Bhadrawahi Bible
सभोपदेशक 2
सुख भी बेकारे
मीं अपने मने मां ज़ोवं, “च़ल, अवं तीं आनन्दे सेइं परखेलो; एल्हेरेलेइ खुश ते मघन भो।” पन हेरा, इन भी बेकारे। मीं हसनेरे बारे मां ज़ोवं, “इन त पागलपने,” ते आनन्देरे बारे मां, “तैस सेइं कुन हासिल भोते?” मीं मने मां सोचू कि केन्च़रे सेइं मेरी अक्ल बनोरी राए ते अवं अपनो आप शराब पीने सेइं केन्च़रे टरे लेईं ते केन्च़रे बेवकूफी ठेमतां रेखी, ज़ांतगर पतो न केरि कि तैन रोड़ू कम कोन ज़ेरूए ज़ैन मैन्हु अपने सारे ज़िन्दगी मां केरतो राए। मीं बड़ां-बड़ां कम्मां कियां; मीं अपने लेई घरां बनावां, ते अपने लेई दाछ़री बागां लुवेई; मीं अपने लेई बगीचे ते बागां लेई, ते तैन मां अलग-अलग किसमेरे फल देनेबाले बुट लाए। मीं अपने लेई डल्ह भी बनावाए कि तैन सेइं बागरे बुट सग्गे गान। मीं गुलाम कौन्शां ते मड़द घिन्ने, ते मेरे घरे मां नौकर भी पैदा भोए; ते ज़ेत्रे मीं करां पेइले यरूशलेमे मां थिये, तैन करां बड़े जादे बेछ़ी दांत ते भैड्डां-छ़ेल्ली केरो अवं मालिक भोव। मीं अपने लेई सोन्नू चाँदी ते राज़े ते सूबां केरे खज़ाने जम्हां किये; मीं गीतां ज़ोनेबाले मड़द ते कौन्शां ते रखैलां अकोट्ठी की, ज़ैन सेइं मैन्हु सुख मैलते, एपनी बनेई।
एन्च़रे सेइं अवं एन सेब्भन करां जादे, ज़ैना मीं करां पेइले यरूशलेमे मां थिये, जादे महान ते अमीर बेनि जेव, ते मेरी अक्ल मीं मां टिकोरी राई। ते ज़ेत्री चीज़ां हेरनेरी मीं खुवैइश की, तैना सब हेरने करां अवं न रुको; मीं अपनो मन कोन्ची भी चीज़रो आनन्द भोगनेरे लेई न रोको किजोकि मेरो दिल मेरी सैरी मेहनती सेइं खुशी भोव; ते मेरी सब मेहनती सेइं मीं सिर्फ ईए हिस्सो मैल्हो। तैखन फिरी ज़ैना कम्मां मीं अपने हथ्थन सेइं कियोरां थियां, ते अपनि सारी मेहनत हेरी, त कुन हेरू कि सब किछ बेकारे, ते हवा ट्लानीए, ते दुनियाई मां किछ भी फैइदामन्द नईं।
अक्लमन्द ते बेवकूफेरो अन्त
फिरी मीं अपने मने मां सोचू, कि अक्ली ते पागलपन ते बेवकूफी सेइं अपने कम्मन हेरी, किजोकि ज़ै मैन्हु राज़े पत्पती एज्जेलो, तै कुन केरेलो? सिर्फ तैन्ने ज़ैन भोतू राहोरोए। तैखन मीं एन हेरू कि लौ ज़ेत्री आंधरे करां जादे रोड़ीए, तेत्री अक्ल भी बेवकूफी करां जादे रोड़ीए। ज़ै अक्लमन्दे, तैसेरी एछ़्छ़ी तैसेरे दोग्गे पुड़ भोइचन, पन बेवकूफ आंधरे मां च़लते; फिरी भी मीं एन ज़ानू कि दूईयां केरि हालत अक्कां ज़ेरि भोतीए। तैखन मीं अपने मने मां ज़ोवं, “ज़ेरि बेवकूफेरी हालत भोल्ही, तेरही मेरी भी हालत भोल्ही; फिरी अवं किजो एत्रो अक्लमन्द भोव?” ते मीं अपने मने मां ज़ोवं, एन भी बेकारे। किजोकि न त अक्लमन्देरी ते न बेवकूफेरी याद हमेशा राहेली, पन एजने बाले वक्ते मां सब किछ बिसरी गाले। अक्लमन्द केन्च़रे बेवकूफेरो ज़ेरो मरते! एल्हेरेलेइ मीं अपने ज़िन्दगी सेइं नफरत की, किजोकि ज़ैन कम इस दुनियाई मां कियूं गाते मीं बुरू लग्गू; किजोकि सब बेकार ते हवा ट्लाने बालू कम्मे।
मीं एपनी सैरी मेहनतरो फल ज़ै मीं इस दुनियाई मां की, नफरत की, किजोकि ज़रूरीए कि अवं तैसेरो फल तैस मैन्हेरे लेई छ़ेडी देईं, ज़ै मेरे बादे मां एजनेबालोए। इन कौन ज़ानते कि तै मैन्हु अक्लमन्द भोल्हो या बेवकूफ? फिर भी ज़ै मेहनत मीं इस दुनियाई मां की, ते तैसेरेलेइ अक्ल इस्तेमाल की तैन सब चीज़ां केरो तै अधिकारी भोल्हो। इन भी बेकारे। तैखन मीं अपने दिले मां तैस सारे मेहनतरे बारे मां हिम्मत हारी ज़ै मीं इस दुनियाई मां कियोरी थी, किजोकि एरहो मैन्हु भी आहे, ज़ेसेरू कम हुनर ते अक्ली ते ज्ञाने सेइं भोते ते कामयाब भी भोते, फिरी भी तैन एरे ज़ेरे मैन्हेरे लेई छ़ेडी देनू पेते, ज़ैनी तैस मां किछ भी मेहनत नईं कियोरी भोए। एन भी बेकारे, ते बड़ू बुरूए। मैन्हु ज़ै दुनियाई मां मन लेई-लेई मेहनत केरते, तैस सेइं तैस कुन फैइदो भोते? तैसेरे त सब ज़िन्दगरे दिहाड़े दुखे सेइं भरोरे रहतन, ते तैसेरू कम दुखे सेइं भोते; ते राती भी तैसेरे मने चैन न भोए। तैन भी बेकारे।
मैन्हेरे लेई खाने पीने ते मेहनत केरते बार अपनि ज़िन्दगी खुश रखनेरे अलावा होरू किछ भी रोड़ू नईं। मीं एन भी हेरू कि एन भी परमेशरेरी तरफां मैलते। किजोकि परमेशरे करां दूर रेइतां कौन खेइ पी सकते या आनन्द मनेई सकते? ज़ै मैन्हु परमेशरेरी नज़री मां भलो आहे, तैस तै अक्ल ते ज्ञान खुशी सेइं देते; पन पैपी तै दुखेरू कम देते कि तै दौलत जम्हां केरे ते तैसारो ढेर लाए, ते ज़ै परमेशरेरे नज़री मां रोड़ो भोए। एन भी बेकारे, एन भी हवा ट्लाने बालू कम्मे।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.