Bhadrawahi Bible
होशे 13
इस्राएली लोकन पुड़ सखत न्याय
ज़ैखन एप्रैम ज़ोतो थियो, त तैखन लोक थरकते थिये; ते तै इस्राएले मां महान थियो। पन ज़ैखन तै बाल देबतेरी वजाई सेइं दोषी भोइ जेव, तैखन तै मेरि जेव। ते हुनी तैना लोक पापे पुड़ पाप केरते गातन, ते एपनी अक्ली सेइं चाँदी ढैलतां एरी मूरती बनातन ज़ै कारीगिरे बनेवरीए। तैन्ना केरे बारे मां लोक ज़ोतन, ज़ै बलिदान केरे तै बछ़ड़ां केरि मूरतन फुम्मड़ी दे!1 एल्हेरेलेइ तैना झ़ेझ़री बिदलार ते झ़ेझ़री जल्दी शुकने बाली ओश, ते खलाड़ी मां च़लनेबाले बात ते चिमनी मरां निसने बाले तूएरे ज़ेरे भोल्हे।
यहोवा ज़ोते, मिस्र मुल्खे करां अवं यहोवा, तेरो परमेशर आईं; तू मीं शैरतां कोन्ची होरी परमेशर न मेन्नां; किजोकि मेरे अलावा तेरो होरो कोई छुटानेबालो नईं। मीं तीं पुड़ तैस मौके मन लाव ज़ैखन तू सुनसान ठारी मां बल्के बड़े शुकोरे मुल्खे मां थियो। पन ज़ैखन तैन्न खुवाव गातू थियूं ते तैना रज़्ज़ते थिये, तैखन रज़्ज़ने पुड़ तैन केरो मन घमण्डे सेइं भेरोई जेव; एल्हेरेलेइ तैनेईं अवं बिसरो। एल्हेरेलेइ अवं तैन केरे लेई शेरेरो ज़ेरो बनोरो आईं; अवं चीतेरो ज़ेरो तैन केरि बत च़िकतां रेखेलो, अवं बच्चे थिसोड़ोरे ट्लियोगरो ज़ेरो तैन पुड़ हमलो केरेलो, ते तैन केरो कलैज़ो कढेलो, ते शेरेरो ज़ेरो तैन खेइलो, ज़ेन्च़रे जंगली जानबर हमलो केरते।
हे इस्राएल, तेरे नाश भोनेरी वजाई ईए, कि तू मेरो मतलब अपने मद्दत केरनेबालेरो बगावत केरने बालोस। हुनी तेरो राज़ो कोड़िए कि तेरे सारे नगरन मां तै तीं बच़ाए? ते तेरे न्यायी कोड़ि आन, ज़ैन केरे बारे मां तीं ज़ोवरू थियूं, “मेरे लेई राज़ो ते हाकिम ठहरा?” मीं क्रोधे मां एइतां तेरे लेई राज़े बनाए, ते क्रोधे मां एइतां तैना हटेइतां भी छ़डे। एप्रैमेरो अधर्म बेन्धतां रखोरोए, ते तैसेरे सारे पाप अकोट्ठे कियोरेन। तैस बच्चो ज़ानेरी ज़ेरि तकलीफ भोल्ही, पन तैन बेसमझ़ मट्ठूए ज़ैन ज़र्म घिन्ने मां च़िर लाते।
अवं तैस अधलोकेरे कब्ज़े मरां छुटालो। ते मौती करां तैस छुटेइलो। हे मौत, तेरे मारनेरी शक्ति कोड़ि राई? हे पाताल, तेरी नाश केरनेरी शक्ति कोड़ि राई? अवं फिरी न पसतालो।2
चाए तै अपने गोट्लेरे ढ्लान करां जादे फले-फुले, फिरी भी पूर्वेरी हवा तैस पुड़ च़लेली, यहोवारे तरफां सुनसान ठारारां तैस पुड़ एज्जेली, ते तैसेरू कुण्ड शुक्की गालू; ते तैसेरो पैनेरो नाग शुक्की गालो। ते तैसेरी रेखोरी सैरी मन पसंद चीज़ां तै लुट्टी गालो। सामरियारे लोक दोषी बनेले, किजोकि तैनेईं अपने परमेशरे सेइं बगावत कियोरीए; तैना तलवारी सेइं मारे गाले, तैन केरे बच्चे तल्ले मांजो शारे गाले, ते तैन केरि दोज़ींती कौन्शां च़ीरी गैली।
Source notes (2)
- Cross-reference निर्ग. 32;1 राज़. 12:28-29;2 राज़. 17:16.
- Cross-reference 1 कुरि. 15:55;प्रका. 6:8.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.