Bhadrawahi Bible
यहेजकेल 16
बेवफा कौन्शरी मसाल
फिरी यहोवाए मीं सेइं ज़ोवं, “ओ नाश भोने बाला मैन्हु, यरूशलेमे तैसेरे भिट्टे कम्मां केरे बारे मां ज़ो, ते तैस सेइं एन ज़ो, हे यरूशलेम, प्रभु यहोवा तींजो एन ज़ोते: तेरू ज़र्म ते तेरी पैइदाश कनानी लोकां केरे मुल्खे मां भोइ; तेरो बाजी त एमोरी लोकन मरां ते तेरी अम्मा हित्ती लोकन मरां थी। तेरू ज़र्म त एन्च़रे भोवं कि ज़ेइस तू ज़र्मी, तैस दिहाड़े न तेरी नाही कट्टी जेई, ते न तू शुद्ध भोनेरे लेई निहाई, ते न तीं लून मल्लू ते न तू फैलड़ी मां रख्खी। ते न केन्चेरी सिद्धी नज़र तीं पुड़ भोइ कि एन कम्मन मरां अक कम भी तेरे लेई कियूं गाए; बल्के अपने ज़र्मनेरे दिहाड़े तू अपने भिट्टे भोनेरे वजाई सेइं खुल्ले मैइदाने मां शारी जेवरी थी।
“ज़ैखन अवं तीं ड्लखमेइं निस्सो, ते तू खूने सेइं भेरतां पव मारते लाही, तैखन मीं तीं सेइं ज़ोवं, ‘हे खूने सेइं भेरतां ज़ींती रा;’ हाँ, मीं तींए सेइं ज़ोवं, ‘हे खूने सेइं भेरतां, ज़ींती रा।’ फिरी मीं तू उडारे डालेरी ज़ेरि बडाई, ते तू बेडोते-बेडोते बड्डी भोइ जेई; तेरी छाती बेडोई जेई, ते तेरे बाल बेडोई जे; फिर भी तू नग्गी थी।
“मीं फिरी तू गांते बार लाही, तैखन तू बड्डी कौन्श भोवरी थी; एल्हेरेलेइ मीं तू अपने लिगड़े सेइं ढक्की; ते कसम खेइतां तीं सेइं करार कियो ते तू मेरी भोइ जेई, प्रभु यहोवा एन ज़ोते। तैखन मीं तू पैनी सेइं निहेइतां तीं पुड़ेरां खून धोई छ़डो, ते तेरी जानी पुड़ ज़ैतूनेरो तेल मल्लो। फिरी मीं तीं कढ़ेई बालां लिगड़ां लुवां ते चमड़ेरी जुट्टी लुवाई; ते तेरे लख्खे मां सूक्ष्म सन बन्धू, ते रेशमी लिगड़ पलैट्टू। तैखन मीं तेरो हार शिंगार कियो, ते तेरे हथ्थे मां बंगां ते गले मां हार लुवाव। फिरी मीं तेरे नक्के मां नथ ते कन्न मां बैलड़ी लुवेई, ते तेरे दोग्गे पुड़ अक खूबसूरत ताज लुवावं। एन्च़रे सेइं तू सोन्ने चैंदी सेइं सज़ाई, तेरां लिगड़ां सूक्ष्म सन, रेशमी ते कढ़ाई दार कपड़े सेइं बनां; फिरी तेरे खानेरे लेई अट्टू, माछ़ी ते तेल थियो; ते तू बड़ी खूबसूरत बल्के रानी भोनेरे लेई काबल भोइ। ते तेरी खूबसूरतरी चर्चा गैर कौमन मां फैली जेई, किजोकि तैस महिमारी वजाई सेइं तू बड़ी खूबसूरत थी ज़ै मीं अपने तरफां दित्तोरी थी, प्रभु यहोवा एन ज़ोते।
“पन तू एपनी खूबसूरती पुड़ भरोसो केरतां अपने नंव्वेरे मुशूरी सेइं व्यभिचार केरने लगी, ते सेभी मुसाफर लोकन सेइं बड़ो कुकर्म कियो, ते ज़ै तीं चातो थियो तू तैस्से सेइं मिलती थी। तीं अपना लिगड़ां नेइतां रंग-बरेंगी उच्ची ठारां बनेई, ते तैन पुड़ व्यभिचार1 कियो, ते एरहो कुकर्म किये ज़ेरो कधी न थियो भोवरो ते न भोल्हे। तीं अपने खूबसूरत गेहने ज़ैना मेरे दित्तोरे सोन्ने चैंदरे थिये, तैन सेइं मड़दां केरि ज़ेरि मूरती बनेई, ते तैन सेइं भी व्यभिचार केरने लगी; ते अपना कढ़ाई दार लिगड़ां नेइतां तैन लुवां, ते मेरो तेल, ते मेरो धूप तैन कां च़ाढ़ो। ज़ैना खानेरी चीज़ां मीं तीं दित्तोरी थी, मतलब ज़ैन अट्टू, तेल ते माछ़ी अवं तीं खुवातो थियो, तैन सब तीं तैन केरे सामने खुशबूदार केरतां रख्खू; प्रभु यहोवा एन ज़ोते कि एन्ने भोवं। फिरी तीं अपना मट्ठां-कुइयां नेइतां ज़ैना तीं मेरे लेई ज़आं, तैन मूरतन कां बलिदान केरतां च़ाढ़ां। कुन तेरो व्यभिचार एत्री निकड़ी गल थी; कि तीं मेरे बाल बच्चे तैन मूरतन कां अग्गी मां च़ैढ़तां बलि कियोरेन? तीं अपने सेभी भिट्टे कम्मन मां ते व्यभिचार केरते तीं अपने बचपनेरे दिहाड़न मां कधे खियाल नईं कियोरो, ज़ैखन तू नग्गी अपने खूने सेइं भेरतां ड्लेडती थी।
यरूशलेमेरी ज़िन्दगी एक्की वेश्यारी ज़ेरि
“तेरी तैस सेभी बुरैइारे बाद कुन भोवं, प्रभु यहोवा एन ज़ोते अफ़सोस, तीं पुड़ अफ़सोस! तीं अपने लेई अक गुम्मट बनाव, ते हर एक्की चौवके मां तीं अक उच्ची ठार बनाई; ते हर एक्की सड़करे ड्लेखी भी तीं एपनी उच्ची ठारां बनावेइतां तीं अपनि खूबसूरती अशुद्ध की, ते हर अक मुसाफर कुकर्म केरनेरे लेई कुजेइतां महा व्यभिचारिणी भोइ जेई। तीं अपने पड़ोसी मिस्री लोकन सेइं भी, ज़ैना हट्टे-कट्टे थिये व्यभिचार कियो; ते मीं सरकानेरे लेई अपनो व्यभिचार बद्धाती जेई। एल्हेरेलेइ मीं अपनो हथ तेरे खलाफ खड़ो केरतां, तेरे रोज़ेरी रोट्टी घटावरीए; ते तेरी दुश्मन पलिश्ती कौन्शां ज़ैना तेरे महापापे करां शरमैती थी, तैन केरि इच्छाई पुड़ मीं तू छ़डोरिस। फिर भी तेरी केंयां न रज़्ज़ी, फिर भी तीं अश्शूरी लोकन सेइं व्यभिचार कियो; ते तैन सेइं भी व्यभिचार केरतां न रज़्ज़ी। फिर भी तू लेन-देनेरे मुल्खे मां व्यभिचार केरते-केरते कसदी लोकां केरे मुल्खे तगर पुज़्ज़ी, ते तैड़ी भी तू न रज़्ज़ी।
“प्रभु यहोवा एन ज़ोते कि तेरो दिल केत्रो चंचले, कि तू एना सारां कम्मां केरतिस, ज़ैना एक्की बेशर्म वेश्या कौन्शरां कम्मां आन? तीं हर एक्की सड़करे ड्लेखी पुड़ ज़ैन अपनु गुम्मट, ते हर एक्की चौवके मां तीं अपनि उच्ची ठार बनेवरीए, कुन एस्से सेइं तू अक वेश्या कौन्श न ठहरी? किजोकि तू एरी कमैई पुड़ हसतिस। तू व्यभिचारिणी कौन्श आस। तू बखले मड़दन अपने मुन्शेरे बदले कबूल केरतिस। सेभी वेश्या कौन्शन रुपेइयो मैलते, पन तीं अपने सेभी दोस्तन अपने रुपेइये देइतां ते तैन लालच़ देइतां कुजेवरेन कि तैना च़ेवरे पासना एइतां तीं सेइं व्यभिचार केरन। एल्हेरेलेइ तेरो व्यभिचार बाकी व्यभिचार केरनेबालन करां उलटोए। तीं पत्ती कोई व्यभिचारी न च़ले, ते तू कोन्ची करां रुपेइये न नेस, ते बल्के तू एप्पु रुपेइये देतिस; एल्हेरेलेइ तू उलटी ठहरी।
यरूशलेम नगरे परमेशरेरी सज़ाह
“एल्हेरेलेइ हे वेश्या, यहोवारू वचन शुन, प्रभु यहोवा एन ज़ोते; तू ज़ै व्यभिचारे मां एत्री बेशर्म भोइतां, तीं अपनि सारी जान अपने दोस्तन हिराई, ते अपने मूरतन सेइं भिट्टां कम्मां कियां, ते अपने बच्चां केरि बलि च़ाढ़ी, एल्हेरेलेइ, अवं तेरे सब दोस्तन ज़ैना तेरे ट्लारे आन ते ज़ेत्रन सेइं तीं प्यार कियोरोए, ते ज़ेत्रन सेइं तीं बैर रख्खो, तैन सेभन च़ेवरे पासना तेरे खलाफ अकोट्ठे केरतां तेरी जान नग्गी केरतां हरेइलो, ते तैना तेरी नग्गी जानी हेरेले। तैखन अवं तीं एरी सज़ाह देइलो, ज़ेरि व्यभिचार केरनेबैली कौन्शन ते खून केरनेबैली कौन्शन दित्ती गातीए; ते क्रोधे सेइं ते जलनी सेइं तेरो खून बगेइलो। एस तरीके सेइं अवं तीं तैन केरे कब्ज़े मां केरि देइलो, ते तैना तेरे गुम्मटे बिछ़ोड़ी छ़डेले, ते तेरी उच्ची ठारां ट्लोड़ी छ़डेले; तैना तेरां लिगड़ां ज़बरदस्ती खोलेले, ते तेरे कीमती गाने थुसोड़तां नेले, ते तीं नग्गे केरतां छ़डेले। तैखन तैना तेरे खलाफ अक टोली अकोट्ठी केरतां तीं पुड़ घोड़ेईं बाहेले, ते एपनी तलवारन सेइं तेरे टुक्ड़े-टुक्ड़े केरतां छ़डेले। तैखन तैना अग लेइतां तेरे घरन फुकतां छ़डेले, ते तीं बड़े कौन्शां केरे सामने सज़ाह देलो; ते अवं तेरो व्यभिचार बन्द केरेलो, ते तू फिरी वेश्या कम्मेरे लेई रुपेइये न देली। ज़ैखन अवं तीं पुड़ पूरो क्रोध बांदो केरेलो, त तीं पुड़ फिरी न ज़लेलो बल्के शान्त भोल्हो, ते फिरी क्रोध न केरेलो। तीं ज़ैना अपने बचपनेरे दिहाड़े याद नईं रखोरे, बल्के तैन सेभी गल्लां केरे वजाई सेइं तीं मेरो क्रोध भड़कव; एल्हेरेलेइ अवं तेरे बुरे कम्मां केरि सज़ाह देइलो, ते तू अपने सेभी पेत्रीं कम्मन करां जादे महापाप न केरेली, प्रभु यहोवा एन ज़ोते।
ज़ेरि अम्मा ते तेरही कुई
“हेर, सब कहावत ज़ोनेबाले तेरे बारे मां ई कहावत ज़ोले, ‘ज़ेरि अम्मा तेरही कुई।’ तेरी अम्मा ज़ै अपने मुन्शे ते अपने बच्चन सेइं नफरत केरती थी, तू भी ठीक तैसारी कुई भोइ; ते तेरी बेइनां ज़ैना अपने-अपने मुन्शे सेइं ते अपने बच्चन सेइं नफरत केरती थी, तू भी ठीक तैन्ना केरि बेइन निस्सी, तेरी अम्मा हित्ती थी ते बाजी एमोरी थियो। तेरी बड्डी बेइन सामरियाए, ज़ै एपनी कुइयन समेत तेरे बांए पासे रहतीए, ते तेरी निकड़ी बेइन, ज़ै तेरे देइने पासे रहतीए तै कुइयन समेत सदोमे। तू तैन केरि ज़ेरि चाल न च़ली, ते न तैन केरे भिट्टे कम्मन करां रज़्ज़ी; ऐह त निकड़ी गल भोइ, पन तेरो सारो चाल चलन तैन करां भी जादे बिगड़ी जेव। प्रभु यहोवा एन ज़ोते, मीं अपनि कसम, तेरी बेइन ज़ै सदोमे एपनी कुइयन समेत, तेरे ते तेरी कुइयां केरां ज़ेरां कम्मां न कियां। हेर, तेरी बेइन ज़ै सदोमेरो ऐह पाप थियो, कि तै एपनी कुइयन समेत घमण्ड केरती थी, ते अपनु पेट भेरतां खाती ते सुखे चैनी सेइं रहती थी; तै गरीबां केरि ते ज़रूरतमन्दां केरि देखभाल केरती थी। एल्हेरेलेइ तै घमण्ड केरतां मेरे सामने भिट्टां कम्मां केरने लगी, ते एन हेरतां मीं तैना दूर की। फिरी सामरिया तीं करां जादे पाप न किये, तीं त तैस करां भी जादे भिट्टां कम्मां कियां, ते अपने बड़े भिट्टे कम्मां केरे ज़िरिये अपने बेइन्न करां ज़ीती जेई। एल्हेरेलेइ तीं ज़ै एपनी बेइनां केरो न्याय कियो, एल्हेरेलेइ शरमा, किजोकि तीं तैन करां जादे पाप कियोरेन; एल्हेरेलेइ तैना तीं करां घट दोषी आन। एल्हेरेलेइ तू एस गल्ली करां शरमा ते शरमाती रा, किजोकि तीं एपनी बेइनां घट दोषी ठहरेवरिन।
सदोम ते सामरियारू दुबारां आबाद भोनू
“ज़ैखन अवं तैन मतलब कुइयन समेत सदोम ते सामरिया गुलैमी मरां वापस आनेलो, तैखन तैन मरां तेरे भी गुलाम वापस आनेलो, ज़ैस सेइं तू शरमाती रास, ते अपना सब कम्मां हेरतां तू शरमास, किजोकि तू तैन केरे शैन्तरी वजा भोवरिस। तेरी बेइनां सदोम ते सामरिया एपनी-एपनी कुइयन समेत एपनी पेइली हालती मां फिरी पुज़ेली ते तू भी एपनी कुइयन समेत एपनी पेइली हालती मां फिरी पुज़ेली। ज़ांतगर तेरी बुराई बांदी न थी भोवरी, मतलब ज़ैस वक्ते तगर तू आसे-पासेरे लोकन समेत अरामी ते पलिश्ती कौन्शां ज़ैना हुन्ना तगर तीं च़ेवरे पासना घटिया सेमझ़ती थी, ते तेरी निन्दा केरती थी, तैन अपने घमण्डेरे दिहाड़न मां तू एपनी बेइन सदोमेरू नवं भी न थी घिन्ती। पन हुन्ना तीं अपने महापाप ते भिट्टे कम्मां केरो भार एप्पु छ़ूनो पेवरोए, यहोवा एन ज़ोते।
अक करार ज़ै हमेशा तगर रालो
“प्रभु यहोवा एन ज़ोते; अवं तीं सेइं एरहो बर्ताव केरेलो, ज़ेरो तीं कियोरोए, किजोकि तीं करार ट्लोड़तां कसम घटिया समझ़ोरीए, फिरी भी अवं तेरे बचपनेरे दिहाड़ां केरो करार याद केरेलो, ते तीं सेइं हमेशारो करार केरेलो। ज़ैखन तू एपनी बेइन्न मतलब एपनी बेड्डी ते निकड़ी बेइन्न कबूल केरस, तैखन तू अपनो चाल चलन याद केरतां शरमिन्दा भोल्ही; ते अवं तैन तेरी कुइयां ठहरालो; पन एन तेरे करारे मुताबिक न केरेलो।2 अवं तीं सेइं अपनो करार कायम केरेलो, तैखन तीं पतो लग्गेलो कि अवं यहोवा आईं,3 तैन तू याद केरतां शरमिन्दा भोस, ते शरमरे मारे फिरी कधे आशी न खोलेली। एन तैस मौके भोल्हु, ज़ैखन अवं तेरे सेभी कम्मन पुड़ पड़दो छ़डेलो, प्रभु यहोवा एन ज़ोते।”4
Source notes (4)
- Footnote व्यभिचार मतलब मूरती केरि पूज़ा की।
- Cross-reference रोम. 6:21.
- Cross-reference यहे. 37:26.
- Cross-reference भज. 78:38.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.