Bhadrawahi Bible
उत्पत्ति 22
अब्राहमेरी अज़मैइश
इन गल्लां केरे बाद एरू भोवं कि परमेशरे, अब्राहमे सेइं इन ज़ोइतां तैसेरी अज़मैइश की, “हे अब्राहम!” तैने ज़ोवं, “अवं हाज़र आईं।” परमेशरे ज़ोवं, “अपने मट्ठे मतलब अपने अकैल्ले मट्ठे इसहाके, ज़ैस सेइं तू प्यार केरतस, साथी नेइतां मोरिय्याह मुल्खे मां च़लो गा, ते अवं तैड़ी तीं अक पहाड़ हरेइलो ते तू तैस तैड़ी होमबलि केरतां च़ाढ़।” अब्राहम झ़ेझ़ां सुबेलो उठो ते अपने गधे पुड़ काठी लेइतां अपने दूई नौकर, ते अपनु मट्ठू इसहाक साथी नेइतां, ते कने होमबेलरे लेई कैड़ु कट्टां; तैखन तैट्ठां निस्तां तैस जगाई जो च़लो, ज़ैड़ी गानेरे लेई परमेशरे तैस सेइं ज़ोवरू थियूं। ट्लेइयोवं दिहाड़े अब्राहमे तै जगाह दूरेरां लाही। ते तैने अपने नौकरन सेइं ज़ोवं, “तुस गधे कां इड़ी बिश्शा; अवं ते मेरू मट्ठू उड़ी गेइतां, ते परमेशरेरी आराधना केरतां, फिरी तुसन कां वापस एजमेले।” फिरी अब्राहमे होमबलि देनेरे लेई कैड़ु अपने मट्ठे इसहाके कां छ़ूनेरे लेई दित्तां, ते अग ते छ़ुरी अपने हथ्थे मां नेही; ते तैना दूईये साथी च़ले। इसहाके अपने बाजी अब्राहमे सेइं ज़ोवं, “हे मेरे बाजी,” तैने ज़ोवं, “हे मेरे मट्ठा, कुन गल्ले?” तैने ज़ोवं, “हेर, अग ते कैड़ु त असन कां आन; पन होमबेलरे लेई गबड़ू कोड़िए?” अब्राहमे ज़ोवं, “हे मेरे मट्ठा, परमेशर होमबेलरे लेई गबड़ेरो इंतज़ाम एप्पु केरेलो।” ते तैना दूईये साथी-साथी अग्रोवं च़लते जे।
ज़ैखन तैना तैस ठारी पुज़्ज़े, ज़ेसेरे बारे मां परमेशरे तैस सेइं ज़ोवरू थियूं; तैखन अब्राहमे तैड़ी अक वेदी बनेइतां कैड़ु केरो ढेर लव, ते अपनु मट्ठू इसहाक बेन्धतां वेदी पुड़ रखोरे कैड़न पुड़ रख्खू। फिरी अब्राहमे हथ्थे मां छ़ुरी नी कि अपने मट्ठे बलि केरे। तैखन यहोवारे दूते सुर्ग मरां तैस हक देइतां ज़ोवं, “हे अब्राहम, हे अब्राहम!” तैने ज़ोवं, “हेर, अवं इड़ी आईं।” तैने ज़ोवं, “एस मट्ठे पुड़ हथ न च़ला, ते न एस सेइं किछ केर; हुनी मीं पतो लग्गो कि तू परमेशरेरो डर मन्नेबालोस, किजोकि तीं मीं करां अपनु अकैल्लू मट्ठू बलि केरने करां भी परवाह न की।” तैखन अब्राहमे तक्कू, ते कुन हेरू, कि तैस पुतोरां अक हुड़े ज़ैसेरां शिन्गां झ़ैल्ले मां फसोरन; ते अब्राहमे गेइतां तै हुड़ नियो, ते अपने मट्ठेरे ठारी होमबलि केरतां च़ाढ़ो। अब्राहमे तैस ठारारू नवं यहोवा यिरे1 रख्खू, इसेरे मुताबिक अज़ तगर भी ज़ोवं गाते, “यहोवारे पहाड़े पुड़ दित्तू गालू।”
फिरी यहोवारे दूते दूइयोवं फेरे सुर्गे मरां अब्राहमे हक देइतां ज़ोवं, “यहोवा इन ज़ोते, कि अवं अपनि कसम खाताईं कि तीं ज़ैन इन कम कियोरूए कि अपने मट्ठे, बल्के अपनु अकैल्लू मट्ठू भी, न छ़डू; इस वजाई सेइं अवं ज़रूर तीं बरकत देइलो; ते ज़रूर तेरे खानदाने अम्बरेरे तारे, ते समुन्दरेरे बन्नेरी रेतरे ज़ेरे बेशुमार केरेलो, ते तेरे खानदानेरे लोक अपने दुशमनां केरे नगरां केरे मालिक भोल्हे; ते धेरतरे सैरी कौमन तेरे खानदानेरे वजाई सेइं बरकत मैल्हेली: किजोकि तीं मेरो हुक्म मन्नोरोए।” तैखन अब्राहम अपने नौकरन कां वापस अव, ते तैना सब बेर्शेबा जो साथी-साथी जे; ते अब्राहम बेर्शेबा मां राने लगो।
नाहोरेरू खानदान
इन गल्लां केरे बाद एरू भोवं कि अब्राहमे ई बिस्तार मैल्हो, “मिल्का भी अम्मा बनोरीए ते तैस भी तेरे ढ्ला नाहोरे सेइं औलाद भोवरीए।” मिल्कारां मट्ठां त इना भोआं, मतलब तैसेरू बड्डू मट्ठू ऊस, ते ऊसेरो ढ्ला बूज, ते कमूएल, ज़ै अरामेरो बाजी भोव। फिरी केसेद, हज़ो, पिल्दाश, यिद्लाप ते बतूएल। इन अट्ठन मिल्का अब्राहमेरे ढ्ला नाहोरेरे ज़िरिये ज़र्म दित्तू। ते बतूएले सेइं रिबका पैदा भोइ। फिरी नाहोरेरी रूमा नंव्वेरी अक रखैल भी थी; ज़ैस सेइं तेबह, गहम, तहश ते माका पैदा भोए।
Source notes (1)
- Footnote यहोवा यिरे मतलब यहोवा इंतज़ाम केरते।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.