Bhadrawahi Bible
एस्तेर 5
एस्तेरारी धाम
बरतेरे ट्लेइयोवं दिहाड़े एस्तेर अपनो शाही लबास लेइतां राज़ेरे मेहलेरे अन्तर अंगने मां गेइतां राज़ेरे तखतेरे सामने खड़ी भोइ, राज़ो त मेहले मां तखते पुड़ बिशोरो थियो। ते ज़ैखन राज़े एस्तेर रानी अपने अंगने मां खड़ी लाही, तैखन तै बड़ो खुश भोव, ते तैनी अपने सोन्नेरी सोटी ज़ै तैसेरे हथ्थे मां थी, तैसारे पासे रखी। तैखन एस्तेरां नेड़े गेइतां तैस सोटरो बुनियों पासो ट्लाव। तैखन राज़े तैस पुछ़ू, “हे एस्तेर रानी, तीं कुन लोड़ते? ते तू कुन मगतिस? तू मग ते तीं अवं अधे राज़े तगर देइलो।” एस्तेरां जुवाब दित्ती, “अगर राज़े मन्ज़ूर भोए, त हामान साथी एन्हतां तैस धामी मां एज्जे, ज़ै मीं राज़ेरे लेई तियार कियोरीए।” तैखन राज़े हुक्म दित्तो, “हामाने लूशी आनां, कि एस्तेरारे ज़ोनेरे मुताबिक असां तैस धामी मां शामल भोम।” ते राज़ो ते हामान एस्तेरारे तियार कियोरी धामी मां आए। धामी मां ज़ैखन तैना शराब पीते थिये, तैखन राज़े एस्तेरी पुछ़ू, “तेरी कुन बिनतीए? ज़ै पूरी की गाए। ते तू कुन मगतिस? मग, ते तीं अवं अधे राज़े तगर देइलो।” एस्तेरां जुवाब दित्तो, “मेरी बिनती ते ज़ैन अवं मगतीं, तैन इने, कि अगर राज़ो मीं पुड़ खुशे त मेरी बिनती शुन्नी ते ज़ैन वरदान अवं मगतीं तैन देनू राज़े मन्ज़ूर भोए, त कालां राज़ो ते हामान तैस धामी मां एज्जन ज़ैस अवं तुश्शे लेई केरेली, ते कालां अवं राज़ेरे इस ज़ोनेरे मुताबिक केरेली।” तैस दिहाड़े हामान मघन ते मने मां खुशी भोइतां बेइरोवं निस्सो। पन ज़ैखन तैनी मोर्दकै मेहलेरे फाटके पुड़ खड़ो लाव, कि तै तैसेरे सामने न खड़ो भोव ते न हटो, तैखन तै मोर्दकैरे खलाफ क्रोधे सेइं भेरोई जेव। पन हामाने अपनो आप रोको ते च़ुपच़ारे अपने घरे जो च़लो जेव। ते तैनी अपने दोस्त ते अपनि कौन्श जेरेश कुजाई। तैखन हामाने तैन सेइं अपने धनेरे वैभव, ते अपने बाल बच्चां केरे बड़े जादे भोनेरे बारे मां ते राज़े तै केन्च़रे अग्रोवं बधव, ते सब हाकिमन ते अपने सब अधिकैरन करां उच्चो दर्जो दित्तोरो थियो, इन सेभी केरे बारे मां बियान कियूं। हामाने एन भी ज़ोवं, “एस्तेर रैनां मेरे अलावा होरो कोई राज़े सेइं साथी एपनी धामी मां नईं कुजेवरो। ते तैसां कालां भी अवें राज़े सेइं साथी धामी मां कुजेवरोईं। फिरी भी ज़ैखन-ज़ैखन मीं तै यहूदी मोर्दकै मेहलेरे फाटके पुड़ बिशोरो लेइहोते, त तैखन-तैखन मीं एपनी नज़री मां एन सब बेकार लगते।” हामानेरी कौन्श जेरेश ते तैसेरे दोस्त तैस सेइं ज़ोने लगे, “फांसी देनेरे लेई 50 हथ उच्चो खम्भो बनाव गाए, ते झ़ेझ़ां राज़े सेइं ज़ोनू, कि तैस पुड़ मोर्दकै टंगो गाए। तैखन राज़े सेइं साथी आनन्दे सेइं धामी मां गानू।” एस गल्ली पुड़ खुशी भोइतां हामाने तै फांसी देनेरो खम्भो बनावव।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.