Bhadrawahi Bible
उत्पत्ति 23
सारारी मौत ते दब्बू गानू
ज़ैखन सारारी उमर 127 साल भोइ; तैखन तै किर्यतअर्बा मां मेरि जेई। ई ठार त कनान मुल्खे मांए, ते तैस जो हेब्रोन भी ज़ोतन। एल्हेरेलेइ अब्राहम सारारे लेई मातम केरने तैड़ी जेव। तैखन अब्राहम लाशी करां उठतां तैट्ठेरे रानेबाले हित्ती लोकन सेइं ज़ोने लगो, “अवं तुश्शे दरमियान मेहमान ते परदेशी आईं; मीं अपने दरमियान कब्रसतानेरे लेई एरी ज़मीन देथ ज़ै मेरी अपनि भोए, कि ज़ैड़ी अवं अपने मुड़दे देब्बी सेखी।” हित्ती लोकेईं अब्राहमे सेइं ज़ोवं, “हे इश्शे मालिक, इश्शी शुन; तू त असन मां बड्डो प्रधानस। इश्शी कब्रन मरां ज़ैस तू चातस तैस मां अपने मुड़दे दब; असन मरां कोई भी तीं अपनि कब्र देनेरे लेई न ठाकेलो।” तैखन अब्राहम खड़ो उठ्ठो, ते हित्ती लोकां केरे सामने, ज़ैना तैस मुल्खेरे रानेबाले थिये, झुकतां ज़ोने लगो, “अगर तुश्शी ई मर्ज़ी भोए कि अवं अपने मुड़दे देब्बी, पन मेरी प्राथना ईए, कि सोहरेरे मट्ठे एप्रोने कां मेरे लेई बिनती केरा, कि तै अपनि मकपेला बाली कुढ, ज़ै तैसेरे ज़मीनरे हद्दी मांए; तैसेरी पूरी कीमत नेइतां मीं दे, कि तै तुश्शे दरमियान कब्रसतानेरे लेई मेरी अपनि ज़मीन भोए।” एप्रोन त हित्ती लोकन मां तैड़ी बिशोरो थियो, एल्हेरेलेइ ज़ेत्रे हित्ती तैसेरे नगरेरे फाटके मरां भोइतां गाते थिये, तैन सेब्भी केरे सामने तैने अब्राहमे जुवाब दित्तो, “हे मेरे मालिक, एरू नईं, मेरी गल शुन; तै ज़मीन कुढी सने अपने कौमरे ढ्लां केरे सामने तीं देताईं; ते अपने मुड़दे कब्री मां दब।” तैखन अब्राहम तैस मुल्खेरे रानेबालां केरे सामने झुको। ते तैन सब हित्ती लोकां केरे शुन्ते एप्रोने सेइं ज़ोवं, “अगर तू एरू चातस, त मेरी ई गल शुन तैस ज़मीनरी ज़ै कीमत भोए, तै अवं देनी चाताईं; तैस मीं करां ने, तैखन अवं अपने मुड़दे तैड़ी दब्बेलो।” एप्रोने अब्राहमे ई जुवाब देइतां ज़ोवं, “हे मेरे मालिक, मेरी गल शुन; तैस ज़मीनरी कीमत त 400 शेकेले1; पन मेरे ते तेरे दरमियाने मां इना कुन आन? अपने मुड़दे कब्री मां दब।” अब्राहमे एप्रोन मनेइतां तैस तेत्रे रुपेइये तुलतां दित्ते, ज़ेत्रे तैने हित्ती लोकां केरे शुन्ते वक्त ज़ोवरू थियूं, मतलब बुपैरी केरे हिसाबे सेइं 400 चैंदरे शेकेल सिक्के दित्ते।
एन्च़रां एप्रोनेरी तै ज़मीन ज़ै मम्रेरे सामने मकपेला मां थी, तैस कुढी सने, ते बुट्टन सने ज़ैना तैस मां ते तैसेरी च़ेवरे पासां केरि सरहद्दी मां थिये, ज़ेत्रे हित्ती लोक तैसेरे नगरेरे फाटके मरां भोइतां गाते थिये, तैन सेब्भी केरे सामने अब्राहमेरे अधिकारे मां तै ज़मीन पक्के तरीके सेइं भोइ। इसेरे बदले अब्राहमे अपनि कौन्श सारा ज़ै तैस मकपेला बाली ज़मीनरे कुढी मां ज़ै मम्रेरे मतलब हेब्रोनेरे सामने कनान मुल्खे मांए, मित्ती दित्ती। एन्च़रां तै ज़मीन कुढी सने, ज़ै तैस मां थी, हित्ती लोकां केरे तरफां कब्रसतानेरे लेई अब्राहमेरे अधिकारे मां पूरे तरीके सेइं भोइ।
Source notes (1)
- Footnote 400 शेकेले च़ेवर किल्लो शा शौव ग्राम चाँदी।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.