Bhadrawahi Bible
उत्पत्ति 41
फ़िरौनेरू सुपनु
दूई सालां केरे बाद फ़िरौने अक सुपनु लावं कि तै नील दरियारे बन्ने पुड़ खड़ोए। ते तैस दरियाए मरां सत रोड़ी ते निगर-निगर बेछ़ी निस्तां दरियारे बन्नेरो घास च़रने लेगि। तैसेरां बाद होरि सत बेछ़ी दरियाए मरां निस्सी, ज़ैना आशोबती ते लिस्सी थी; ते तैन होरि बेछ़ी दरियाए कां नेड़े गेइतां खेड़ि भोइ। तैखन तैना आशोबती ते लिस्सी बेछ़ेइं तैना सत रोड़ी ते निगर-निगर बेछ़ी खेइ छ़ेडी। तैखन फ़िरौन बींझ़ो। ते तै फिरी झ़ुल्ली जेव, ते तैनी अक होरू सुपनु लावं कि एक्की डाले मरां सत मोट्टां ते रोड़ां-रोड़ां शिल्लां निस्सां। ते फिरी तैन केरे पत्ती सत शिल्लां पतलां-पतलां ज़ैना पूर्वेरी हवाई सेइं शुकोरां थियां। ते तैन पतले शिलेइं तैना सत मोट्टां-मोट्टां शिल्लां निगली छ़डां। तैखन फ़िरौन बींझ़ो, ते तैनी बुझ़ू कि एन सुपनूएं। झ़ेझ़ां फ़िरौनेरो मन परेशान भोव; ते तैनी मिस्रेरे सब जोष्टी ते पंडत कुजाए; ते तैन सेइं अपनु सुपनु शुनावं; पन तैन मरां केन्चे भी तैसेरे सुपनेरो मतलब ज़ोई न बटो।
यूसुफेरे ज़िरिये फ़िरौनेरे सुपनां केरो मतलब ज़ोनो
तैखन दाछ़रो रस पियाने बालां केरे प्रधाने फ़िरौने सेइं ज़ोवं, “मीं अज़ अपने जुर्म याद आए: ज़ैखन फ़िरौन अपने नौकरन सेइं क्रोधे भोवरो थियो, ते तैनी अवं ते रोट्टी बनाने बालां केरो प्रधान मेहलेरे पहरेदारां केरे प्रधानेरे कैदखाने मां छ़डोरे थिये। तेइस असन दूईने एक्की राती अलग-अलग सुपनु अऊं, ते हर सुपनेरो मतलब भी अलग-अलग थियो। ते तैड़ी असन सेइं साथी अक इब्रानी जुवान थियो, ज़ै मेहलेरे पहरेदारां केरो प्रधानेरो नौकर थियो, आखर असेईं अपनु सुपनु तैस शुनावं, ते तैनी इश्शे दूईयां केरे सुपनेरो मतलब असन सेइं ज़ोव। ते ज़ेन्च़रे-ज़ेन्च़रे तैनी सुपनेरो मतलब असन सेइं ज़ोवरो थियो, तैन्ने भोवं, मतलब मीं त मेरो दर्जो फिरी मैल्हो, पन तैस फांसी दित्ती जेई।”
तैखन फ़िरौने यूसुफ कुजेइतां आनो, ते तै अकदम कैदखाने मरां बेइर आनो जेव, ते तैसेरे बाल बनावेइतां, ते लिगड़ां बेदलतां फ़िरौनेरे सामने आनो। फ़िरौने यूसुफे सेइं ज़ोवं, “मीं अक सुपनु लाहेरूए, ते तैसेरो मतलब ज़ोने बालो कोई भी नईं; ते मीं तेरे बारे मां शुनेरूए, कि तू सुपनु शुन्तां तैसेरो मतलब ज़ोई सकतस।” यूसुफे फ़िरौने सेइं ज़ोवं, “अवं त किछ न ज़ैनी: परमेशर फ़िरौनेरे लेई रोड़ी खबर देलो।” फिरी फ़िरौन यूसुफे सेइं ज़ोने लगो, “मीं अपने सुपने मां लावं, कि अवं नील दरियारे बन्ने पुड़ खड़ो आईं। फिरी, कुन हेरू, ते तैस दरियाए मरां सत रोड़ी ते निगर-निगर बेछ़ी निस्तां दरियारे बन्नेरो घास च़रने लेगि। फिरी कुन हेरू, कि सत आशोबती ते लिस्सी बेछ़ी निस्सी ज़ैना कि सारे मिस्र मुल्खे मां एत्री लिस्सी बेछ़ी मीं कधी नईं लेवरी। तैन आशोबती ते लिस्सी बेछ़ेइं तैना सत रोड़ी ते निगर-निगर बेछ़ी खेइ। ते ज़ैखन तैनेईं तैना खेइ तैखन ई पतो न थियो लगतो कि तैना तैनेईं खेइ, किजोकि तैना ज़ेरि पेइली थी तेरही रेइ। तैखन अवं बींझ़ो। फिरी मीं होरू सुपनु लावं, कि डाले पुड़ सत रोड़ां-रोड़ां ते अन्ने सेइं भेरतां शिल्लां निस्सां। फिरी कुन हेरताईं, कि तैन पत्ती सत शिल्लां पतलां-पतलां ते शुकोरां ज़ेरां निस्सां। ते तैन पतले शिलेइं तैना सत मोट्टां-मोट्टां शिल्लां निगली छ़डां। इन मीं जोष्टन सेइं शुनावं, पन तैसेरो समझ़ाने बालो कोई न मैल्हो।”
तैखन यूसुफे फ़िरौने सेइं ज़ोवं, “फ़िरौनेरू सुपनु अक्के, पन परमेशर ज़ैन कम केरनू चाते, तैनी तैन फ़िरौने पुड़ बांदू कियोरूए। तैना सत रोड़ी-रोड़ी बेछ़ी सत सालन; ते तैना सत रोड़ां-रोड़ां शिल्लां भी सत सालन; सुपनु अक्के। फिरी तैन पत्ती ज़ैना कमज़ोर ते लिस्सी बेछ़ी निस्सी, तैन पत्ती सत शिल्लां पतलां-पतलां ते शुकोरां ज़ेरां निस्सां। तैना कालेरे सत साल भोनेन। ई तैए गल्ले ज़ै मीं फ़िरौने सेइं ज़ोवरी थी, कि परमेशर ज़ैन कम केरनू चाते, तैन तैनी फ़िरौने हिरेवरूए। शुन, सारे मिस्र मुल्खे मां सत साल त बड़ी जादे फसल भोल्ही। तैसेरां बाद सत साल कालेरे भोल्हे, ते सारे मिस्र मुल्खे मां लोक इस सैरी फसली बिसरी गाले; ते काले सेइं मुल्ख बरबाद भोइ गालो। ते मुल्खेरी फसल याद न राहेली, किजोकि काल बड़ो जादे भोल्हो। ते फ़िरौने ज़ैन इन सुपनु दूई बार लाहेरूए एसेरो मतलब ई आहे कि ई गल परमेशरेरी तरफां ठहरावरीए, ते परमेशर एस गल्ली लूशी पूरी केरेलो। एल्हेरेलेइ हुनी फ़िरौन कोई समझ़दार ते अक्लमन्द मैन्हु तोपतां तैस मिस्र मुल्खेरो प्रधान मंत्री बनाए। फ़िरौन इन केरे कि मुल्खे पुड़ अधिकारी ठहराए, ते ज़ांतगर फसलरे सत साल रोड़ेन तांतगर तैना मिस्र मुल्खेरी फसलरो पंच़ोंव हिस्सो अकोट्ठो केरन। ते तैना इन रोड़े सत सालन मां हर किसमेरी चीज़ां अकोट्ठी केरन, ते नगर-नगर भण्डार घर रोट्टरे लेई, फ़िरौनेरे लेई अकोट्ठे केरतां तैसेरी रक्षा केरन। ते तैना खानेरी चीज़ां कालेरे तैन सत सालां केरे लेई, ज़ै मिस्र मुल्खे मां भोनोए, मुल्खेरी रोट्टरे लेई सुपुर्द की गान, ज़ैस काले सेइं मुल्खेरो सत्यानाश न भोए।”
यूसुफेरू प्रधान मंत्री बनवं गानू
ई गल फ़िरौन ते तैसेरे सारे नौकरन बड़ी रोड़ी लग्गी। एल्हेरेलेइ फ़िरौने अपने नौकरन सेइं ज़ोवं, “कुन असन एरहो मड़द, ज़ेरो ईए, ज़ैस मां परमेशरेरी आत्मा रहचे, मैल्ही सकते?” फिरी फ़िरौने यूसुफे सेइं ज़ोवं, “परमेशरे ज़ैन तीं एत्रू ज्ञान दित्तेरूए, कि तेरे बराबर कोई समझ़दार ते अक्लमन्द नईं; इस वजाई सेइं तू मेरे घरेरो अधिकारी भोल्हो, ते तेरे हुक्मेरे मुताबिक मेरी सारी आवाम च़लेली, सिर्फ तखते पुड़ बिशनेरे वजाई सेइं अवं तीं करां बड्डो भोल्हो।” फिरी फ़िरौने यूसुफे सेइं ज़ोवं, “शुन, अवं तीं सारे मिस्र मुल्खे पुड़ अधिकारी बनेइलो।” तैखन फ़िरौने अपने हथ्थेरां अपनि मोहरी बाली आंवठी केढतां यूसुफेरे हथ्थे लुवेई दित्ती; ते तैस बड़ां रोड़ां मलमलेरां लिगड़ां लुवां, ते तैसेरे गले मां सोन्नेरी माला लाई; ते तै अपने होरि रथे पुड़ बिशालो; ते लोक तैस अग्री-अग्री ई प्रचार केरते च़ले, कि ज़ैंधू केरे भारे झुका, ते तैनी तै सारे मिस्र मुल्खेरो प्रधान मंत्री बनाव। फिरी फ़िरौने यूसुफे सेइं ज़ोवं, “फ़िरौन त अवं आईं, पन सारे मिस्र मुल्खे मां कोई भी तेरे हुक्मेरे बगैर हथ पव न हिलालो।” फ़िरौने यूसुफेरू नवं सापनत-पानेह1 रख्खू, ते ओन नगरेरे याजक पोतीपेरारी कुई आसनती सेइं तैसेरो ड्लाह बनाव, ते यूसुफ सारे मिस्र मुल्खे मां दौरो केरने लगो।
ज़ैखन यूसुफ मिस्रेरे राज़े फ़िरौनेरे सामने सेवा केरने लगो, तैखन तै 30 सालां केरो थियो। तै फ़िरौनेरे सामनेरां निस्तां सारे मिस्र मुल्खे मां दौरो केरने लगो। फसलरे सत्ते सालन मां धरती बड़ी भारी अन्नेरी पैदावार देंती राई। ते यूसुफ तैन सते सालन मां हर किसमेरी खानेरी चीज़ां, ज़ैना मिस्र मुल्खे मां भोती थी, अकोट्ठी केरतां नगरन मां रखतो जेव, ते हर एक्की नगरेरे च़ेवरे पासां केरे ऊडारां केरि खानेरी चीज़ां तैस्से नगरे मां अकोट्ठी केरतो जेव। एन्च़रां यूसुफे अन्न अकोट्ठू केरतां समुन्दरेरी रेतरू ज़ेरू बड़ू जादे अकोट्ठो केरतां रखतो जेव, इड़ी तगर कि तैनी तैसेरू गन्नू भी शारू; किजोकि तैन बेहिसाब थियूं।
कालेरे पेइले साले मां ओन नगरेरे याजक पोतीपेरारी कुइये आसनती यूसुफेरां दूई मट्ठा भोआं। ते यूसुफे अपने बड्डे मट्ठेरू नवं इन ज़ोइतां मनश्शे2 रख्खू, कि “परमेशरे मेरो सारो क्लेश, ते मीं अपने बाजी केरो सारो घरानो बिसरावरोए। दूइयोंवेरू नवं तैनी इन ज़ोइतां एप्रैम3 रख्खू, कि दुख भोगनेरे मुल्खे मां परमेशरे अवं फलवन्त कियोरोईं।”
ते मिस्र मुल्खे मां फसलरे भरपूर सत साल पूरे भोइ जे। ते यूसुफेरे ज़ोनेरे मुताबिक सत साल कालेरे शुरू भोइ जे। सैरी मुल्खे मां काल पेनो शुरू भोइ जेव। पन सारे मिस्र मुल्खे मां अन्न थियूं। ज़ैखन मिस्रेरो सारो मुल्ख ढ्लुखी सेइं मरने लगो; तैखन आवाम फ़िरौने करां चिन्डां मैरतां रोट्टी मगने लगी; ते तै सब मिस्री लोकन सेइं ज़ोतो रहतो थियो, “यूसुफे कां गाथ; ते ज़ैन किछ तै तुसन सेइं ज़ोए, तैन्ने केरा।” एल्हेरेलेइ ज़ैखन काल सैरी धरती पुड़ फैली जेव, ते मिस्र मुल्खे मां काल बड़ो जादे भोइ जेव, तैखन यूसुफे सब गुदाम खोल्ली-खोल्ली मिस्री लोकन जो अन्न बेच़ने लगो। एल्हेरेलेइ सैरी दुनियारे लोक मिस्रे मां अन्न घिन्नेरे लेई यूसुफे कां गाने लगे किजोकि सैरी धेरती पुड़ काल बड़ो जादे थियो।
Source notes (3)
- Footnote सापनत-पानेह इस मिस्री नंव्वेरो मतलबे “देबतो ज़ोते ते तै (ज़ै इस नंव्वे धारण केरते) ज़ीते”
- Footnote मनश्शे मतलब बिसरनेरी वजा।
- Footnote एप्रैम मतलब दूई बार फलवन्त बनेवरोइं।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.