Bhadrawahi Bible
इफिसियों 5
प्यारे मां च़लनू
एल्हेरेलेइ तुस परमेशरेरे बच्चेथ ज़ैन सेइं तै प्यार केरते, तैसेरे ज़ेरे बन्नेरी कोशिश केरा। होरि केरे लेई प्यारे सेइं भेरतां ज़िन्दगी ज़ीथ, ज़ेन्च़रे मसीहे भी तुसन सेइं प्यार कियो; ते इश्शे लेई अपनो आप खुशबूअरे लेई परमेशरे कां च़ेढ़तां बलिदान केरो।
ते ज़ेरू परमेशरेरे लोकां केरे लेई ज़रूरीए, तेन्च़रे तुसन मां भी बदमाशी, ते कोन्ची किसमेरू बुरू कम न भोए, या लालच़ेरे बारे मां गल भी न भोए। ते न बे शरमी, न बेंसरी गल्लां, न मज़ाकेरी गल्लां, किजोकि इना गल्लां शोभन न, बल्के तुसेईं परमेशरेरू शुक्र कियोरू लोड़े। किजोकि तुस इन ज़ानतथ, कि कोन्ची बदमाश, या अशुद्ध मैन्हु, या लालच़ी मैन्हेरो ज़ै मूरती पूज़ा केरनेबालोए, मसीह ते परमेशरेरे राज़्ज़े मां तैसेरो कोई हिस्सो नईं। कोई तुसन ई सलाह देइतां धोखो न दे, कि परमेशरे हकीकति मां तैन सज़ाह न देलो ज़ैना एरे पाप केरतन। एल्हेरेलेइ तैन केरू साथ न रखा। किजोकि तुस त पेइले आंधरू थी, पन हुनी प्रभु यीशु मां लोआथ, ते लौअरे बच्चां केरे ज़ेरे च़ला। (किजोकि लौअरो फल सेब्भी किसमेरी भलियाई, ते धार्मिकता, ते सच़्च़े)। ते इन तोप्पा कि प्रभु कुन रोड़ू लगते। ते आंधरेरां ते बेकार कम्मन मां शामल न भोथ, बल्के लोकन इन हिराथ कि इना कम्मां बुरन। किजोकि गैर विश्वासी लोकां केरां छ़पोरां कम्मां केरि गल केरनि भी शरमरी गल्ले। ज़ैखन लौ कोन्ची चीज़ी पुड़ चमकती त हर कोई लेही बटते कि इन केरू, किजोकि ज़ैखन लौ किछ हिराती, त तै चीज़ एप्पू लौ भोइ गातीए। एल्हेरेलेइ एन्च़रे ज़ोवं गाते,
“हे झ़ुलने बाला उठ
ते मुड़दन मरां ज़ींतो भो,
ते मसीहेरी लौ तीं पुड़ चमकेली।”
एल्हेरेलेइ रोड़े च़ारे हेरा, कि केरि ज़िन्दगी ज़ींने लगोरेथ। बेअक्लां केरि ज़ेरि नईं पन अक्लमन्दा केरि ज़ेरि ज़िन्दगी ज़ीथ। ते मौको कीमती समझ़ा, किजोकि दिहाड़े बुरेन। एल्हेरेलेइ बेअक्ल न बना, पन ध्याने सेइं समझ़ा, कि प्रभुएरी तुश्शे लेई कुन मर्ज़ी? ते शराब पीने मां मतवाले न भोथ, किजोकि एस सेइं बदचलनी भोतीए, पन पवित्र आत्मा सेइं भेरोते राथ। ते एप्पू मांमेइं परमेशरेरां भजन ते स्तुति केरते ते आत्मिक गीत ज़ोथ, ते अपने-अपने मने मां प्रभुएरे लेई गीत ज़ोथ ते किरतन केरते राथ। ते सदा सेब्भी गल्लां केरे लेई प्रभु यीशु मसीहेरे नंव्वे सेइं बाजी परमेशरेरू शुक्र केरते राथ। ते मसीहेरे डरे सेइं एक्की होरेरे अधीन राथ।
मुन्श ते कुआन्शां
हे कुआन्शव, अपने-अपने मुन्शां केरे अधीन राथ, ज़ेन्च़रे प्रभुएरे। किजोकि मुन्श त कुआन्शरी क्रोड़ीए ज़ेन्च़रे मसीह कलीसियारी क्रोड़ी, ते मसीह कलीसियारो मुक्ति देनेबालोए ज़ै तैसेरी जाने। ज़ेन्च़रे कलीसिया मसीहेरे अधीने, तेन्च़रे कुआन्शां भी हर गल्ली मां अपने-अपने मुन्शेरे अधीन रान।
हे मुन्शव, अपने-अपने कुआन्शन सेइं प्यार केरा, ज़ेन्च़रे मसीहे भी कलीसिया सेइं प्यार केरतां अपनो आप तैसेरेलेइ दित्तो। ताके तैस वचनेरे ज़िरिये पैनेरे निहाने सेइं शुद्ध केरतां पवित्र बनाए। ते तैस अक एरी महिमा बाली कलीसिया बनेइतां एप्पू कां खड़ी केरे, ज़ैस मां न कोई दाग, न धब्बो, न कोई एरी चीज़ भोए, बल्के पवित्र ते बेइलज़ाम भोए। एन्च़रे मुन्श अपने कुआन्शी सेइं अपने जानी बराबर प्यार केरे। ज़ै अपने कुआन्शी सेइं प्यार केरते, तै एप्पू सेइं प्यार केरते। किजोकि कोन्चे कधी अपने जानी सेइं बैर नईं रखोरो, बल्के तैसेरी हेरगेश कियोरीए, ज़ेन्च़रे मसीह भी कलीसियाई सेइं केरते। एल्हेरेलेइ अस मसीहेरे जानरे अंगां केरे ज़ेरेम।
ज़ेन्च़रे पवित्रशास्त्र ज़ोते, “एल्हेरेलेइ मड़द अम्मा बाजी शैरतां अपने कुआन्शी सेइं मिलोरो रालो।” ई भेद त बड़ोए; पन अवं मसीह ते कलीसियारे बारे मां ज़ोताईं। पन तुसन मरां हर कोई अपने कुआन्शी सेइं एप्पू बराबर प्यार केरे, ते कुआन्श भी अपने मुन्शेरी इज़्ज़त केरे।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.