Bhadrawahi Bible
यहेजकेल 29
मिस्र मुल्खेरे खलाफ नबूवत
इश्शे गुलैमरे दशोवं सालेरे दशोवं महीनेरे बारोवं दिहाड़े यहोवाए मीं सेइं ज़ोवं, “ओ नाश भोने बाला मैन्हु, अपनु तुत्तर मिस्र मुल्खेरे राज़े फ़िरौनेरे पासे ते सारे मिस्रेरे खलाफ नबूवत केर, एन ज़ो, परमेशर यहोवा एन ज़ोते: हे फ़िरौन, अवं तेरे खलाफ आईं, हे बड्डे नगर, तू ज़ै अपने दरियां केरे मझ़ाटे रहतस, ज़ैनी ज़ोवरूए, ‘मेरो दरिया मेरोए, ते मीं ऐह अपने लेई बनेवरोए।’ पन अवं तेरे बोमफ़े मां नकेल लेइलो, ते तेरे दरियां केरि मेछ़ली तेरी खैड़ी मां खितैनेलो, ते तेरे दरियां केरि मेछ़ली तेरी खैड़ी सेइं खितैनेलो, ते तेरी खैड़ी सेइं खेतोरी मेछ़लन समेत तीं तेरे दरियान मरां कढेलो। तैखन अवं तेरी सैरी नहरन मेछ़लन समेत जंगले मां बेइर कढेलो, ते तू मैइदाने मां रेई गालो; कोन्ची भी खड़ो न केरेलो। मीं तू जंगलेरे जानबर ते अम्बरेरे च़ुड़ोलू केरि खूराक बनेवरोस।
“तैखन सारे मिस्रेरे लोकन पतो लग्गेलो कि अवं परमेशर यहोवा आईं। तैना त इस्राएली लोकां केरे लेई निरैठरे टेक ठहरोरे थिये। ज़ैखन तैनेईं तीं पुड़ हथ्थेरो भार छ़डो त तू ट्लुटी जेव, ते तैन केरे कंधे घिशके; ते ज़ैखन तैनेईं तीं पुड़ टेक लव त तू ट्लुटी जेव, ते तैन केरे लखेरी सैरी सीरां च़ैढ़ी जेई। एल्हेरेलेइ प्रभु यहोवा एन ज़ोते: हे मिस्र हेर, अवं तीं पुड़ तलवार च़लावेइतां, तेरे मैन्हु ते जानबर सेभन नाश केरेलो। तैखन मिस्र मुल्ख उज़ड़ी गालो, ते तैन्न पतो लग्गेलो कि अवं यहोवा आईं।
“तीं ज़ोवरूए, ‘मेरो दरिया मेरो अपनो आहे, ते मीएं तै बनेवरोए।’ एल्हेरेलेइ हेर, अवं तेरे ते तेरे दरियां केरे खलाफ आईं, ते मिस्र मुल्खे मिग्दोल नगरे करां लेइतां सवेने नगरे तगर बल्के कूश मुल्खेरी सरहद्दी तगर उज़ाड़ेलो। च़ैली सालन तगर तैस मां मैन्हेरी या जानबरेरो पव तगर न पेलो; ते न कोई तैस मां बस्सेलो। च़ैली सालन तगर अवं मिस्र मुल्खे उज़ड़ोरे मुल्खां केरे दरमियान उज़ैड़तां रखेलो; ते तैसेरे नगर उज़ड़ोरे नगरन मां खण्डर भोइतां राले। ते अवं मिस्री लोकन कौमन-कौमन मां छ़ींकेइतां छ़डेलो, ते मुल्खे-मुल्खे मां तितर-बितर केरतां छ़डेलो।
“परमेशर यहोवा एन ज़ोते: च़ैली साल बीतनेरे बाद अवं मिस्री लोकन तैन कौमन मरां अकोट्ठे केरेलो, ज़ैन मां तैना तितर-बितर भोवरे थिये; ते अवं मिस्री लोकन गुलैमी मरां छुटेइतां पत्रोस मुल्खे मां, ज़ै तैन केरि ज़र्म धरतीए फिरी तैड़ी पुज़ेइलो; ते तैड़ी तैन केरि अक निकड़ी ज़ेरि रियासत भोल्ही। तैन सेभी रियासतन करां निकड़ी भोल्ही, ते तै अपनि क्रोड़ी होरि कौमन पुड़ खड़ी न केरेलो; किजोकि अवं मिस्री लोकन एत्रे घटेइलो कि तैना फिरी गैर कौमन पुड़ राज़ न केरि बटेले। तै फिरी इस्राएली लोकन पुड़ भरोसो केरनेरी वजा न भोल्हो, किजोकि ज़ैखन तैना फिरी तैन केरे पासे तकेले, तैखन तैना तैन केरे अधर्मे याद केरेले। ते तैखन तैन पतो लग्गेलो कि अवं परमेशर यहोवा आईं।”
बाबेलेरे ज़िरिये मिस्र लुट्टो गानो
फिरी इश्शे गुलैमरे सताइयोवं सालेरे पेइले महीनेरे पेइले दिहाड़े यहोवाए मीं सेइं ज़ोवं, “ओ नाश भोने बाला मैन्हु, बाबेलेरे राज़े नबूकदनेस्सरे सोर घेरने मां केरतां अपनि सेना करां बड़ी मेहनत कराई; एड़ी तगर कि हर मैन्हेरी क्रोड़ी गंजी भोइ जेई, ते हर मैन्हेरे कंधे छ़िलोई जे, फिर भी सोर नगरे करां न त इस बड़े मेहनतरी कोई मज़दूरी मैल्ही ते न तैसेरे सेनाई। एल्हेरेलेइ परमेशर यहोवा एन ज़ोते: हेर, अवं बाबेलेरे राज़े नबूकदनेस्सरे मिस्र मुल्ख देइलो, ते तै तैसेरी सारी भीड़ नेलो, ते तैसेरी धन-दौलती पुड़ कब्ज़ो केरेलो; ते एहे मज़दूरी तैसेरी सेना मैल्हेली। मीं तैसेरे मेहनतरे बदले मां मिस्र मुल्ख एल्हेरेलेइ दित्तोरोए, कि तैन लोकेईं मेरे लेई कम कियोरू थियूं, परमेशर यहोवा एन ज़ोते।
“तैस्से मौके अवं इस्राएली लोकन मरां अक ताकतरू शिंग उगालो ते तैस मां तेरू आशी खोलेलो, ते तैन पतो लग्गेलो अवं परमेशर यहोवा आईं।”
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.