Bhadrawahi Bible
यहेजकेल 47
ज़िन्दगी देनेबालो दरिया
फिरी तैनी मैन्हें अवं भवनेरे दारे पुड़ वापस नियो; ते भवनेरी डेवढरे बुन्ना अक पैनेरो नाग निस्तां पूर्वेरे पासे बगने लगोरो थियो, भवनेरू दार त पूर्वेरे पासे थियूं, ते पैनेरो नाग भवनेरे पूर्वेरे ते वेदरे दक्षिण, बुनमेइं निस्तो थियो।1 तैखन तैनी अवं उत्तरी फाटके मांमेइं बेइर आनो, ते बेइरमेईं-बेइरमेईं हंठेइतां, मतलब पूर्वी फाटके कां पुज़व; ते दक्षिणी पासेरां पानी बगतू थियूं। ज़ैखन तै मड़द हथ्थे मां नापनेरी डोरी ट्लेइतां पूर्वेरे पासे निस्सो, तैखन तैनी भवने करां लेइतां, 1000 हथ्थे तगर तै पैनेरो नाग नापो, ते अवं पैनी मांमेइं च़लाव, ते पानी गुड्डन तगर थियूं। तैनी फिरी 1000 हथ नैपतां अवं पैनी मांमेइं च़लाव, ते पानी ज़ैंधन तगर थियूं, तैनी फिरी 1000 हथ नैपतां अवं पैनी मांमेइं च़लाव, ते पानी लखे तगर थियूं। तैनी फिरी 1000 हथ नापू, ते एरहो दरिया बेनि जेव कि अवं पार न गेइ बटो, किजोकि पानी हछु थियूं ते तारी देनेरे काबल थियूं; मतलब एरहो दरिया थियो कि कोई पार न थियो गेइ बटतो। तैखन तैनी मीं पुछ़ू, “ओ नाश भोने बाला मैन्हु, कुन तीं एन लावं?”
फिरी तैनी अवं दरियाएरे बन्ने-बन्ने वापस एन्हतां पत्र पुज़व। वापस एइतां मीं कुन लावं, कि दरियाएरे बन्ने पुड़ बड़े बुट आन।2 तैखन तैनी मीं सेइं ज़ोवं, “ऐह पैनेरो नाग पूर्वेरे पासे बगने लगोरोए, ते अराबा मां उतरतां समुन्दरेरे पासे बगेलो; ते ऐह भवने मरां निस्तां सिद्धो समुन्दरेरे मां मिली गालो; ते तैसेरू पानी मिट्ठू भोइ गालू। ज़ैड़ी-ज़ैड़ी ऐह दरिया बगेलो, तैड़ी-तैड़ी हर किसमेरे ठूल देनेबाले जीप जन्तू खूब भोल्हे ते मेछ़ली भी बेड़ि भोल्ही; किजोकि एस नागेरू पानी तैड़ी तगर पुज़ोरूए, ते समुन्दरेरू पानी मिट्ठू भोइ गालू; ते ज़ैड़ी-ज़ैड़ी ऐह दरिया पुज़ेलो, तैड़ी-तैड़ी सब जीप जन्तू ज़ीले। समुन्दरेरे बन्ने पुड़ मेछ़ली ट्लाने बाले खड़े राले, ते एनगदी करां लेइतां एनएगलैम तगर तैना जाल फैलाते राले, ते तैन बड्डे समुन्दरेरी ज़ेरि किसमे-किसमेरी बेशुमार मेछ़ली मैल्हेली। पन समुन्दरे कां ज़ै च़िकर ते गत्तन, तैन केरू पानी मिट्ठू न भोल्हु; तैन लूनू रालू। दरियाएरे दूईने पासन किसमे-किसमेरे बेशुमार खानेरे काबल फल देनेबाले बुट लग्गेले, ज़ैन केरां पट्लां भी न शुकेलां ते फल लगनो भी कधे बन्द न भोल्हो, किजोकि दरियाएरू पानी पवित्र ठारी मरां निस्सेरूए। तैन मां हर महीने नंव्वे-नंव्वे फल लग्गेले। तैन केरे फल खानेरे लेई ते पट्लां दुवाई एरे कम्मे एज्जेलां।”3
मुल्खेरी हद्दां
परमेशर यहोवा एन ज़ोते: ज़ैस हदरे अन्तर तीं ऐह मुल्ख अपने 12 गोट्लां केरे मुताबिक बंटनो पेलो, तै ईहीए: यूसुफेरे गोट्लां केरे लोकन दूई हिस्से मैल्हेले। तुसन तै एक्की होरेरो ज़ेरो अपने हिस्से मां मैल्हेलो, किजोकि मीं कसम खेवरीए, कि तुश्शे दादे-पड़दादन देइलो, एल्हेरेलेइ ऐह मुल्ख तुश्शो अपनो हिस्सो भोल्हो।
“मुल्खेरी हद ई भोए, मतलब उत्तरी पासेरी हद बड्डे समुन्दरे करां लेइतां हेतलोन नगरे मांमेइं सदाद नगरेरे वैदी तगर पुज़्ज़े, ते तैस सरहद्दी करां हमात बेरोता, ते सिब्रैम ज़ैन दमिश्क ते हमात प्रदेशां केरे हद्दां केरे मझ़ाटे, ते हसर्हत्तीकोन नगरे तगर, ज़ैन हौरान नगरेरे सरहद्दी पुड़े। ई हद भूमध्य-सागरे करां लेइतां दमिश्केरे सरहद्दी कां हसरेनोने कां पुज़्ज़े, ते तैसेरे उत्तरी पासे हमात भोए। उत्तरी हद एहे भोए। पूर्वी हद ज़ेसेरे एक्की पासे हौरान ते दमिश्क; ते यरदन दरियारे पासे गिलाद ते इस्राएली लोकां केरो मुल्ख भोए; उत्तरी सरहद्दी करां लेइतां पूर्वी समुन्दरे तगर तैस नैपथ। पूर्वी हद एहे भोए। दक्षिणी हद तामारे करां लेइतां मरीबा-कादेश नंव्वेरे पैनेरे नागे तगर, मतलब मिस्रेरे नाले तगर, ते बड्डे समुन्दरे तगर पुज़्ज़े। दक्षिणी हद एहे भोए। पश्चिमी हद दक्षिणी सरहद्दी करां लेइतां हमातेरी वैदी तगर भूमध्य-सागर भोल्हो। पश्चिमी हद एहे भोए।
“एस तरीके मुल्ख इस्राएली लोकां केरे गोट्लां केरे मुताबिक बेन्टथ। एस मुल्खे एप्पु मांमेइं ते तैन परदेशी लोकन भी बेंटतां देइयथ, ज़ैना तुसन मां रहतन ते तैन केरे बच्चे ज़र्मतन। तैना तुश्शी नज़री मां देशी इस्राएली केरे ज़ेरे भोन, ते तैन्न तुश्शे गोट्लन मां अपनो-अपनो हिस्सो मैल्हेलो। ज़ै परदेशी ज़ैस गोट्लेरे प्रदेशे मां रहतो भोए, तैस तैड़ी हिस्सो देइयथ, परमेशर यहोवा एन ज़ोते।
Source notes (3)
- Cross-reference प्रका. 22:1.
- Cross-reference यहे. 47:12.
- Cross-reference प्रका. 22:2.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.