Bhadrawahi Bible
उत्पत्ति 7
ज़िहाज़े मां दाखल भोनू
तैखन यहोवा नूहे सेइं ज़ोवं, “तू अपने सारे घराने सने ज़िहाज़े मां गा; किजोकि मीं इस वक्तेरे लोकन मरां सिर्फ तूए अपने नज़री मां धर्मी मैल्होरोस। सब किसमेरे शुच्चे जानबरन मरां तू सत-सत जोड़े, मतलब नर ते मादा एना: पन ज़ैना जानबर शुच्चे नईं, तैन मरां दूई-दूई एना, मतलब नर ते मादा। ते अम्बरेरां च़ुड़ोलन मरां भी, सत-सत जोड़े, मतलब नर ते मादा नेइयां, कि तैन केरि नसल बेच़तां सैरी धेरती पुड़ बनोरी राए। किजोकि हुनी सत दिहाड़े बीतनेरां पत्ती धेरती पुड़ 40 दिहाड़े ते 40 रात झ़ड़ी लग्गोरी राहेली; ते ज़ेत्रे प्राणी मीं बनेवरेन तैन सेब्भन धरती पुड़ेरां खतम केरेलो।” ज़ेन्च़रे यहोवा नूहे हुक्म दित्तोरो थियो तेन्च़रे तैने कियूं।
नूहेरी कुल उमर 600 साल थी, ज़ैखन पैनेरी हड़ाई धेरती पुड़ अई। नूह अपने मट्ठन, कौन्शी ते नुशन सने, पैनेरी हड़ैई करां बच़नेरे लेई ज़िहाज़े मां जेव। शुद्ध, ते अशुद्ध दूईये किसमां केरे जानबरन मरां, च़ुड़ोलू, ते धेरती पुड़ पेटेरे भारे च़लनेबालन मरां भी, दूई-दूई, मतलब नर ते मादा, ज़िहाज़े मां नूहे कां जेआं, ज़ेन्च़रे परमेशरे नूहे हुक्म दित्तोरो थियो। सत दिहाड़ना बाद हड़ाईयरु पानी धेरती पुड़ एजने लग्गू।
पैनेरी हड़ाई
ज़ैखन नूहेरे उमरारे 600 सालेरे दूइयोवं महीनेरे सितारहोवं दिहाड़ी अई; तैस्से दिहाड़े बड्डे डुग्घे समुन्दरेरे सब चशमे धेरती मरां निस्से ते अम्बरेरी दैरी खुल्ली जेई। ते झ़ड़ी 40 दिहाड़े ते 40 रातन लगातार धेरती पुड़ भोती राई। ठीक तैस्से दिहाड़े नूह अपने मट्ठन शेम, हाम, ते येपेत, ते अपनि कौन्शी, ते ट्लाईए नुशन सने, ते तैन सेइं साथी हर एक्की किसमेरे जंगली जानबर, ते हर एक्की किसमेरां सब पैलतू जानबर, ते हर एक्की किसमेरे सब धेरती पुड़ पेटेरे भारे च़लनेबाले, ते हर एक्की किसमेरां सब उडरने बालां च़ुड़ोलू, ज़िहाज़े मां जेआं। ज़ेत्रे प्रैणन मां ज़िन्दगरी सांस थी तैन सेब्भन मरां दूई-दूई नूहे कां ज़िहाज़े मां जे। ते ज़ैना जे, तैना परमेशरेरे हुक्मेरे मुताबिक सब किसमां केरे प्रैणन मरां नर ते मादा जे। तैखन यहोवा ज़िहाज़ेरू दार बन्द कियूं।
धेरती पुड़ 40 दिहाड़न तगर पैनेरी हड़ाई भोती राई; ते पानी बड़ू बद्धतू जेवं, ज़ैस सेइं ज़िहाज़ उबरे छ़ुइयोने लग्गू, ते तैन धेरती पुड़ां उबरू छ़ुइयोवं। पानी बद्धते-बद्धते धेरती पुड़ां बड़ू बेद्धी जेवं, ते ज़िहाज़ पैनी पुड़मेइं तेरतू राव। पानी धेरती पुड़ बड़ू जादे बेद्धी जेवं, इड़ी तगर कि सारे धेरती पुड़ ज़ेत्रां बड्डां-बड्डां पहाड़ां थियां, सब डुबी जेआं। पानी त 15 हथ उबरे बेद्धी जेवं, ते पहाड़ां भी डुबी जेआं। ते कुन च़ुड़ोलू, कुन पैलतू जानबर, कुन जंगली जानबर, ते धेरती पुड़ सब च़लनेबाले प्राणी, ते ज़ेत्रे जीप धेरती पुड़ बड़े भेरि जेवरे थिये, तैना सब, ते सब मैन्हु मेरि जे। ज़ैना-ज़ैना धेरती पुड़ थिये तैन मरां ज़ेत्रां केरे नक्के मां ज़िन्दगरी सांस थी, सब मेरि मिटी जे। ते सारे मैन्हु, सारे जानबर, सारे पेटेरे भारे च़लनेबाले जीप जन्तू, सारां अम्बरेरां च़ुड़ोलू, ज़ैना-ज़ैना धेरती पुड़ थिये, सब धेरती पुड़ेरां मेरि मिटी जेआं; सिर्फ नूह, ते ज़ेत्रे तैस साथी ज़िहाज़े मां थिये, तैना बेच़ी जे। ते पानी धेरती पुड़ 150 दिहाड़न तगर बनोरू रावं।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.