली जेव ते यहूदा प्रदेश त बिछ़ड़ी जेवं; किजोकि तैन लोकां केरि गल्लां ते तैन केरां कम्मां यहोवारे खलाफन, ज़ैना तैसेरी महिमा बैली एछ़्छ़ी केरे सामने बगावत केरनेबाले भेवरेन।
इड़ी तगर कि तैन केरू तुत्तर भी तैन केरे खलाफ गवाही देते; तैना सदोम नगरेरे लोकां केरे ज़ेरे अपने पापेरे बारे मां बियान केरतन ते छ़ुपान न। तैन पुड़ अफ़सोस! किजोकि तैनेईं अपनो नुकसान एप्पु कियोरोए। धर्मी लोकन सेइं ज़ोथ कि तैन केरू भलू भोल्हु, किजोकि तैन अपने भले कम्मां केरो फल मैल्हेलो। दुष्ट लोकन पुड़ अफ़सोस! तैन केरू बुरू भोल्हु, किजोकि तैन अपने बुरे कम्मां केरो फल मैल्हेलो। बच्चे मेरे लोकन पुड़ ज़ुलम केरतन, ते कौन्शां तैन पुड़ हुकूमत केरतिन। हे मेरे लोकव, तुश्शे अगुवे तुश्शे लोकन टपलातन, ते तुश्शे च़लनेरी बत बिसरातन।
ज़ुलमेरी निन्दा
यहोवा मुल्खे-मुल्खेरे लोकन सेइं मुकदमो लड़नेरे लेई ते तैन केरो न्याय केरनेरे लेई खड़ोए। यहोवा अपने लोकां केरे बुज़ुर्ग ते तैन केरे हाकिमन सेइं ई गलबात केरते, “तुसेईं बागरी दाछ़ खेवरीए, ते गरीबां केरू धन लुटतां अपने घरे मां रखोरूए।” सेना केरे प्रभु यहोवारू एन ज़ोनूए, “तुस किजो मेरे लोकन दलतथ, ते गरीब लोकन ढ्लेन्च़थ!”
सिय्योनेरी घमण्डी कौन्शां केरो न्याय
यहोवाए एन भी ज़ोवरूए, “किजो सिय्योनेरी कौन्शां1 घमण्ड केरतिन ते क्रोड़ी खड़ी केरतां एछ़्छ़ी मटकैतिन ते घुंघरू झ़नकैती ठुमुक-ठुमुक च़ेलतिन, एल्हेरेलेइ यहोवा प्रभु तैन केरो दोग गंजो केरेलो, ते तैन बेपरद करालो।”
तैस मौके प्रभु घुंघरू, जैली, चन्द्रहार, झुमके, कड़े, घुंघट, पेगड़ी, पैकरी, पटके, खुशबूदार चीज़ां, जंत्रां, एंवठी ते नथ्थां, रोड़ां लिगड़ां, कुरते, शाल ते बेटवे, शीशे ते मलमलेरां लिगड़ां, बुन्दी, दुपट्टे इन सेभी केरि शोभा दूर केरेलो।
खुशबूअरे बदले बुरी मुशक, ते कमरारे पटकेरे बदले रस्सी, ते गुतोरे दोग्गेरे बदले गंज ते कीमती लिगड़ां केरे बदले टाट ते खूबसूरतरे बदले तुत्तरे मां दाग भोल्हे। नगरेरे मड़द तलवारी सेइं नाश भोल्हे ते बहादर सिपाही जंगी मां मारे गाले। ते फाटकन मां ओशा छ़डनो ते मातम केरनो भोल्हो; ते तै नगरी तल्ले अकैल्ली बिशोरी विधवा कौन्शरी ज़ेरि भोल्ही।
Source notes (1)
- Footnote सिय्योनेरी कौन्शां यरूशलेमेरी कौन्शां
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.