Bhadrawahi Bible
इब्रानियों 10
सिद्ध बलिदान
मूसेरो कानून एजने बैली रोड़ी चीज़ां केरो सिर्फ अक सैयोए, न कि असली रूपे। एल्हेरेलेइ एक्की किसमेरां बलिदानां ज़ैना हर साल च़ाढ़ां गातन, तैना परमेशरे कां एजनेबालन कधे भी सिद्ध न केरि सखन। अगर केरि सखेथां, त कुन तैन केरू च़ाढ़नू बंद न भोथू? एल्हेरेलेइ अगर आराधना केरनेबाले एक्की बारे हमेशारे लेई पवित्र भोइ गाथे, त तैन केरो ज़मीर तैन पापी न बनाथो। पन तैना बलिदानां तैन लोकन हर साल याद करातन कि तैना पापिन। किजोकि मुमकिन नईं, कि दांतां केरो ते थाव्वां केरो खून पापे दूर केरि सके।
एल्हेरेलेइ ज़ैखन मसीह दुनियाई मां एवरो थियो, त तैनी परमेशरे सेइं ज़ोवरू थियूं,
“तीं बलिदान ते च़ढ़तल न चाई,
बल्के तीं मेरे लेई अक जान तियार की।
तू न भस्म भोनेबाले बलिदाने सेइं, ते न पापेरे बलिदाने सेइं खुश भोव।”
तैखन मसीहे ज़ोवं, “हे परमेशर, हेर, अवं तेरी इच्छा पूरी केरनेरे लेई एवरोईं,
ज़ेन्च़रे मेरे बारे मां पवित्रशास्त्रे मां लिखेरूए।”
पेइले त तै ज़ोते, न तीं कोई बलिदान ते न कोई च़ढ़तल चाई, ते न भस्म भोनेबालू बलिदान ते न पापेरू बलिदान चाव, ते न तैन सेइं तू खुशी भोव, हालांकी एना बलिदानां मूसेरे कानूनेरे मुताबिक दित्तां गातन। फिरी तै एन ज़ोते, “हेर, अवं तेरी मर्ज़ी पूरी केरनेरे लेई एवरोईं,” एन्च़रे तै पेइले सारे बलिदान्न हटाते ताके तैन केरे ठैरी मसीहेरे बलिदाने रख्खे। परमेशरेरी मर्ज़ी ई थी, कि यीशु मसीहेरे जिसम एक्की बार बलिदान भोने सेइं अस हमेशारे लेई पवित्र भोम।
पेइले करारेरे मुताबिक हर याजक बलिदान केरनेरे ठैरी खड़े भोइतां रोज़ सेवा केरतन, ते एक्की किसमेरां बलिदानां बार-बार च़ाढ़तन, ज़ैना पापे कधी भी दूर न केरि सखन। पन मसीह ज़ै इश्शो महायाजके, इश्शे पापां केरे लेई एक्की बार बलिदान भोइतां परमेशरेरे देइने पासे गेइतां बिश्शी जेव। तैड़ी तै तैस वक्तेरो इंतज़ार केरने लगोरोए, कि परमेशर तैसेरे दुश्मन पूरे तरीके सेइं हाराए। तैनी एक्की बलिदाने सेइं ज़ैना लोक पवित्र कियोरेन, तैना हमेशारे लेई सिद्ध कियोरेन।
पवित्र आत्मा भी एस गल्लरी गवाही देते। पेइलू त एन ज़ोते कि,
“प्रभु ज़ोते, कि ज़ै करार अवं
तैन दिहैड़ना बाद अपने लोकन सेइं केरेलो तै ईए,
अवं अपने कानून तैन केरे मन्न मां छ़डेलो
ते तैन केरे दिलन मां लिखेलो।”
ते फिरी एन भी ज़ोते कि, “अवं तैन केरे पाप ते बुरां कम्मां माफ़ केरेलो, ते फिरी कधी याद न केरेलो।”
बस्सा, ज़ैखन तैन केरे पापां केरि माफ़ी भोइजेइ, त फिरी पापां केरे लेई बलिदानेरी ज़रूरत नईं।
परमेशरेरे नेड़े गानू
एल्हेरेलेइ ढ्लाव ते बेइनव, असन यीशुएरे खूनेरे ज़िरिये सेइं मन्दरेरे परमपवित्र ठारी मां दाखल भोनेरी दिलेरी भोवरीए। यीशुए इश्शे लेई अक नव्वीं ते ज़िन्दगी देनेबाली बत खोलोरीए, ज़ै तैनी पड़दे मां यानी अपने जिसमे मां मौतरे ज़िरिये इश्शे लेई बनाई। ते एल्हेरेलेइ इश्शो एत्रो महान याजक ज़ै परमेशरेरे घरेरो मुखतियारे। त एज्जा अस सच़्च़े दिले सेइं ते पूरे विश्वासे सेइं, ते एरो ज़मीर ज़ै खूनेरे तेप्पेइं सेइं पापेरे एसासे करां पवित्र कियोरे, ते एरो जिसम नेइतां ज़ै साफ पैनी सेइं धोवरोए, परमेशरे कां नेम। ते अस एपनी उमीदरो इकरार रोड़ेच़ारे ट्लेइतां रखम, किजोकि ज़ैनी असन सेइं वाधो कियोरोए तै सच़्च़ोए। ते असेईं इस गल्लरू ध्यान लोड़े रखोरू कि अस केन्च़रे प्यार ते रोड़ां कम्मां केरे लेई एक्की होरेरी हिम्मत बधाम। ते एक्की ठैरी अकोट्ठू भोनू न शारम, ज़ेन्च़रे होरे लोक केरतन बल्के अस एक्की होरि हिम्मत देथ, तुस ज़ैस हिसाबे सेइं परमेशरे दुबारे एजनेरी दिहैड़ी नेड़ोंते लातथ तैस्से हिसाबे सेइं जादे एन गल्लन पुड़ च़लते भी राथ।
किजोकि अगर अस सच़ पिशानेरां बाद, ज़ैंनी बुझ़तां पाप केरम त पापां केरे लेई कोई बलिदान बाकी नईं राहोरू। हाँ, परमेशरेरे न्याय ते भयानक अग ज़ै परमेशरेरे दुश्मन्न भस्म केरेली तै बाकीए। ज़ैखन मूसेरे कानून न मन्नेबाले, दूई या ट्लाई मैन्हु केरे गवाही देने सेइं तैस मैन्हु बगैर दया केरतां मौतरी सज़ाह दित्ती गातीए। त तै मैन्हु केत्री सज़ाहरो लैईक भोल्हो, ज़ैनी परमेशरेरे मट्ठू पव्वन हैठ ढ्लेन्च़ू, ते करारेरो खून ज़ैस सेइं तै पवित्र ठहरावरो थियो, तै अपवित्र समझ़ो। ते पवित्र आत्मारी बेइज़्ज़ती की, ज़ेसेरे ज़िरिये असन अनुग्रह मैलते। किजोकि अस ज़ानतम, तैनी ज़ोवरू थियूं, “बदलो घिन्नो मेरू कम्मे, अवं एप्पू बदलो देइलो।” ते फिरी तैनी एन भी ज़ोवं, “प्रभु अपने लोकां केरो न्याय केरेलो।” ज़ींते परमेशरेरे हथ्थन मां गानू बड़ी खतरनाक गल्ले।
पन तैना पेइले दिहाड़े याद केरा, ज़ैखन तुसन मसीह पिशान्नेरी लौ मैल्ही, ते तैसेरे बाद तुसेईं बेड़ि मुशकलातां केरो मज़बूती सेइं मुकाबलो कियो। यानी कधे त तुस लोकां केरे तुहीन केरने सेइं ते मुसीबती सेइं तुस तमाशो बने, ते कधी तुसेईं होरे मुसीबत बरदाशत केरते लाहे ते तुसेईं तैन केरू साथ दित्तू। किजोकि तुसेईं कैदन सेइं हमदरदी की, ते अपनो माल भी लुटानो खुशी सेइं कबूल कियो। किजोकि तुस ज़ानते थिये कि अक बड़ी बड्डी खास मलकीत तुसन कांए ज़ै हमेशारे लेईए। एल्हेरेलेइ तुस हिम्मत न हरा, किजोकि तैसेरो फल बड़ो बड्डोए। तुसेईं बेड़ि सबरी सेइं कम कियेरू लोड़ते, ताके तुस परमेशरेरी मर्ज़ी पूरी केरतां तै चीज़ हासिल केरि सखथ ज़ेसेरो तैनी वाधो कियोरोए। किजोकि ज़ेन्च़रे पवित्रशास्त्रे मां लिखेरूए,
“हुनी थोड़ू च़िर बाकीए,
कि एजनेबालो एज्जेलो ते च़िर न लाहेलो।
पन मेरे धर्मी लोक मीं पुड़ विश्वासे रखने सेइं ज़ींते राले,
अगर तैना मीं पुड़ विश्वास केरने करां पत्रोवं हटन त मेरो दिल तैन पुड़ खुशी न भोल्हो।”
पन अस हटने बाले नईं, कि परमेशरे पुड़ विश्वास केरने करां पत्रोवं हटम ते नाश भोम, बल्के अस विश्वास केरनेबाले आम, ताके इश्शे प्राण बच़ाए गान।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.