Bhadrawahi Bible
निर्गमन 35
आरामेरे दिहैड़रे नियम
मूसे इस्राएली लोकां केरि सारी मण्डली अकोट्ठी केरतां तैन सेइं ज़ोवं, “ज़ैन कम्मां केरनेरो हुक्म यहोवाए दित्तोरोए तैना इन्ना आन। हर हफते शा दिहाड़े त कम-काज़ कियूं गाए, पन सत्तोवं दिहाड़ी तुश्शे लेई पवित्र ते यहोवारे लेई पवित्र थैकरी दिहाड़ीए, तैस मां ज़ै कोई कम-काज़ केरे तै मारो गालो; बल्के थैकरे दिहाड़े तुस अपने-अपने घरन मां अग भी न बैलथ।”
पवित्र तेम्बेरे लेई भेंट
फिरी मूसे इस्राएली केरे सारे मेण्डली सेइं ज़ोवं, “यहोवाए ज़ै हुक्म दित्तोरोए तै ईए। तुसन कां ज़ैन भी आहे तैस मरां यहोवारे लेई च़ढ़तल आनी गाए, मतलब ज़ेत्रे एपनी मेर्ज़ी सेइं देनू चान ते यहोवारे लेई च़ढ़तल केरतां इना चीज़ां घिन्तां एज्जन, मतलब सोन्नू, रुपेइये, पितल; नीले, बैंगनी, ते लाल रंगेरो कपड़ो, सूक्ष्म सनेरां बनेवरां लिगड़ां ते छ़ेल्ली केरि ज़ड़ां, लाल रंगे सेइं रंगोरी हुड़ां केरि खाड़ी, समुन्दरी बछ़ड़ां केरि खेड़ि, ते किकरेरी लकड़ी, लौ देनेरे लेई ज़ैतूनेरो तेल, अभिषेकेरो तेल, ते धूपेरे लेई खुशबूदार चीज़ां। फिरी एपोद ते चपरासेरे लेई सुलैमानी मणि ते पलैटनेरे लेई मणि।
“तुसन मरां ज़ेत्रे कम्मां केरे कारीगिरन तैना सब एइतां ज़ैन-ज़ैन चीज़ां केरो हुक्म यहोवाए दित्तोरोए तैना सब बनान। मतलब तेम्बु, ते ढकने समेत मिलापे बालो तेम्बु, ते तैसेरी घुंडी, तखते, लरां खम्भे ते कुर्सी; फिरी डण्डन समेत सन्दूख, ते प्रायश्चितेरू ढकनू, ते मझ़ेटियों पड़दो; डण्डन ते सब सामाने समेत मेज़, ते च़ैढ़ोरी रोट्टी; सामान ते दीयन समेत लौ देनेबालो दीवट, ते लौ देनेरे लेई तेल; डण्डन समेत धूपेरी वेदी, अभिषेकेरो तेल, खुशबूदार धूप, ते मिलापे बाले तेम्बेरे दारेरो पड़दो; पितलरी झंझरी, डण्डे ते होरी सारे सामाने समेत होमवेदी, पेइड़न समेत हौदी। खम्भे ते तैन केरि कुर्सी समेत अंगनेरे पड़दे, ते अंगनेरे दारेरे पड़दे। मिलापे बाले तेम्बेरे ते अंगन दूईयां केरे खुन्डे ते डोरी; पवित्र ठारी मां सेवा केरनेरे लेई बुनोरां लिगड़ां, ते याजकेरू कम केरनेरे लेई हारून याजकेरां लिगड़ां ते तैसेरे मट्ठां केरां लिगड़ां भी।”
लोक च़ढ़तल आनतन
तैखन इस्राएली लोकां केरि सारी मण्डली मूसेरे सामनेरां वापस जेई। ते ज़ेत्रन जोश भोव, ते ज़ेत्रां केरे मने मां एरी इच्छा पैदा भोवरी थी, तैना मिलापे बाले तेम्बेरू कम केरने ते तैसेरी सारी सेवकाई ते पवित्र लिगड़ां बनानेरे लेई यहोवा जो च़ढ़तल अन्ने लग्गे। कुन कौन्शां, कुन मड़द, ज़ेत्रां केरे मने मां एरी इच्छा पैदा भोवरी थी तैना सब जुगनू, नथनी, मुंदरी, ते कड़े सोन्नेरे गेहने आन्ने लग्गे, एन्च़रे सेइं ज़ेत्रे मैन्हु यहोवारे लेई सोन्नेरी च़ढ़तल देनेबाले थिये तैनेईं सब तैन आनू। ते ज़ैस-ज़ैस मड़दे कां नीले, बैंगनी या लाल रंगेरो कपड़ो या सूक्ष्म सनेरो कपड़ो, या छ़ेल्लरी ज़ड़ां, या लाल रंगे सेइं रंगोरी हुड़ां केरि खैड़ी, या समुन्दरी बछ़ड़ां केरि खैड़ी थी तैनेईं तैना एन्हीं। फिरी ज़ेत्रे लोक चाँदी, या पितलरी च़ढ़तल देनेबाले थिये तैनेईं यहोवा परमेशरेरे लेई तेरही च़ढ़तल आनी; ते ज़ैस-ज़ैस कां सेवारे लेई कोन्ची कम्मेरे लेई किकरेरी लकड़ी थी तैनेईं तै आनी। ते ज़ेत्री अक्लमन्द कौन्शां थी तैनेईं अपने हथ्थन सेइं सूट्ल, केत्ती-केत्ती नीले, बैंगनी ते लाल रंगेरू, ते सूक्ष्म सनेरू कत्तोरू सूट्ल आनू। ते ज़ेत्री कौन्शां केरे मने मां एरी अक्लरी लौ थी तैनेईं छ़ेल्ली केरि ज़ड़ां भी केत्ती। ते प्रधान लोक एपोद ते चपरासेरे लेई सुलैमानी मणि, ते लानेरे लेई मणि, ते लौ देनेरे लेई ते अभिषेक ते धूपेरी खुशबूदार चीज़ां ते तेल आनो। ज़ैस-ज़ैस चीज़रो बनानेरो हुक्म यहोवा परमेशरे मूसेरे ज़िरिये दित्तोरो थियो, तैसेरेलेइ ज़ैन किछ ज़रूरी थियूं, तैन सब तैन मड़देइं ते कौन्शेइं एन्ही, ज़ैन केरे दिले मां एरी इच्छा पैदा भोवरी थी। एन्च़रां सेइं इस्राएली लोकेईं यहोवा परमेशरेरे लेई अपने मेर्ज़ी सेइं च़ढ़तल आनी।
पवित्र तेम्बु बनानो
तैखन मूसे इस्राएली लोकन सेइं ज़ोवं, शुना, “यहोवा यहूदारे गोट्ले मरां बसलेले, ज़ैन ऊरी एरू मट्ठू ते हूरेरू पोट्लड़ूए, नवं घिन्तां कुजावरूए। ते तैनी तै परमेशरेरी आत्मा सेइं एन्च़रे भरोरोए कि सब किसमेरी बनावटरे लेई तैस अक्ल समझ़, ते ज्ञान मैल्होरूए। कि तै कारीगिरी सेइं सोन्नू, चाँदी, ते पितली मां, ते लानेरे लेई मणि कटने मां ते लेकड़ी पुड़ नक्काशी केरने मां, बल्के अक्ली सेइं सब किसमेरी केढोरी बनावटी मां कम केरि सके। फिरी यहोवा परमेशरे तैसेरे मने मां ते दानेरे गोट्ले बाले अहीसामाकेरे मट्ठे ओहोलीआबेरे मने मां भी शिक्षा देनेरी शक्ति दित्तोरीए। इन दूईयां केरे दिल यहोवा परमेशरेरी अक्ली सेइं भरोरेन, कि तैना नकश केरने ते बनाने ते नीले, बैंगनी ते लाल रंगेरां लिगड़ां बनाने, ते बुन्ने, बल्के केरां लिगड़ां बनाने ते बुन्ने, बल्के हर किसमेरी बनावटी मां, ते अक्ली सेइं सब कम्मां केरने मां सब किसमेरू कम केरन।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.