Bhadrawahi Bible
निर्गमन 36
“बसलेल ते ओहोलीआब ते सब अक्लमन्द ज़ैन यहोवाए अक्ल ते समझ़ दित्तोरी थी, कि तैना यहोवारे सारे हुक्मां केरे मुताबिक पवित्र सेवारे लेई हर किसमेरू कम केरनू ज़ानन, तैना सब इन कम केरन।”
लोक मगने करां जादे देतन
तैखन मूसे बसलेल ते ओहोलीआब ते सब अक्लमन्दन जो ज़ैन केरे दिले मां यहोवारी अक्ली सेइं भरोरे थिये, मतलब ज़ैस-ज़ैस नेड़े एइतां कम केरनेरो जोश थियो तैना सब कुजाए। ते इस्राएली लोकेईं ज़ै-ज़ै च़ढ़तल पवित्र ठारारे सेवारे कम्मेरे ते तैसेरे बनानेरे लेई आनोरी थी, तैना सब चीज़ां तैन मैन्हेइं मूसे करां नी। फिरी भी लोक रोज़ झ़ेझ़ां तैस कां च़ढ़तल अपने मेर्ज़ी सेइं आनते राए; ते ज़ेत्रे अक्लमन्द मैन्हु पवित्र ठारारू कम केरते थिये तैना सब अपनु-अपनु कम शैरतां मूसे कां आए, ते मूसे सेइं ज़ोने लगे, “ज़ैन कम केरनेरो हुक्म यहोवाए असन दित्तोरोए तैसेरेलेइ ज़ेत्रू लोड़े तैस करां जादे तैनेईं आनोरूए।” तैखन मूसे सारे डेरन मां इस हुक्मेरे बारे मां प्रचार कियो, “कुन मड़द, कुन कौन्शां, कोई पवित्र ठारारे लेई च़ढ़तल न आने।” एन्च़रां सेइं लोक होरि च़ढ़तल आन्ने करां रोके। किजोकि सब किछ बनानेरे लेई ज़ेत्रू सामान ज़रूरी थियूं तेत्रू बल्के तैस करां जादे बनानेबालन कां पुज़ोरू थियूं।
रानेरी ठार बनानी
ते कम केरनेबाले ज़ेत्रे अक्लमन्द थिये तैनेईं तेम्बेरे लेई सूक्ष्म सनेरे कपड़े, ते नीले, बैंगनी ते लाल रंगेरे कपड़ेरे दश पड़दे बुनोरे करूबन सने बनाए। हर एक्की पड़देरी लम्बाई 28 हथ ते चौड़ाई च़ेवर हथ थी; तैना सब पड़दे एक्की नापरे थिये। तैने पंच़ पड़दे एक्की होरि सेइं ज़ोड़ी छ़डे, ते फिरी होरे पंच़ पड़दे भी एक्की होरि सेइं जोड़े। ते ज़ैड़ी इना पड़दे जोड़े जे तैट्ठेरे दूईये पासन पुड़ तैनी नीले-नीले फंदे लाए। तैनी दूईये पासन पुड़ 50-50 फंदे एन्च़रां लाए कि तैना एक्की होरेरे सामने थिये। ते तैने सोन्नेरे 50 कुन्डे बनाए, ते तैन केरे ज़िरिये पड़दे एक्की होरि सेइं जोड़े कि तेम्बु मिलेइतां अक भोइ जेव।
फिरी तैनी छ़ेल्ली केरि ज़ड़ां केरे 11 पड़दे बनाए ताके तैस तेम्बेरे बेइयें पासे लाए गान। हर एक्की पड़देरी लमबाई 30 हथ ते चौड़ाई च़ेवर हथ भोए; ते यारहे पड़दे एक्की नापरे थिये। इन मरां तैने पंच़ पड़दे अलग ते शा पड़दे अलग ज़ोड़ी दित्ते। ते ज़ैड़ी दूईये ज़ोड़ेरे थिये तैट्ठेरे कूने मां तैने 50-50 फंदे लाए। ते तैने तेम्बु ज़ोड़नेरे लेई पितलरे 50 कुन्डे भी बनाए ज़ैस सेइं तै अक भोइ जेव। ते तैने तेम्बेरे लेई लाल रंगे सेइं रंगोरी हुड़ां केरि खैड़ेरू अक छ़ूँ ते तैसेरे बेइयें पासेरे लेई समुन्दरेरे बछ़ड़ां केरि खैड़ेरू अक ढकनू बनावाव।
फिरी तैनी रानेरी ठारी जो किकरेरी लेकड़रे तखते खड़े रानेरे लेई बनाए। हर एक्की तखतेरी लम्बाई 10 हथ ते चौड़ाई डैढ हथ थी। हर एक्की तखते मां होरी सेइं ज़ोड़नेरी दूई-दूई चूलां बनेई, मिलापे बाले तेम्बेरे सब तखतां केरे लेई तैनी इस तरीके सेइं बनावं। ते तैनी मिलापे बाले तेम्बेरे लेई तखते इस तरीके सेइं बनवाए कि दक्षिणेरे पासे 20 तखते लग्गन। ते इन 20 तखतन हैठ चैंदरी 40 कुर्सी, मतलब हर एक्की तखते हैठ तैसेरी दूईये चूलां केरे लेई तैनी दूई कुर्सी बनेइं। ते मिलापे बाले तेम्बेरे होरि पासे, मतलब उत्तरेरे पासे भी तैने 20 तखते बनाए। ते इन केरे लेई भी तैने चैंदरी 40 कुर्सी, मतलब हर एक्की तखते हैठ दूई-दूई कुर्सी बनेई। ते मिलापे बाले तेम्बेरे पेत्रीं पासे, मतलब पश्चिमेरे पासेरे लेई तैनी शा तखते बनाए। ते पेत्रीएं हिस्से मां मिलापे बाले तेम्बेरे कूनां केरे लेई तैनी दूई तखते बनाए। ते तैना बुना दूई-दूई हिस्से बने दूईये हिस्से बेइयें पासे तगर एक्की कड़े सेइं मिलाए; तैनी तैन दूईये तखतां केरि अक्के शकल बनाई। एन्च़रां अठ तखते भोइ जे ते तैन केरि चैंदरी 16 कुर्सी भोइ, मतलब हर एक्की तखते हैठ दूई-दूई कुर्सी भोइ।
फिरी तैने किकरेरी लेकड़री लरां बनेई, मतलब मिलापे बाले तेम्बेरे लेई एक्की पासेरे तखतां केरे लेई पंच़ लरां, ते मिलापे बाले तेम्बेरे होरि पासे तखतां केरे लेई पंच़ लरां, ते मिलापे बाले तेम्बेरो ज़ै पासो उतरेरे पासेरे पेत्रीएं हिस्से मां थियो तैसेरे लेई भी पंच़ लरां बनेई। ते तैने मझ़ेटीं लरां तखतां केरे मझ़ाटे तेम्बेरे एक्की पासेरां होरि सिरे तगर पुज़नेरे लेई बनावाए। ते तखते तैनी सोन्ने सेइं मढ़े, ते लरां केरे घरेरू कम देनेबाले कड़े सोन्नेरे बनाए, ते लरां भी सोन्ने सेइं मेढ़ी।
फिरी तैनी नीले, बैंगनी ते लाल रंगोरे कपड़ेरो, ते बट्टोरी सूक्ष्मरो कपड़ो मझ़ेटियों पड़दो बनावेइतां; तै कढ़ाईयरे कम्मेरे लेई करूबन सेइं साथी बनाव। ते तैनी तैसेरेलेइ किकरेरे च़ेवर खम्भे बनाए, ते तैना सोन्ने सेइं मढ़े; तैन केरे कुन्डे सोन्नेरे बनाए, ते तैना तैन केरे लेई चैंदरी च़ेवर कुर्सी बनेई। तैनी तेम्बेरे दारे पुड़ भी नीले, बैंगनी ते लाल रंगेरो कपड़ो ते बट्टोरी सूक्ष्म सनेरे कढ़ाईयरू कम केरतां पड़दो बनाव। ते तैने कुन्डे सने तैसेरे पंच़ खम्भे भी बनाए, ते तैन केरे च़ोटन ते ज़ोड़नेरे डण्डे भी सोन्ने सेइं मढ़े, ते तैन केरि पंच़ कुर्सी पितलरी बनेई।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.