Bhadrawahi Bible
यहेजकेल 42
याजकां केरे लेई कमरे
फिरी तैनी मैन्हें अवं बेइरीं अंगनेरे उत्तरी पासे नियो, ते तैनी अवं तैन दूई कमरन कां आनो ज़ैना भवनेरे अंगनेरे सामने ते उत्तरेरे पासे थिये। 100 हथ्थेरी दूरी पुड़ उत्तरी दार थियूं, ते तैसेरी चौड़ाई 50 हथ थी। एंत्रीं अंगनेरे 20 हथ सामने ते बेइरीं अंगनेरे फर्शेरे सामने ट्लाईए मंज़लां केरि छेज्जी थी। कमरां केरे सामने एंत्रीं पासे गानेबाली 10 हथ बिल्ली अक बत थी; ते अक हथ होरि बत थी; ते कमरां केरां दारां उत्तरी पासे थियां। बेइयें कमरे निकड़े थिये, मतलब छेज्जी केरि वजाई सेइं बुनीयें ते मझ़ाटेरे कमरन करां निकड़े थिये। किजोकि तैना ट्लाई मंज़लां थी, ते अंगना केरे ज़ेरे तैन केरे खम्भे न थिये। एल्हेरेलेइ बुनीयें ते मझ़ाटेरे कमरन करां निकड़े थिये ते बुनीयें कमरन करां निकड़े थिये। ज़ै दिवार कमरां केरे बेइर साथी-साथी थी, मतलब कमरां केरे सामने अंगनेरे पासे थी, तैसारी लम्बाई 50 हथ थी। किजोकि बेइरीं अंगनेरे कमरां केरि लम्बाई 50 हथ थी, ते भवनेरे सामनेरे पासेरी लम्बाई 100 हथ थी। एन कमरां केरे बुन पूर्वी पासे अक बत थी, ज़ैड़ी लोक बेइरीं अंगने मरां एन मांजो गाते थिये।
अंगनेरी दिवारां केरि चौड़ाई मां पूर्वी पासे अक अलग ठार ते भवनेरे सामने भी कमरे थिये। तैन केरे सामनेरी बत उत्तरी कमरां केरि बत्तरी ज़ेरि थी; तैन केरि लम्बाई चौड़ाई बराबर थी ते तैन केरे बेइर निसनेरे बत ते ढांचो तैन केरे दारे सेइं साथी थी। दक्षिणी कमरां केरे दारां केरे मुताबिक बत्तरे कूने पुड़ भी दारां थियां, मतलब पूर्वेरे पासेरी दिवारां केरे सामने, ज़ैठां लोक तैन मांजो दाखल भोते थिये।
फिरी तैनी मीं सेइं ज़ोवं, “एना उत्तरी ते दक्षिणी कमरे ज़ैना अंगनेरे सामने आन, एना तैना पवित्र कमरेन, ज़ैन मां यहोवारे सामने गानेबाले याजक परमपवित्र चीज़ां खाएले; तैना परमपवित्र चीज़ां ते अन्नबलि, पापबलि ते दोषबलि तैड़ी रखेले; किजोकि तै ठार पवित्रे। ज़ैखन-ज़ैखन याजक अन्तर गाले, तैखन-तैखन निसनेरे मौके तैना पवित्र ठारी करां बेइर अंगने मां एन्च़रे न निस्सेले, मतलब तैना पेइले एपनी सेवा केरनेरां लिगड़ां पवित्र ठारी पुड़ रखेले; किजोकि एना कमरे पवित्रन। तैना होरां लिगड़ां लेइतां आम लोकां केरि ठारी पुड़ जो गाले।”
परमेशरेरे भवनेरी बेइरीं लम्बाई-चौड़ाई
ज़ैखन तैनी अन्तर भवन नापू, तैखन अवं पूर्वी पासेरे फाटकेरी बत्ती करां बेइर नेइतां बेइरीं ठार च़ेवरे पासना नापने लगो। तैनी पूर्वी पासे नापनेरे बाँसे सेइं नापू ते 500 बाँस निस्सू। तैखन तैनी उत्तरी पासे नापनेरे बाँसे सेइं नापू ते 500 बाँस निस्सू। तैखन तैनी दक्षिणी पासे नापनेरे बाँसे सेइं नापू ते 500 बाँस निस्सू। ते पश्चिमी पासे मुड़तां तैनी नापनेरे बाँसे सेइं नापू ते 500 बाँस निस्सू। तैनी तैस ठारारी च़ेवरे पासां केरि हदबन्दी नापी, ते तैसेरे च़ेवरे पासन अक दिवार थी, तै 500 बाँस लम्मी ते 500 बाँस बिल्ली थी, तै एल्हेरेलेइ बनेवरी थी कि पवित्र ते आम ठारी अलग-अलग केरे।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.