Bhadrawahi Bible
उत्पत्ति 33
याकूबेरू एसावे सेइं मिलनू
ते याकूब तैट्ठां गाने लग्गो ते तैने हेरू, कि एसाव 400 मड़दन सेइं साथी एज्जी राहोरोए तैखन तैनी बच्चे अलग-अलग केरतां लिआ ते राहेल ते दूईये नौकरेनन सौंफी दित्ते। ते तैनी नौकरैनी तैस पत्ती मट्ठन समेत लिआ, ते तैन करां पत्पती राहेल ते यूसुफ रख्खो, ते एप्पु तैन करां अग्रोवं जेव, ते सत फेरेईं तल्ले मां झुकतां मथ्थो टेको ते अपने ढ्लाए कां पुज़्ज़ो। तैखन एसाव तैस सेइं मिलनेरे लेई दौड़ो, ते तैस सेइं दिले सेइं गले लेगतां फुम्मड़ी दित्ती फिरी तैना दूईये लेरां लगे देने। फिरी एसावे कौन्शां ते बच्चे लाहे; ते पुछ़ू, “इना ज़ैना तीं सेइं साथीन, तैना कौन आन?” तैनी ज़ोवं, “इना तेरे नौकरेरां मट्ठन, ज़ैना परमेशरे अनुग्रह केरतां मीं दित्तोरन।” तैखन मट्ठेईं समेत नौकरेनेइं नेड़े एइतां मथ्थो टेको। फिरी मट्ठेईं समेत लिआ नेड़े अई, ते तैनेईं भी मथ्थो टेको; आखर यूसुफ ते राहेलां भी नेड़े एइतां मथ्थो टेको। तैखन एसावे पुछ़ू, “तेरू इन ज़ैन एत्रू टब्बर मीं मैल्हू, एन केरो कुन मतलबे?” तैनी ज़ोवं, “इन कि मेरे मालिकेरी सिद्धी नज़र मीं पुड़ भोए।” एसावे ज़ोवं, “हे मेरे ढ्ला, मीं कां त बड़ुए; ज़ैन किछ तेरूए तैन तेरू भोए।” याकूबे ज़ोवं, “नईं-नईं, अगर तेरो अनुग्रह मीं पुड़ भोए, त मेरे तोफे कबूल केर: किजोकि मीं तेरू दर्शन केरतां, मन्ना कि मीं परमेशरेरू दर्शन कियोरूए, ते तू मीं पुड़ खुशी भोवरोस। एल्हेरेलेइ ई तोफो, ज़ै मीं तेरे लेई भेज़ोरोए, कबूल केर; किजोकि परमेशरे मीं पुड़ अनुग्रह कियोरोए, ते मीं कां बड़ु किछे।” ज़ैखन तैनी तैस कां बड़ी मिन्नत की, तैखन तैनी तै तोफो कबूल कमाव।
फिरी एसावे ज़ोवं, “एई, असां अग्रोवं च़लम: ते अवं तीं अग्री-अग्री च़लेलो।” याकूबे जुवाब दित्तो, “हे मेरे मालिक, तू ज़ानतस कि मीं सेइं साथी निक्के बच्चेन, ते दुद्ध देने बैली भैड्डां-छ़ेल्ली ते बेछ़ीन; अगर एना जानबर एक्की दिहाड़े भी जादे च़लाए गान त सभेरे सब मेरि गाले। एल्हेरेलेइ मेरे मालिक अपने नौकरे करां अग्री च़ल, ते अवं इन जानबरां केरे च़लनेरे मुताबिक, ज़ैना मीं अग्री-अग्री आन, ते बच्चां केरे साथे बल्हे-बल्हे, च़ेलतां सेईरे मां अपने मालिके कां पुज़ेलो।” एसावे ज़ोवं, “त अपने सैथन मरां अवं किछ तीं सेइं साथी रखताईं।” तैनी ज़ोवं, “एन किजो? एत्रू बड़ुए, कि मेरे मालिकेरी सिद्धी नज़र मीं पुड़ भोए।” तैखन एसावे तैस्से दिहाड़े सेईर सूबे जो गानेरे लेई अपनि बत ट्लाई। पन याकूब तैट्ठां निस्तां उलटे पासे सफर केरतां सुक्कोते जो सुखे सेइं पुज़्ज़ो, ते तैड़ी अपने लेई अक घर, ते जानबरां केरे लेई गेवड़ां बनां, तांए तैट्ठेरू नवं सुक्कोत1 पेवं।
याकूबेरू कनाने जो गानू
ते याकूब ज़ै पद्दनरामेरां जेवरो थियो, तैनी कनान मुल्खेरे शेकेम नगरे मां सुखे सेइं पुज़तां नगरेरे सामने डेरे लाए। याकूबे 100 चैंदरे सिक्कन2 मां शेकेमेरे बाजी हमोरे करां ज़मीनरो किछ हिस्सो मुल्ले घिन्तां अपनो तेम्बु खड़ो कियो। ते तैड़ी तैनी अक वेदी बनेइतां तैसेरू नवं एल-एलोहे-इस्राएल3 रख्खू।
Source notes (3)
- Footnote सुक्कोत मतलब झोफड़ी।
- Footnote 100 चैंदरे सिक्कन अक चैंदरो सिक्को लगभग एक्की ड्लाव्वां केरे मज़दूरेरे दिहैड़रे बराबरे।
- Footnote एल-एलोहे-इस्राएल मतलब इस्राएलेरो परमेशर शेक्ति बालोए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.