Bhadrawahi Bible
यहेजकेल 1
परमेशर यहेजकेले कुजाते
अवं यहेजकेल याजक बूजी एरू मट्ठू मेरे उमरारे ट्लियोवं सालेरे च़ेवरोवं महीनेरे पंच़ोंव दिहाड़े, ज़ैखन कैदन सेइं साथी कबार दरियारे बन्ने पुड़ कैदी थियो, तैखन सुर्ग खुल्ली जेव, ते मीं परमेशरेरां दर्शनां मैल्हां। इन तैखन भोवं ज़ैखन यहूदा प्रदेशेरे यहोयाकीन राज़ेरे कैदी भोनेरे पंच़ोंव सालेरे च़ेवरोवं महीनेरे पंच़ोंव दिहाड़े, कसदी लोकां केरे बाबेल मुल्खे मां कबार दरियारे बन्ने पुड़, यहोवाए मीं सेइं ज़ोवं, ते यहोवारी शक्ति मीं पुड़ अई।
यहोवारू रथ ते तैसेरो तखत
दर्शने मां मीं हेरू कि उत्तेरे पासेरां बड़ी बिदलार, ते चमकती अग्गी सेइं साथी बड़ी आँधी एवरीए। ते बिदलारा च़ेवरे पासन लौ ते अग्गरे मझ़ाटे चमकते पितलरू ज़ेरू किछ लेइहोते। फिरी अग्गरे मझ़ाटेरां च़ेवर जानदारां केरे ज़ेरे कोई निस्से। तैना मैन्हेरे ज़ेरे लेइहोते थिये, पन तैन सेभी केरां च़ेवर-च़ेवर तुत्तरां ते च़ेवर-च़ेवर फंघां थियां। तैन केरे पव सिद्धे थिये, ते तैन केरे पव्वां केरे तले बछ़ड़ां केरे रौन्ना केरे ज़ेरे थिये। ते तैना चमकावरे पितलरे ज़ेरे चमकते थिये। तैन जानदारां केरे च़ेवरे पासन फंघन हैठ मैन्हु केरे ज़ेरे हथ थिये। तैन च़ेवरां केरां तुत्तरां ते फंघां एन्च़रां थियां: तैन केरां फंघां एक्की होरि केरे फंघन सेइं मिलोरां थियां। तैना अपने-अपने सामने सिद्धे च़ेलतां मुड़ते न थिये। तैन केरां तुत्तरां सामनेरां मैन्हु केरां ज़ेरां थियां। ते तैन च़ेवरां केरे देइने पासेरां तुत्तरां शेरेरां ज़ेरां थियां, बांए पासेरां तुत्तरां दांतेरां ज़ेरां थियां, ते पेत्रीं पासेरां तुत्तरां उकाब च़ुड़ोलोवेरां ज़ेरां थियां।1 तैन केरां तुत्तरां एरां थियां, ते फंघां बेइयें पासेरां अलग-अलग थियां। सेभी जानदारां केरां दूई-दूई फंघां थियां, ज़ैना एक्की होरेरे फंघन सेइं मिलोरां थियां, ते दूई-दूई फंघन सेइं तैन केरि जान ढकोरी थी। तैना सिद्धे अपने-अपने सामने च़लते थिये; ज़ेरहां आत्मा2 गानी चाती थी, तैना तरहां गाते थिये, ते तैना च़लते वक्त मुड़ते न थिये। जानदार मूरां ते बेलति मसालां केरे ज़ेरे लेइहोते थिये। ते तै अग जानदारां केरे दरमियान इरां-उरां च़लती फिरती बड़ी लौ देती राई। ते तैस अग्गी मरां बिजली निसती थी।3 जानदारां केरू च़लनू फिरनू बिजलरू ज़ेरू थियूं।
ज़ैखन अवं जानदारन हेरने लगोरो थियो, त कुन हेरताईं कि ज़मीनी पुड़ तैन कां च़ेवरे तुत्तरां केरे गिनतरे मुताबिक, अक-अक पेइहो थियो। पेइहां केरि शकल ते बनावट फीरोज़ेरी ज़ेरी थी, ते च़ेवरां केरि अक्कां ज़ेरि शकल थी। ते तैन केरि शकल ते बनावट एरी थी ज़ेन्च़रे एक्की पेइहे मां होरो पेइहो भोए। च़लते वक्त तैना अपने च़ेवरे पासां केरे कोन्ची भी पासे च़ेलि सकते थिये, ते च़लते वक्त मुड़ते न थिये। तैन च़ेवरे पेइहां केरे घेरे बड़े बड्डे ते डराने बाले थिये। तैन केरे घेरन मां च़ेवरे पासन एछ़्छ़ी ही एछ़्छ़ी भेरतां थी। ज़ैखन जानदार च़लते थिये, तैखन पेइहे भी तैन सेइं साथी च़लते थिये। ते ज़ैखन जानदार ज़मीनी पुड़ेरां खड़े भोते थिये, तैखन पेइहे भी खड़े भोते थिये। ज़ेरहां आत्मा गानी चाती थी, तेरहां तैना गाते, ते पेइहे जानदारन सेइं साथी उठते थिये। किजोकि तैन केरि आत्मा पेइहन मां थी। ज़ैखन जानदार च़लते थिये तैखन पेइहे भी च़लते थिये। ते ज़ैखन-ज़ैखन जानदार खड़े भोते थिये तैखन पेइहे भी खड़े भोते थिये। ते ज़ैखन तैना ज़मीनी पुड़ां खड़े भोते थिये तैखन पेइहे भी तैन सेइं साथी खड़े भोते थिये। किजोकि जानदारां केरि आत्मा पेइहन मां थी।
दिव्य महिमारू दर्शन
जानदारां केरे क्रोड़न पुड़ आकाशमण्लेरू ज़ेरू किछ थियूं ज़ैन हिंवेरू ज़ेरू भयानक चमकतू थियूं, ते तैन, तैन केरे क्रोड़न पुड़ फैलोरू थियूं। आकाशमण्डले हैठ, तैन केरां फंघां एक्की होरेरे पासे सिद्धां फैलोरां थियां। ते सब जानदारां केरां दूई-दूई होरां फंघां थियां ज़ैन सेइं तैन केरि जान ढकोरी थी। तैन केरे च़लते बार तैन केरे फंघां केरि आवाज़ मीं बड़े पैनेरी, या सर्वशक्तिमान परमेशरेरी आवाज़, या सेनारे हलचल केरनेरी ज़ेरि शुनोती थी। ते ज़ैखन तैना खड़े भोते थिये, तैखन अपना फंघां लटकाते थिये। पन तैन केरे क्रोड़न पुड़ ज़ैन आकाशमण्डल थियूं, तैस पुड़ां अक शब्द शुनोतो थियो; ते ज़ैखन तैना खड़े भोते थिये, तैखन अपना फंघां लटकाते थिये।
ज़ैन आकाशमण्डल तैन केरे क्रोड़न पुड़ थियूं, तैस पुड़ ज़ेन्च़रे किछ नीलमरो बनोरो तखत थियो; इस तखते पुड़ मैन्हेरो ज़ेरो कोई लेइहोतो थियो। तैसेरे कमरी करां बाह ज़ेन्च़रे मीं चमकती पितलरू ज़ेरू लेइहोव, ते तैस अन्तर अग ते च़ेवरे पासन अग ज़ेरि लेइहोती थी; फिरी तैस मैन्हेरे कमरी करां बुन मीं किछ अग ज़ेरि लेइहोती थी। ते तैसेरे च़ेवरे पासन लौ थी। ज़ेन्च़रे झ़ेड़रे दिहाड़े बिदलारी मां धनुष लेइहोते, तेन्च़रे च़ेवरे पासन लौ लेइहोती थी।
यहोवारे महिमारू रूप एरू थियूं। ते तैस हेरतां, अवं तुत्तरेरे भारे झुको, तैखन मीं अक आवाज़ शुनी ज़ेन्च़रे कोई गल्लां केरते।
Source notes (3)
- Cross-reference प्रका. 4:7.
- Footnote आत्मा इसेरो मतलब हवा भी आहे।
- Cross-reference प्रका. 4:5;11:1.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.