Bhadrawahi Bible
इब्रानियों 3
यीशु मूसा करां महाने
एल्हेरेलेइ हे विश्वासी ढ्लाव ते बेइनव, तुस परमेशरे सुर्गे मां तैस सेइं शामल भोनेरे लेई कुजेवरेथ। एल्हेरेलेइ प्रभु यीशुएरे बारे मां ध्यान देथ ज़ै इश्शे लेई परमेशरेरो बिस्तार आन्ने बालो दूत ते महायाजके ज़ेसेरो अस इकरार केरतम। यीशु परमेशरेरे लेई वफादार थियो, ज़ैनी तै ठहरावरो थियो, ज़ेन्च़रे मूसा भी परमेशरेरे लोकां केरि सेवाई मां वफादार थियो। किजोकि घर बनानेबालो घरे करां जादे इज़्ज़तरे काबल समझ़ो गाते, तेन्च़रे यीशु भी मूसा करां जादे इज़्ज़तरे काबल समझ़ो जेव। किजोकि हर घरेरो कोई न कोई बनानेबालो ज़रूर भोते, पन ज़ैनी सब किछ बनावं तै परमेशरे। मूसा त परमेशरेरो सेवक भोने सेइं परमेशरेरे घरेरे लोकन मां वफादार राव। ताके तैना गल्लां केरि बटे, ज़ैना परमेशर एजने बाले वक्ते मां ज़ोने बालो थियो। पन मसीह मट्ठू भोनेरे वजाई सेइं परमेशरेरे लोकां केरू मुखतियारे, ते असां तैसेरे लोकम, शर्त एने कि असां तैस दिलेरी ते उमीदी मज़बूत रखम, ज़ैस पुड़ असां भरोसो केरतम।
विश्वासेरे लेई हदैइत
बस्सा पवित्र आत्मा ज़ोते,
“अगर अज़ तुस परमेशरेरी आवाज़ शुनथ।
त अपने दादे पड़दादां केरे ज़ेरे तैसेरो हुक्म मन्ने करां इन्कार न केरथ,
ज़ैखन तैनेईं परमेशरेरे खलाफ खलाफत की,
ते ज़ेन्च़रे तैस दिहाड़े तुश्शे दादे पड़दादेईं ज़ेइस तैना सुनसान ठैरी मां थिये, तैनेईं परमेशरेरी अज़मैइश की।
तैड़ी तुश्शे दादे-पड़दादे 40 सालन तगर मेरां महान कम्मां हेरनेरे बाद भी,
अवं चनोती देइतां अज़मव।
एल्हेरेलेइ अवं तैस वक्तेरे लोकन पुड़ क्रोधे भोव,
ते मीं ज़ोवं, तैना हमेशा मेरो इन्कार केरतन,
ते ज़ैन केरनेरो मीं हुक्म दित्तोरोए तैन केरने करां इन्कार केरतन।
एल्हेरेलेइ मीं एपनी सरकी मां कसम खाइ,
कि तैना तैस ठैरी कधे दाखल न भोल्हे ज़ैड़ी अवं तैन आराम देथो।”
हे ढ्लाव ते बेइनव खबरदार राथ, तुसन मरां केन्चेरो दिल एत्रो बुरो ते बेइमान न भोए, कि ज़ै तैस ज़ींते परमेशरे करां दूर केरे। पन ज़ांतगर तै दिहाड़ी ज़ैस जो अज़ ज़ोतन, रोज़ एक्की होरि हिम्मत देते राथ, एरू न भोए कि तुसन मरां कोई पापेरे धोखे मां एइतां परमेशरेरे लेई सखत दिल न भोइ गाए। किजोकि अगर असां अपने पेइले विश्वासे पुड़ अपने मौती तगर लगातार मज़बूत रहतम, त अस अकोट्ठू कम केरने मां मसीह सेइं साथी ज़ुड़तम।
ज़ेन्च़रे पवित्रशास्त्रे मां लिखेरूए,
“अगर अज़ तुस तैसेरी आवाज़ शुनथ त तुस
अपने दिले सखत न केरा, त अपने दादे पड़दादां केरे ज़ेरे तैसेरो हुक्म मन्ने करां इन्कार न केरथ,
ज़ैखन तैनेईं परमेशरेरे खलाफ खलाफत की।”
तैना लोक कौन थिये, ज़ैनेईं परमेशरेरी आवाज़ शुन्तां भी तैसेरे खलाफ खलाफत की? तैना सब लोक तैना थिये ज़ैना मूसेरे ज़िरिये मिस्र मुल्खे मरां निसोरे थिये। तैना कौन लोक थिये, ज़ैन सेइं परमेशर 40 सालन तगर क्रोधे राव? तैना लोक तैना थिये, ज़ैनेईं पाप कियो ते मेरतां तैन केरि लाशां सुनसान ठैरी मां रेइ जेई। ज़ैखन परमेशरे क्रोधे मां कसम खाइ, कि तैना तैस ठैरी कधे दाखल न भोल्हे ज़ैड़ी अवं तैन आराम देथो, हकीक्ति मां तै तैन केरे बारे मां ज़ोतो थियो ज़ैनेईं हुक्म न थियो मन्नोरो। बस्सा, असन हुनी पतो लगो, कि तैना विश्वास न केरनेरी वजाई सेइं तैड़ी दाखल न भोइ सके।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.