Bhadrawahi Bible
निर्गमन 12
फ़सह तिहारेरी हदायतां
फिरी यहोवा मिस्र मुल्खे मां मूसे ते हारूने सेइं ज़ोवं, “ई महीनो तुश्शे लेई शुरुआतरो भोल्हो, ताके सालेरो पेइलो महीनो ईए भोल्हो। तुस इस्राएली लोकां केरि सैरी मेण्डली सेइं एन्च़रे ज़ोथ, इस्से महीनेरे दशोवं दिहाड़े अपने-अपने सियाना केरे घरेरे मुताबिक हर घरेरे लेई अक गबड़ू एन्हतां रखा। ते अगर केन्चरे घरे मां गबड़ू खानेरे लेई मैन्हु घट भोन, त तैना अपने सेब्भन करां नेड़े रानेबाले पुड़ोसन सेइं साथी तैन केरि गिनतरे हिसाबे सेइं अक गबड़ू एन्हतां रखन, फिरी तुस हर एक्केरे खानेरे मुताबिक गबड़ेरो हिसाब केरथ। तुश्शू गबड़ू बगैर नुक्से, ते एक्की सालेरू नर लोड़ते, फिरी चाहे तैन गबड़ू भोए या छ़ेड़ू। फिरी इस महीनेरे च़ेवधोवं दिहाड़े तगर रेखी छ़ेडथ, फिरी तैस दिहाड़ो डुबनेरे मौके इस्राएलेरी सारी मेण्डलरे लोक तैस बलि केरन। तैखन तैना तैसेरे खूने मरां किछ नेइतां ज़ैस घरे मां गबड़ू खाएले, तैन केरे दारेरे दूईये पासन ते दारेरे बेइयें पासे भी खूनेरो निशान लेइयथ। फिरी तैना तैसेरू मास तैस्से राती अग्गी मां ट्लैड़तां अखमीरी रोट्टन, ते नीले शागे सेइं खान। तैसेरी क्रोड़ी ते खुरैड़ू ते आंट्लन सने अग्गी मां ट्लैड़तां खेइयथ, कच़्च़ू या पानी छ़ेडतां किछ भी बनेइतां न खेइयथ। ते तैस मरां झ़ेझ़ां जो किछ भी न रेखथ, ते अगर तैस मरां झ़ेझ़ां जो किछ राए भी, त तैस अग्गी मां फुक्की छ़ेडथ। ते तैसेरे खानेरो ईए तरीकोए, कि मझ़ बेन्धतां, ते हथ्थे मां सोटी ट्लेइतां ते पव्वन मां जुट्टी लेइतां तैस जल्दी खेइयथ1, तैन त यहोवारू फ़सह तिहार2 भोल्हु। किजोकि तैस राती अवं मिस्र मुल्खे मांमेइं निस्तां गानोईं, ते मिस्र मुल्खेरे कुन मैन्हु कुन जानबर, सेब्भी केरे ज़ेठे मारनेन, ते मिस्र मुल्खेरे सैरी देबतन 3भी सज़ाह देनीए, कि अवं यहोवा आईं। ते ज़ैस घरे मां तुस राले तैन पुड़ तै खून तुश्शे लेई निशान भोल्हो, मतलब, अवं तैस खूने हेरतां तुसन छ़ेडी देलो, फिरी ज़ैखन अवं मिस्र मुल्खेरे लोकन मारेलो, तैखन तै आफत तुसन पुड़ न पेली, ते तुस नाश नईं भोने। ते तै दिहाड़ी तुश्शे लेई यादगार भोल्ही, ते तुस तैस यहोवारे लेई तिहार सेमझ़तां मेन्नथ, तै दिहाड़ी तुश्शी पीढ़न मां हमेशारी विधि सेमझ़तां तिहार मनाव गालू।”
अखमीरी रोट्टी
“सत दिहाड़न तगर अखमीरी रोट्टी खेइयथ, तैन मरां पेइले दिहाड़े अपने-अपने घरन मरां खमीर केढी छ़ेडथ, अगर ज़ै कोई पेइले दिहाड़े करां सत्तोवं दिहाड़े तगर खमीरी चीज़ खालो तै मैन्हु इस्राएली लोकन मरां कढो गाए। तिहारेरे पेइले दिहाड़े भी यहोवारे लेई अक पवित्र सभा केरथ; ते सत्तोवं दिहाड़े भी अक पवित्र सभा रेखथ, तैन दूईये दिहाड़न मां होरू कोई कम न केरथ, लोकां केरे लेई रोट्टी बनानेरे अलावा होरू कोई कम काज़ न केरथ, सिर्फ एत्रू कम केरि सकतथ। एल्हेरेलेइ लेई तुस बगैर खमीरेरी रोट्टरू तिहार बनेइयथ, किजोकि मीं तैस्से दिहाड़े तुस टोलन मां मिस्र मुल्खे मरां कढोरेथ, एस्से वजाई सेइं तै दिहाड़ी तुश्शी पीढ़ी-पीढ़ी मां हमेशारी विधि सेमझ़तां मनेइयथ। पेइले महीनेरे च़ेवधोवं दिहाड़रे ड्लवझ़ी करां इक्कीहोवं दिहाड़ेरे ड्लवझ़ी तगर अखमीरी रोट्टी खेइयथ। सत दिहाड़न तगर तुश्शे घरन मां कोई भी खमीरी चीज़ न लोड़े, अगर कोई कोन्ची खमीरी चीज़ी खालो तै चाहे मुल्खेरो भोए या परदेशी भोए, तै मैन्हु इस्राएली लोकां केरे मेण्डली मरां कढो गालो। कोई खमीरी चीज़ न खेइयथ, अपने सब घरन मां बगैर खमीरी रोट्टी खेइयथ।”
पेइलू फ़सहेरू तिहार
तैखन मूसे इस्राएलेरे सब बुज़ुर्गन कुजेइतां ज़ोवं, “तुस अपने-अपने कुलेरे मुताबिक अक-अक गबड़ू अलग केरतां रेखथ, ते फ़सह तिहारेरे दिहाड़े तैन बलि केरथ। ते जूफारो अक गुच्छो तैसेरे खूने मां डोबतां तैस दारे पुड़ सामने बाह ते दारेरे दूईये पासन भी लेइयथ, ते झ़ेझ़ां तगर तुसन मरां कोई भी बेइर न निस्से। किजोकि यहोवा मुल्खे मांमेइं निस्तां मिस्री लोकन मारतो गानोए, एल्हेरेलेइ लेई ज़ैड़ी-ज़ैड़ी दारे पुड़ ते दारेरे दूईये पासन तै खूनेरो निशान लेइहोलो, तैड़ी-तैड़ी तै तैस दारे छ़ेडतां अग्रोवं गानोए, ते नाश केरनेबालन तुश्शे घरन मां मारनेरे लेई एजने न देलो। फिरी तुस इस विधि अपने ते अपने खानदाने तगर हमेशारे लेई विधि सेमझ़तां मन्ते रेइयथ। ज़ैखन तुस तैस मुल्खे मां ज़ैस मां यहोवा अपने ज़ोनेरे मुताबिक तुसन दाखल भोने देलो, तैखन इस विधरे मुताबिक कम केरथ। ते ज़ैखन तुश्शे बच्चे तुसन पुछ़न, इस तिहारे सेइं तुश्शो कुन मतलबे? तैखन तुस तैन ई जुवाब देइयथ, ‘यहोवा परमेशरे मिस्री लोकां केरे मारनेरे मौके मिस्रे मां रानेबाले इश्शां इस्राएली केरां घरां केन्च़रे बंच़ेवरां थियां, एस्से वजाई सेइं तैसेरे फ़सह तिहारेरू इन बलिदान कियूं गाते। तैखन लोकेईं झुकतां मथ्थो टेको।’”
ते इस्राएली लोकेईं गेइतां, ज़ै हुक्म यहोवाए मूसे ते हारूने दित्तोरो थियो, तैसेरे मुताबिक कियूं।
दशोवं आफत-ज़ेठां केरि मौत
एरू भोवं कि एध्धी राती यहोवा मिस्र मुल्खे मां तखते पुड़ बिशने बाले फ़िरौने करां गत्ते मां बन्धोरे तगर सेब्भी केरे ज़ेठे नर बच्चे, इड़ी तगर कि जानबरां केरे भी सब ज़ेठे बच्चे मैरी छ़डे। ते फ़िरौन ते तैसेरे सब नौकर राती उठतां बिश्शे, तैखन सारे मिस्र मुल्खे मां ज़ोरे सेइं मातमेरि शौर शुनोने लग्गी, किजोकि मिस्र मुल्खे मां अक भी एरू घर न थियूं, ज़ैस मां कोई मारोरो न भोए। तैखन फ़िरौने रातो रात मूसो ते हारूने कुजेइतां ज़ोवं, “तुस इस्राएली लोक सब मेरे लोकन मरां निस्सी गाथ, ते अपने ज़ोनेरे मुताबिक यहोवारी आराधना केरा। अपने ज़ोनेरे मुताबिक अपने गोरू-गब्बां भी साथी घिन्नी गाथ, ते मीं भी बरकत देइतां गाथ।”
ते मिस्री लोक इस्राएली लोकन पुड़ गानेरो दबाव बनाने लगोरे थिये, तैना ज़ोने लगोरे थिये, “असां त सब मेरि गामेले।” तैखन तैनेईं अपनु सन्नेरू अट्टू बगैर खमीरे कुनेयन समेत लिगड़न मां बेद्धतां अपने-अपने कंधे पुड़ च़लाव। इस्राएली लोकेईं मूसेरे ज़ोनेरे मुताबिक मिस्री कौन्शन करां सोन्ने-चैंदरे गेहने ते लिगड़ां मग्गा। फिरी यहोवा परमेशरे मिस्री लोक अपने लोकन पुड़ महरबान किये, कि तैनेईं ज़ैन-ज़ैन मग्गु तैन सब तैनेईं दित्तू। एस तरीके सेइं इस्राएली लोकेईं मिस्री लोकां केरू धन लुट्टी छ़डू।
इस्राएली लोकां केरो मिस्र मुल्ख शारनो
तैखन इस्राएली लोक रामसेस नगरेरां सफर केरतां सुक्कोत नगरे तगर च़ले, ते तैना बाल-बच्चां केरे अलावा कोई शा लख पैदल च़लनेबाले मड़द थिये। तैना सब मिलतां अक जथो बेनि जे, ते तैनेईं गोरू-गब्बां ते बड़े जानबर भी साथी निये। ते ज़ैन सन्नेरू अट्टू तैनेईं मिस्र मुल्खे मरां साथी आनोरू थियूं तैसेरी तैनेईं खमीरे बगैर रोट्टी बनेई, किजोकि तैना मिस्रे मरां एत्रे लूशी निसोरे थिये कि तैन मौको भी न मैल्हो कि बत्तरे लेई किछ रोट्टी पकेइतां साथी नेन। एस्से वजाई सेइं तैन सन्नेरू अट्टू बगैर खमीरे थियूं।
मिस्रे मां बस्सोरे इस्राएली लोकन 430 साल भोवरे थिये। ते तैना 430 साल पूरे भोने पुड़ ठीक तैस्से दिहाड़े यहोवा परमेशरेरी सारी सेना मिस्र मुल्खे मरां निस्सी जेई। यहोवाए इस्राएली लोक मिस्र मुल्खे मरां केढतां आने, एल्हेरेलेइ तै रात तैन केरि हमेशारे लेई मन्नेरे काबले; ई यहोवारी तै राते ज़ेसेरू पीढ़ी-पीढ़ी तगर मन्नू इस्राएली लोकां केरे लेई ज़रूरीए।
फ़सह तिहारेरी विधि
फिरी यहोवाए मूसे ते हारूने सेइं ज़ोवं, “तिहारेरी विधि ई आए, कि कोई परदेशी तैस मरां न खाए; पन ज़ै केन्चेरो घिन्नोरो नौकर भोल्हो, ते तुसेईं तैसेरो खतनो कियोरो भोल्हो, तै त तैस मरां खेइ सकते। पन किछ दिहाड़े रानेबालो परदेशी ते मज़दूर तैस मरां न खाए। तैसेरू खानू एक्की घरे मां भोए, तुस तैसेरू मास घरे मरां बेइर न नेइयथ; ते बलि देनेरे जानबरेरी कोई हड्डी न ट्लोड़थ तिहार मनानू इस्राएली लोकां केरे मेण्डलरे लेई ज़रूरीए। अगर कोई परदेशी तुसन लोकन साथी रेइतां यहोवारे लेई तिहार मनानू चाहे, त तै अपने तैट्ठेरे सब मड़दां केरो खतनो कराए, तैखन तैना अपने देशी मैन्हु केरे ज़ेरे तैस मनान, पन कोई बगैर खतने बालो तैस मरां न खाए। तुसन मां रानेबाले परदेशी ते देशी मैन्हु दूईयां केरे लेई अक्के कानूने।” ऐह हुक्म ज़ै यहोवाए मूसा ते हारूने दित्तो, तैसेरे मुताबिक सारे इस्राएली लोकेईं कियूं। ते ठीक तैस्से दिहाड़े यहोवा इस्राएली लोक मिस्र मुल्खे मरां टोली-टोली केरतां कढे।
Source notes (3)
- Footnote जल्दी खेइयथ निसनेरे लेई तियारी।
- Footnote फ़सह तिहार इन तियार याद करानेरे लेई मनाव गाती कि नाश केरनेबालो दूत इस्राएली लोकन छुटानेरे लेई जेव।
- Footnote सैरी देबतन अवं साबत केरेलो कि मिस्रेरे सारे देबी-देबते झूठेन।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.