Bhadrawahi Bible
उत्पत्ति 42
याकूब अपने मट्ठन मिस्र मुल्खे जो भेज़ते
ज़ैखन याकूबे शुनू कि मिस्रे मां अन्ने, तैखन तैनी अपने मट्ठन सेइं ज़ोवं, “तुस एक्की होरेरू तुत्तर किजो लगोरेथ तकने।” फिरी तैनी ज़ोवं, “मीं शुनेरूए कि मिस्रे मां अन्ने; एल्हेरेलेइ तुस लोक तैड़ी गेइतां इश्शे लेई अन्न आनां, ज़ैस सेइं असां न मरम, बल्के ज़ींते रहमेले।” ते यूसुफेरे दश ढ्ला अन्न आन्नेरे लेई मिस्र मुल्खे मां जे। पन यूसुफेरो ढ्ला बिन्यामीन याकूबे एन सोचतां ढ्लान सेइं साथी न भेज़ो कि कोन्च एरू न भोए कि तैस पुड़ कोई आफत एज्जी गाए। एन्च़रां सेइं ज़ैना लोक अन्न आन्नेरे लेई एवरे थिये, तैन सेइं साथी इस्राएलेरां मट्ठां भी एवरां थियां; किजोकि कनान मुल्खे मां भी भारी काल पेवरो थियो।
यूसुफ त मिस्र मुल्खेरो अधिकारी थियो, ते तैस मुल्खेरे अन्न बेच़ने बाले लोकन पुड़ तै अधिकारी थियो, एल्हेरेलेइ ज़ैखन यूसुफेरे ढ्ला तैस कां आए, तैखन तैनेईं तुत्तरेरे भारे तल्ले झुकतां तैस कां मथ्थो टेको। यूसुफे तैना लेइतां तैना पिशैनी छ़डे, पन तैन केरे सामने अनज़ान बेनतां सेखती सेइं पुछ़ू, “तुस कोट्ठां एवरेथ?” तैनेईं ज़ोवं, “अस त कनान मुल्खेरां अन्न मुल्ले घिन्नेरे लेई एवरेम।” यूसुफे अपने ढ्ला पिशाने, पन तैनेईं तै न पिशानो। तैखन यूसुफ अपना तैना सुपना याद लगो केरने, ज़ैना तैनी तैन केरे बारे मां लाहोरां थियां, ते तैन सेइं ज़ोने लगो, “तुस जासूस आथ; तुस ऐह पतो केरने एवरेथ कि इस मुल्खेरी सरहद कोट्ठां ज़ेरे खालीए।” तैनेईं तैस सेइं ज़ोवं, “नईं, नईं, हे मालिक, तेरे नौकर खानेरी चीज़ां घिन्नेरे लेई एवरेम। अस सब एक्की बाजेरां मट्ठां अहम, असां सिद्धे सादे मैन्हु अहम, तेरे नौकर जासूस नईं।” तैनी तैन सेइं ज़ोवं, “नईं-नईं, तुस ऐह पतो केरने एवरेथ कि इस मुल्खेरी सरहद कोट्ठां ज़ेरे खालीए।” तैनेईं ज़ोवं, “असां तेरे नौकर 12 ढ्ला अहम, ते कनान मुल्खेरे राने बालेम एक्की मड़देरां मट्ठां अहम, ते निकड़ो ढ्ला अज़ इश्शे बाजीन कांए, ते अक मेरि जेवरोए।” तैखन यूसुफे तैन सेइं ज़ोवं, “मीं त तुसन सेइं ज़ोई छ़डू, कि तुस जासूसी केरने एवरेथ। ते तुस एस तरीके सेइं परखे गाले, फ़िरौनेरी कसम, ज़ांतगर तुश्शो निकड़ो ढ्ला इड़ी न एज्जे तांतगर तुस इट्ठां न गेइ बटेले। एल्हेरेलेइ, तुस अपने ढ्लान मरां एक्की भेज़ा कि तैस निकड़े ढ्लाए गेइतां आने, ते तुस तांतगर इड़ी कैद राले, ते तुश्शी गल्लां एस तरीके सेइं पेरखी गैली, कि तुसन मां सच़्च़ाई आहे या नईं, ते अगर सच़्च़े न निस्से त फ़िरौनेरी कसम, तुस सच़्च़े जासूस समझ़े गाले।” तैखन तैनी तैना ट्लाई दिहाड़न तगर कैदखाने मां रख्खे।
ट्लेइयोवं दिहाड़े यूसुफे तैन सेइं ज़ोवं, “किजोकि अवं परमेशरेरो डर मनताईं एल्हेरेलेइ अक कम केरा, तैखन ज़ींते राले। अगर तुस सिद्धे सादे मैन्हु आथ, त तुसन सब ढ्लान मरां अक मैन्हु इस कैदखाने मां कैद राए; ते तुस लोक अपने घरे बालां केरि ढ्लुख मिटानेरे लेई अन्न नेथ। ते अपने निकड़े ढ्लाए मीं कां आनां; एन्च़रां सेइं तुश्शी गल्लां सेच़्च़ी निसेली, ते तुस मारे न गाले।” तैखन तैनेईं तैन केरनेरे लेई मन्नू। तैना एप्पु मांमेइं ज़ोने लगे, “सच़्च़े असां अपने ढ्लाएरे बारे मां दोषी अहम, किजोकि ज़ैखन तैनी असन कां थरकते-थरकते बिनती कियोरी थी, तैखन भी असेईं एन हेरतां कि तैसेरी ज़िन्दगी हुन्ना केत्रे कष्टे मांए: तैसेरी अक गल न मन्नी: एस्से वजाई सेइं असां भी हुन्ना इस कष्टे मां पेवरेम।” रूबेने तैन सेइं ज़ोवं, “कुन मीं तुसन सेइं ज़ोवरू न थियूं, कि मट्ठेरे पापी न बना? पन तुसेईं न शुनू, हुनी तैसेरे खूनेरो बदलो घिन्नो गाते।” तैन एस गल्लरो पतो न थियो कि यूसुफ तैन केरि गल्लां सेमझ़ी राहोरोए, किजोकि यूसुफ तैन सेइं ज़ैना गल्लां केरतो थियो, तै होरि बोली मां गल्लां केरतो थियो, ते अक मैन्हु तैन केरि गल्लां केरो तरजमो केरतो थियो। तैखन तै तैन करां दूर गेइतां लेरां देने लगो; ते फिरी तैन कां वापस एइतां तैन सेइं गलबात केरने लगो, फिरी तैनी तैन मरां शिमोन नेइतां तैन केरे सामने कैदी बनाव।
याकूबेरां मट्ठां केरू कनाने जो वापस एजनू
तैखन यूसुफे हुक्म दित्तो, कि तैन केरे बोरे अन्ने सेइं भेरतां देथ, ते हर मैन्हेरे बोरे मां तैन केरे रुपेइये भी रेखी देथ, फिरी तैन केरे बत्तरे लेई खानेरी चीज़ां भी देथ, आखरकार तैन सेइं तैन्ने कियूं जेवं। तैखन तैना अपनु अन्न अपने गधन पुड़ लेद्दतां तैट्ठां च़ेलि जे। धर्मशाली मां ज़ैखन एक्के अपने गधे दानो देनेरे लेई अपनि बोरी खोल्ली, तैखन तैसेरे रुपेइये बोरी मां बह रखोरे लेइहोने लगे। तैखन तैनी अपने ढ्लान सेइं ज़ोवं, “मेरे रुपेइये त वापस भेज़ोरेन, हेरा, तैना त मेरी बोरी मां आन,” तैखन तैन केरि जानी मां जान न राई, ते तैना एक्की होरेरे पासे डेरतां तकने लगे, ते ज़ोने लगे, “परमेशरे इन असन सेइं कुन कियोरूए?”
तैखन तैना कनान मुल्खे मां अपने बाजी याकूबे कां आए, ते अपनो सारो हाल तैस सेइं एन्च़रां बियान कियो: “ज़ै मड़द तैस मुल्खेरो मालिके, तैनी असन सेइं बेड़ि सेखती सेइं गल्लां कियोरिन, ते असन जो मुल्खेरी जासूसी केरनेबाले ज़ोवं। तैखन असेईं तैस सेइं ज़ोवं, ‘अस सिद्धे सादे लोक अहम, जासूसी केरनेबाले नईं। असां 12 ढ्ला एक्की बाजी केरां मट्ठां अहम, अक त मेरि जेवरोए, पन निकड़ो ढ्ला कनान मुल्खे मां इश्शे बाजी कां आए।’ तैखन तैनी मड़दे, ज़ै तैस मुल्खेरो मालिके, तैनी असन सेइं ज़ोवरूए ‘कि इस गल्ली सेइं पतो लेग्गी गालो कि तुस सिद्धे सादे मैन्हु आथ; तुस अपने ढ्लान मरां एक्की ज़ेरे इड़ी छ़ेडतां अपने घरे बालां केरि ढ्लुख मिटानेरे लेई किछ अन्न नेथ। ते अपने निकड़े ढ्लाए मीं कां इड़ी साथी ऐनथ। तैखन मीं विश्वास भोइ गालो कि तुस जासूसी केरनेबाले नईं, बल्के सिद्धे सादे लोकथ। फिरी अवं तुश्शे ढ्लाए तुसन सौंफी देइलो, ते तुस इस मुल्खे मां लेन-देन केरि सकेले।’”
एन ज़ोइतां तैना अपने-अपने बोरन मरां अन्न कढने लगे, तैखन तैनेईं हेरू कि हर एक्केरी रुपेइयां केरि थेली तैसेरे बोरे मां बह रख्खोरीए। तैखन रुपेइयां केरि थेली लेइतां तैना ते तैन केरो बाजी बड़ो डेरि जेव। तैखन तैन केरे बाजी याकूबे तैन सेइं ज़ोवं, “तुसेईं त अवं बच्चन करां भी बेऔलाद केरि दित्तो, हेरा, यूसुफ भी न राव, ते शिमोन भी न अव, ते हुनी तुस बिन्यामीने भी नेने चातथ। हुनी एना सब मुसीबतां मेरे दोग्गे पुड़ एवरिन।” रूबेने अपने बाजी सेइं ज़ोवं, “अगर अवं तैस तीं कां न एन्हीं, त मेरां दूईये मट्ठां मैरी छ़ेडां; तू तैस मेरे हथ्थे मां सौंफी दे, अवं तैस फिरी तीं कां पुज़ेई देइलो।” पन याकूबे ज़ोवं, “मेरू मट्ठू तुसन सेइं साथी न एज्जेलू; किजोकि तैसेरो ढ्ला मेरि जेवरोए, ते तै हुनी अकैल्लो रेइ जेवरोए। एल्हेरेलेइ ज़ैस बत्तां तुस गाले, तैस मां अगर तैस पुड़ कोई मुसीबत अई त तुश्शे वजाई सेइं अवं इस बुढापेरी हालती मां शोग केरतो-केरतो पाताले मांजो च़लो गेइलो।”
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.