Bhadrawahi Bible
होशे 7
ज़ैखन अवं इस्राएले चंगाई देताईं तैखन एप्रैमेरो अधर्म ते सामरियारी बुरैई बैंदी भोइ गैतिन; तैना झूठे सेइं कम केरतन, च़ोर अन्तर गातन, ते डैकू बेइर लुटतन। फिरी भी तैना न सोचन कि यहोवा इश्शी सैरी बुराई याद रखते। एल्हेरेलेइ हुनी तैना अपने कम्मां केरे जाले मां फेसी गाले, किजोकि तैन केरां बुरां कम्मां मेरी नज़री मां आन।
तैना राज़े बुराई केरने सेइं, ते अधिकैरन झूठ ज़ोने सेइं खुश केरतन। तैना सब व्यभिचारी आन; तैना तंदूरेरे ज़ेरेन ज़ैस पकाने बालो गर्म केरते, पन ज़ांतगर अट्टू सन्नू न गाए ते खमीर फुल्ले न, तांतगर तै अग्गी न भखाए। इश्शे राज़ेरी ज़र्म दिहैड़ी मां अधिकारी दाछ़रो रस पीतां मसत भोइ जे; तैनेईं अपनो मज़ाक बनानेबालन सेइं अपनो हथ मिलाव। ज़ांतगर तैना ताकी मां रहतन, तांतगर तैना अपनो मन तन्दूरेरो ज़ेरो तियार केरतन, तैन केरो पकाने बालो पूरे राती झ़ुलते; ते तै झ़ेझ़ां बेलति अग्गरो ज़ेरो लाल भोइ गाते। तैना सारे तंदूरेरे ज़ेरे भखते रहतन, ते अपने न्याय केरनेबालन भस्म केरतन। तैन केरे सब राज़े एक्केरे बाद अक मारे जेवरेन; ते तैन मरां कोई मीं कां बिनती न केरे।
यहोवा इन भी ज़ोते, एप्रैम1 मुल्खे-मुल्खेरे लोकन सेइं मिलोरो-जुलोरो रहते; एप्रैम एरी रोट्टरो ज़ेरोए, ज़ैस फेर नईं दित्तोरो। परदेशी लोकेईं तैसेरी ताकत खतम की, पन तै इस गल्ली न ज़ाने; तैसेरे दोग्गे पुड़ कोन्च-कोन्च छ़ित्ते बाल भी आन, पन तैस इस गल्लरो भी कोई पतो नईं। इस्राएलेरू घमण्ड तैसेरे खलाफ गवाही देते; पन एन सब गल्लां केरे हेरते भी तै अपने यहोवारे पासे न फिरे, ते न तैस तोप्पे।
एप्रैम एक्की नासमझ़ कबूतरेरो ज़ेरो भोइ जेव; तैना मद्दतरे लेई मिस्रे कां बिनती केरतन, ते अश्शूरे जो च़ले गातन। ज़ैखन तैना लोक च़ले गान, तैखन अवं अपनु ज़ाल तैन पुड़ फैलेइलो; अवं तैन एन्च़रे खिचेलो, ज़ेन्च़रे अम्बरेरां च़ुड़ोलू खिचां गातन; अवं तैन्न एरी सज़ाह देइलो, ज़ेन्च़रे तैन केरि मेण्डलां शुनोरूए। तैन पुड़ अफ़सोस, किजोकि तैना मीं करां भेटकी जेवरेन! तैन केरो सत्यानाश भोए, किजोकि तैनेईं मीं सेइं बगावत कियोरीए! अवं त तैन छुटातो राव, पन तैना मेरे खलाफ झूठ ज़ोते एवरेन।
तैना सच़्च़े दिले सेइं मीं कां बिनती न केरन, पन अपने बिछ़ाने पुड़ हाय, हाय केरतां बिनती केरते रहतन; तैना अन्न ते नंव्वे दाछ़रे रसेरे लेई अकोट्ठे त भोतन, ते मीं सेइं बगावत केरतन। अवं तैन शिक्षा देंतो राव ते तैन केरि पैखड़न मज़बूत केरतो एवरोईं, पन फिरी भी तैना मूरती पूज़ा केरते राए। तैना फिरने त फिरतन, पन परमप्रधान परमेशरेरे पासे नईं; तैना धोखो देनेबाले धनुषेरे ज़ेरेन; एल्हेरेलेइ तैन केरे हाकिम अपने क्रोधेरी गल्लां केरि वजाई सेइं तलवारी सेइं मारे गाले। एल्हेरेलेइ मिस्रे मां तैन केरो मज़ाक बनाव गालो।
Source notes (1)
- Footnote एप्रैम मतलब इस्राएली लोक।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.