Bhadrawahi Bible
यहेजकेल 40
यहेजकेल यरूशलेम नगरे मां पुज़व गानो
इश्शी गुलैमरे पंजियों साले मतलब यरूशलेम नगर नेनेरां बाद च़ेवधोवं सालेरे पेइले महीनेरे दशोवं दिहाड़े यहोवारी शक्ति मीं पुड़ थी, ते तैनी अवं तैड़ी पुज़व। अपने दर्शने मां परमेशरे अवं इस्राएलेरे मुल्खे मां पुज़व ते तैड़ी एक्की बड़े उच्चे पहाड़े पुड़ खड़ो कियो, ज़ेसेरे दक्षिणेरे पासे नगरेरो ज़ेरो आकार थियो। ज़ैखन यहोवा अवं तैड़ी नियो, त मीं अक मैन्हु लाव ज़ेसेरी शकल सूरत पितलरी ज़ेरि थी ते हथ्थे मां सनेरो फीतो ते नापनेरे लेई बाँस घिन्तां तै फाटके मां खड़ोए।1 तैनी मैन्हें मीं सेइं ज़ोवं, “ओ नाश भोने बाला मैन्हु, एपनी एछ़्छ़न सेइं हेर, ते अपने कन्नेईं सेइं शुन, ते ज़ैन किछ अवं तीं हरेइलो तैस पुड़ ध्यान दे, किजोकि तू एल्हेरेलेइ इड़ी पुज़ावरोस कि अवं तीं एना गल्लां हेरेईं; ते ज़ैन किछ तू लास तैन इस्राएली लोकन सेइं ज़ोस।”
परमेशरेरे भवने मां एजनेरे लेई पूर्वी फाटक
ते हेरा, परमेशरेरे भवनेरे बेइर च़ेवरे पासन अक दिवार थी, ते तैस मड़देरे हथ्थे मां नापनेरे लेई अक बाँसेरो डन्डो थियो, ज़ेसेरी लम्बाई शा हथ थी ज़ै आम हथ्थन करां च़ेवर अंगल जादे; तैनी दिवारारी मोटाई नापी ते तै अक बाँस निस्सी, फिरी तैनी तैस दिवारारी ऊँचाई नापी ते तै भी अक बाँस निस्सी।2 तैखन तै पूर्वेरे फाटकेरे पासे अव, ज़ै पूर्वेरे पासे थियो ते तैसेरी पेवड़न पुड़ च़ेढ़तां फाटकेरी दूईये चुकाठां केरि ऊँचाई नापी ते अक-अक बाँस निस्सी। ते पहरेदारां केरे कमरां केरि लमबाई ते चौड़ाई एक्की बाँसे बराबर थी, ते दूई-दूई कमरां केरो फासलो पंच़ हथ थियो, ते फाटकेरी डेवढी ज़ै फाटकेरे ओसारे कां भवनेरे पासे थी, तै भी एक्की बाँसे बराबर थी। फिरी तैनी फाटकेरो तै ओसारो नापो ज़ै भवनेरे सामने थियो तै भी अक बाँस निस्सो। तैनी फाटकेरो ओसारो नापो ते तै अठ हथ निस्सो, ते तैसेरे खम्भे दूई-दूई हथ निस्से ते फाटकेरो ओसारो भवनेरे सामने थियो। पूर्वी फाटकेरे दूईने पासन ट्लाई-ट्लाई पहरो देनेरे लेई कमरे थिये, ज़ैन सेभी केरि नाप बराबर थी, ते दूईयां पासां केरे खम्भां केरि नाप बराबर थी। फिरी तैनी फाटकेरे दारेरी नाप की ज़ेसेरी चौड़ाई दश हथ निस्सी; ते फाटकेरी लम्बाई नैपतां 13 हथ निस्सी। दूईये पासे पहरो देनेरे कमरे केरे सामने अक हथ ठार थी ते दूईये पासन कमरे शा-शा हथ थिये। फिरी तैनी एक्की पहरो देनेरे कमरेरी पेत्रीं दिवारारी छती सेइं लगते कमरेरी दिवारारी छती तगर फाटकेरी नाप की ते तै 25 हथ दूरी निस्सी, ते तैना फाटकेरे आमने-सामने थिये। फिरी तैनी 60 हथ्थां केरे खम्भे नापे, ते अंगन फाटकेरे आसे-पासेरे खम्भन तगर थियूं। फाटकेरे दारे अगरां लेइतां तैसेरे एंत्रीं ओसारेरे अग्गर तगर 50 हथ्थां केरो फासलो थियो। पहरो देनेबाले कमरन मां, ते फाटकेरे अन्तर च़ेवरे पासां केरे खम्भां केरे मझ़ाटे निक्की-निक्की दैरी थी, ते खम्भां केरे ओसारे मां भी तेरही थी, ते फाटकेरे अन्तर च़ेवरे पासन दैरी थी; ते हर एक्की खम्भे पुड़ खजूरेरे बुट्टां केरि नक्काशी कियोरी थी।
बेइरियोवं अंगन
तैखन तैनी अवं बेइरींए अंगने मां नियो; ते तैस अंगनेरे च़ेवरे पासन कमरे थिये; ते अक फर्श बनोरो थियो; ज़ैस पुड़ 30 कमरे बनोरे थिये। ऐह फर्श मतलब बुनीयें फर्शेरे फाटकन कां नेड़ो थियो, ते तैन केरि लमबैइअरे मुताबिक थियो। फिरी तैनी बुनीयें फाटकेरे अगरां लेइतां एंत्रीं अंगनेरे बेइर तगर नापू ते 100 हथ निस्सु; ते पूर्व ते उत्तरेरे पासे भी एरू थियूं।
उत्तरी पासेरू दाखल भोनेरू दार
तैखन बेइरीं अंगनेरे उत्तर पासेरे फाटकेरी लम्बाई ते चौड़ाई नापी। तैसेरे दूईने पासन ट्लाई-ट्लाई पहरो देनेरे लेई कमरे थिये, ते तैन केरे भी खम्भां केरे ओसारेरी नाप पेइले फाटकेरे मुताबिक थी, तैसेरी लम्बाई 50 हथ ते चौड़ाई भी 25 हथ थी। एसेरे भी दैरी ते खम्भां केरे ओसारे ते खजूरां केरि नाप पूर्वी पासां केरे फाटकां केरि ज़ेरि थी, ते तैस पुड़ च़ढ़नेरे लेई सत पेवड़ी थी; ते तैन केरे सामने एसेरो ओसारो थियो। एंत्रीं अंगनेरे उत्तर ते पूर्वी पासे होरि फाटकां केरे सामने फाटक थिये; ते तैन फाटकां केरि होरि नाप केरतां 100 हथ निस्सी।
दक्षिणी पासेरू दाखल भोनेरू दार
फिरी तैनी अवं दक्षिणेरे पासे नियो, ते मीं अक फाटक लाव, ज़ै दक्षिणेरे पासे थियो, फिरी तैनी तैसेरे खम्भे ते खम्भां केरे ओसारे नापे ते तैन केरि भी तेत्री नाप निस्सी। तैन दैरी केरे सामने एसेरे ते एन केरे खम्भां केरे ओसारां केरे च़ेवरे पासन भी दैरी थी; तैसेरी लम्बाई 50 हथ ते चौड़ाई भी 25 हथ थी, ते तैस पुड़ च़ढ़नेरे लेई सत पेवड़ी थी; ते तैन केरे सामने खम्भां केरो ओसारो थियो; ते तैसेरे दूईये पासां केरे खम्भन पुड़ खजूरेरे बुट्टेरी घड़ाई कियोरी थी। दक्षिणेरे पासे भी अन्तर अंगनेरो अक फाटक थियो, ते तैनी दक्षिणेरे पासां केरे दूईये फाटकां केरि दूरी नापी ते तै 100 हथ निस्सी।
एन्त्रियों अंगन: दक्षिणी पासेरू दाखल भोनेरू दार
तैखन तै दक्षिणी फाटके मरां अवं एंत्रीं अंगने मां नियो, ते तैनी दक्षिणी फाटकेरी नाप की ते तै भी तेत्री निस्सी। मतलब एसेरे भी पहरो देनेरे लेई कमरे ते खम्भे ते खम्भां केरे ओसारे सब तेरहे ज़ेरे थिये; ते तैसेरे ते तैसेरे खम्भां केरे ओसारां केरे च़ेवरे पासन भी दैरी थी; ते तैसेरी लम्बाई 50 हथ ते चौड़ाई भी 25 हथ थी। ते तैसेरे च़ेवरे पासां केरे खम्भां केरो ओसारो भी 25 हथ लम्मो थियो ते चौड़ाई भी 50 हथ थी। एसेरे खम्भां केरो ओसारो बेइरीं अंगनेरे पासे थियो, ते तैसेरे खम्भन पुड़ भी खजूरेरे बुट घड़ाई कियोरे थिये, ते तैस पुड़ च़ढ़नेरे लेई अठ पेवड़ी थी।
पूर्वी पासेरू दाखल भोनेरू दार
फिरी तैनी मैन्हें अवं पूर्वी पासेरे एंत्रीं अंगने मां नियो, ते तैस पासेरो फाटक नैपतां तेत्रो निस्सो। ते एसेरे भी पहरो देनेरे लेई कमरे ते खम्भे ते खम्भां केरो ओसारो, सब तेरहे ज़ेरे थिये; ते तैसेरे ते तैसेरे खम्भां केरे ओसारां केरे च़ेवरे पासन भी दैरी थी; ते तैसेरी लम्बाई 50 हथ ते चौड़ाई भी 25 हथ थी। एसेरो ओसारो भी बेइरीं अंगनेरे पासे थियो, ते तैसेरे खम्भन पुड़ भी खजूरेरे बुट घड़ाई कियोरे थिये, ते तैस पुड़ च़ढ़नेरे लेई अठ पेवड़ी थी।
उत्तरी पासेरू दाखल भोनेरू दार
फिरी तैनी मैन्हें अवं उत्तरी फाटकेरे पासे नेइतां तै पासो नापो, ते तैसेरी भी तेरही नाप निस्सी। ते तैसेरे भी पहरो देनेरे लेई कमरे ते खम्भे ते तैन केरो ओसारो थियो; ते तैसेरे भी च़ेवरे पासन दैरी थी; ते तैसेरी लम्बाई 50 हथ ते चौड़ाई भी 25 हथ थी। तैसेरे खम्भे बेइरीं अंगनेरे पासे थिये, ते तैसेरे खम्भन पुड़ भी खजूरेरे बुट घड़ाई कियोरे थिये, ते तैस पुड़ च़ढ़नेरे लेई अठ पेवड़ी थी।
बलिदान तियार केरनेरे लेई कमरे
फिरी ज़ैना खम्भे फाटकन कां थिये तैन केरे नेड़े दारे समेत कमरे थिये, ज़ैड़ी होमबलि कियोरे जानबर धोए गाते थिये। होमबलि, पापबलि ते दोषबलि केरे जानबर मारे गाते थिये ते फाटकां केरे ओसारे कां तैसेरे दूईये पासन दूई-दूई मेज़ां थी। फाटकेरे एक्की बेइरीं पासे पुड़ मतलब उत्तरी फाटकेरे दारेरी चड़ैई पुड़ दूई मेज़ां थी; ते तैसेरे होरि पासे पुड़ भी दूई मेज़ां थी, ज़ैना फाटकेरे ओसारे कां थी। फाटकेरे दूईने पासन च़ेवर-च़ेवर मेज़ां थी, सब मिलेइतां अठ मेज़ां थी, ज़ैना बलि केरनेरे जानबर मारनेरे लेई थिये। फिरी होमबलि केरनेरे लेई घड़ाई कियोरे घोड़ां केरि च़ेवर मेज़ां थी, ज़ैना डैढ हथ लेम्मी ते डैढ हथ बिल्ली थी, ते अक हथ उच्ची थी ते तैन पुड़ होमबलि ते मेलबलि केरनेरे जानबरां केरे हथियार रख्खे गाते थिये। ते दिवारी पुड़ च़ेवरे पासन च़ेवर अंगल लम्मे कुन्डे लगोरे थिये ते मेज़न पुड़ बलिदानां केरू मास रखोरू थियूं।
याजकां केरे कमरे
एंत्रीं अंगनेरे उत्तरी फाटकेरे बेइर गीतां ज़ोने बालां केरे कमरे थिये, ज़ैन केरां दारां दक्षिणेरे पासे थियां; ते पूर्वी फाटकेरे पासे अक कमरो थियो, ज़ेसेरू दार उत्तरेरे पासे थियूं। तैनी मीं सेइं ज़ोवं, “ऐह कमरो ज़ेसेरू दार दक्षिणेरे पासे, तैन याजकां केरे लेई आहे, ज़ैना भवनेरी देखभाल केरतन। ते ज़ैस कमरेरू दार उत्तरेरे पासे, तैन दार, तैन याजकां केरे लेई आहे ज़ैना वेदरी देखभाल केरतन; एना सादोकेरे खानदाने मरां आन; ते लेवी लोकन मरां यहोवारी सेवा केरनेरे लेई सिर्फ एना लोक नेड़े गातन।”
एन्त्रियों अंगन ते भवन
फिरी तैनी अंगन नापू ज़ैन चौवरस मतलब 100 हथ लम्मू ते 100 हथ चौड़ू थियूं। ते भवनेरे सामने वेदी थी।
फिरी तैनी अवं भवनेरे ओसारे मां नियो, ते ओसारेरे दूईये पासां केरे खम्भे नापे ते तैना पंच़-पंच़ हथ निस्से। ते दूईने पासन फाटकां केरि चौड़ाई ट्लाई-ट्लाई हथ थी। ओसारेरी लम्बाई 20 हथ, ते चौड़ाई 11 हथ थी; ते तैस पुड़ च़ढ़नेरे लेई पेवड़ी थी। ते खम्भां केरे दूईने पासन खम्भे थिये।
Source notes (2)
- Cross-reference प्रका. 11:1;21:15.
- Cross-reference प्रका. 21:15.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.