Bhadrawahi Bible
एस्तेर 9
पूरीम नंव्वेरे तिहारेरी दिहाड़ी मनानी
अदार नंव्वेरे बारोवं महीनेरे तेरहोवं दिहाड़े, ज़ैस दिहाड़े क्षयर्ष राज़ेरो हुक्म ते नियम पूरे भोनेबाले थिये, ते यहूदी केरे दुश्मन तैन पुड़ अपनो हथ ज़मानेरी उमीद रखते थिये, पन तैसेरे बदले यहूदी लोक अपने दुश्मन पुड़ भारी भोइ जे। तैस दिहाड़े, यहूदी लोक क्षयर्ष राज़ेरे सेभी सूबन मां ते अपने-अपने नगरन मां अकोट्ठे भोए, कि ज़ै कोई तैन नुकसान पुज़ानेरी कोशिश केरे, तैन पुड़ हथ च़लान। केन्चे तैन केरो सामनो न केरि बटो, किजोकि तैन केरो डर सूबां केरे सेभी लोकां केरे मने मां बेस्सी जेवरो थियो। बल्के सूबां केरे सेभी हाकिमेईं, अधिकैरेईं ते प्रधानेईं ते राज़ेरे अधिकैरेईं यहूदी केरि मद्दत की, किजोकि तैन केरे मने मां मोर्दकैरो डर बेस्सी जेवरो थियो। मोर्दकै त राज़ेरो बड़ो अधिकारी थियो, ते तैसेरी चर्चा सेभी सूबन मां फैली जेवरी थी। बल्के मोर्दकैरी इज़्ज़त बद्धती च़ली जेई। एल्हेरेलेइ यहूदी लोकेईं अपने सारे दुश्मन तलवारी सेइं मैरतां नाश किये, ते अपने दुश्मन्न सेइं एपनी मेर्ज़रे मुताबिक बर्ताव कियो। शूशन क़िले मां यहूदी लोकेईं 500 मैन्हु मारे। तैनेईं पर्शन्दाता, दल्पोन, अस्पाता, पोराता, अदल्या, अरीदाता, पर्मशता, अरीसै, अरीदै ते वैजाता, मतलब हम्मदातारू मट्ठू यहूदी केरो विरोधी हामानेरां दश्शे मट्ठां भी मारां। पन तैन केरू धन न लुट्टू।
तैस दिहाड़े शूशन क़िले मां मारोरे लोकां केरि गिनती राज़े सेइं ज़ोई जेई। तैखन राज़े एस्तेर रैनी सेइं ज़ोवं, “यहूदी लोकेईं शूशन नगरे मां 500 मैन्हु मारोरेन ते हामानेरां दश्शे मट्ठां मारां। फिरी राज़ेरे होरी सूबन मां तैनेईं केत्रे लोक मारोरे भोल्हे! एस करां जादे तेरी कुन बिनतीए? तै भी पूरी की गाली। ते तू होरू कुन मगतिस? तैन भी तीं दित्तू गालू।” एस्तेरां ज़ोवं, “अगर राज़े मन्ज़ूर भोए त शूशन नगरे मां यहूदी लोकन अज़्ज़ेरू ज़ेरू कालां भी एन केरनेरो हुक्म दित्तो गाए, ते हामानेरां दश्शे मट्ठां केरि लाशां खम्भे पुड़ टंगां गान।” राज़े हुक्म दित्तो, “एन्च़रे कियूं गाए।” ऐह हुक्म शूशन क़िले मां दित्तो जेव, ते हामानेरां दश्शे मट्ठां केरि लाशां टेंगी दित्ती। शूशन नगरे मां रानेबाले यहूदी लोकेईं अदार महीनेरे च़ेवधोवं दिहाड़े भी अकोट्ठे भोइतां शूशन नगरे मां 300 मैन्हु मारे, पन धन न लुट्टू।
बाकी सूबन मां यहूदी लोक अकोट्ठे भोइतां अपने-अपने प्राण बच़ानेरे लेई लड़े, ते 75000 दुश्मन मारे ते तैन अपने दुश्मन्न करां आराम मैल्हो। पन तैनेईं तैन केरू धन न लुट्टू। एन अदार महीनेरे तेरहोवं दिहाड़े कियोरू थियूं, ते च़ेवधोवं दिहाड़े तैनेईं आराम केरतां धाम खाई ते आनन्देरी दिहाड़ी मनाई। पन शूशन नगरेरे यहूदी लोकेईं अदार महीनेरे तेरहोवं दिहाड़े, ते तैस्से महीनेरे च़ेवधोवं दिहाड़े भी अकोट्ठे भोए, ते तैस्से महीनेरे परहनोवं दिहाड़े तैनेईं आराम केरतां धाम खाई ते आनन्देरी दिहाड़ी मनाई। एल्हेरेलेइ ज़ैना यहूदी बगैर शहरपनाहरे ड्लाव्वन मां रहते थिये, तैना अदार महीनेरे च़ेवधोवं दिहाड़े आनन्द ते धामी दिहाड़ी ते एप्पु मांमेइं खानेरी चीज़ां भेज़नेरी दिहाड़ी ठहरेइतां मनातन। एन गल्लां केरे बारे मां लिखतां, मोर्दकै क्षयर्ष राज़ेरे सेभी सूबन मां, कुन नेड़े कुन दूर रानेबाले सारे यहूदी लोकन कांजो चिट्ठी भेज़ी, ते ऐह हुक्म दित्तो, कि अदार महीनेरे च़ेवधोवं ते परहनोवं दिहाड़े हर साल खुशरी दिहाड़ी मनान। ज़ैन दिहाड़न मां यहूदी लोकन अपने दुश्मन करां छुटकारो मैल्हो, ते एस महीने मां दुख आनन्दे मां ते मातम खुशी मां बेदलोई जेव, (मन्ते रेइयथ) ते तै धाम ते आनन्द ते एक्की होरी कांजो खाने पीनेरी चीज़ां भेज़ने ते कंगालन दान देनेरे लेई दिहाड़ी मनान।
यहूदी लोकेईं ज़ेन्च़रे शुरू कियोरू थियूं, ते ज़ेन्च़रे मोर्दकै तैन लिखोरू थियूं, तेन्च़रे केरने लगे। किजोकि अगागी हम्मदातारू मट्ठू हामान ज़ै सेभी यहूदी लोकां केरो विरोधी थियो, तैनी यहूदी लोकां केरो नाश केरनेरो इरादो कियोरो थियो, ते तैन मिटानेरे ते नाश केरनेरे लेई पूर मतलब चिट्ठी छ़डोरी थी। पन ज़ैखन राज़े ई पतो लग्गो, तैखन तैनी हुक्म दित्तो ते लिखतां भी दित्तू कि ज़ै बुरो इरादो हामाने यहूदी केरे खलाफ कियोरो थियो, तैस्सेरे दोग्गे पुड़ वापस अव, तैखन तैसेरां मट्ठां केरि लाशां फांसी देनेरे खम्भे पुड़ टेंगी दित्तां। एस वजाई सेइं तैन दिहाड़ां केरू नवं पूरीम रख्खू जेवं। तैस चिट्ठरी सेभी गल्लां केरि वजाई सेइं तैसेरे बारे मां हेरू ते ज़ैन किछ बीतोरू थियूं, तैसेरी वजाई सेइं भी। यहूदी लोकेईं अपने-अपने लेई ते एपनी औलादरे लेई, ते तैन सेभी केरे लेई भी ज़ैना तैन मां मिलोरे थिये ऐह गल ठहराई तैसेरे लिखनेरे मुताबिक हर साल ठहरावरे दूई दिहाड़े एन तिहार मनाते राले। ते पीढ़ी-पीढ़ी ते कुल-कुल ते सूबे-सूबे ते नगरे-नगरे मां ऐनां दिहाड़ी याद की गान ते मनेई गान। ते पूरीम नंव्वेरे दिहाड़ी यहूदी लोकन मां कधे न मिटेली ते तैन केरि याद तैन केरे खानदाने मरां गाती न राली।
फिरी अबीहैलेरी कुई एस्तेर रानी, ते मोर्दकै यहूदी मैन्हें, पूरीम नंव्वेरे बारे मां होरि चिट्ठी बड़े अधिकारे सेइं लिखी। तैसारी नकलां मोर्दकै क्षयर्ष राज़ेरे 127 सूबां केरे सेभी यहूदी लोकन कां शान्ति देने बैली ते सेच़्च़ी गल्लां केरि उमीदी सेइं भेज़ी, कि पूरीम तिहारेरे दिहाड़ां केरे ठहरावरे वक्ते मां मोर्दकै यहूदी मैन्हे ते एस्तेर रैनरे हुक्मेरे मुताबिक, ते ज़ैन यहूदी लोकेईं एपनी औलादरे लेई थापेरू थियूं, तैसेरे मुताबिक भी बरत ते मातम कियो गाए। पूरीम नंव्वेरे दिहाड़ेरे बारे मां ऐह नियम एस्तेर रैनरे हुक्मे सेइं होरो पक्को कियो जेव, ते इसेरे बारे मां किताबी मां लिखू।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.