Bhadrawahi Bible
व्यवस्थाविवरण 29
मोआबे मां परमेशरेरो करार
इस्राएली लोकन सेइं ज़ै करार केरनेरो हुक्म यहोवा परमेशरे मूसे नेबी मोआबेरे मुल्खे मां दित्तो तैसेरे इना वचन आन, ते ज़ै करार तैनी तैन सेइं होरेब पहाड़े पुड़ कियोरो थियो ई तैस करां अलग आहे।
फिरी मूसे सेब्भी इस्राएली लोकन कुजेइतां ज़ोवं, “ज़ैन किछ यहोवा मिस्र मुल्खे मां तुश्शे हेरते फ़िरौन ते तैसेरे सेब्भी कम केरनेबालन, ते तैसेरे सारे मुल्खे सेइं कियूं तैन तुसेईं लाहेरूए; तैना बड़ां-बड़ां अज़मैइशरां कम्मां, ते निशान, ते बड्डे-बड्डे चमत्कार तेरी एछ़्छ़ी केरे सामने भोए; पन यहोवा परमेशरे अज़ तगर तुसन न त समझ़नेरी अक्ल, ते न हेरनेरी एछ़्छ़ी, ते न शुन्नेरे कन दित्तोरेन। मीं त तुस सुनसान ठैरी मां 40 साल च़लाए; ते न तुश्शे जानी पुड़ लिगड़ां पुरानां भोआं, ते न तेरे पव्वां केरे बूट पुराने भोए; ज़ै रोट्टी तुस न खेइ बटे, ते दाछ़रो रस ते शराब ज़ै तुस न पी बटे, तैन एल्हेरेलेइ भोवं कि तुस ज़ानतथ कि अवं तुश्शो परमेशर यहोवा आईं। ते ज़ैखन तुस इस ठारी पुड़ आए, तैखन हेशबोनेरो राज़ो सीहोन ते बाशानेरो राज़ो ओग, इना दूईये जंग केरनेरे लेई इश्शो मुकाबलो केरनेरे लेई निस्से, ते असेईं तैना ज़ीते ते तैन केरो मुल्ख असेईं नियोरोए; ते रूबेनी लोकेईं, गादेरे लोकेईं, ते मनश्शेरे अध्धे गोट्लेरे लोकन ज़ै अपनो हिस्सो केरतां देइ दित्तो। एल्हेरेलेइ इस करारेरी गल्लां केरू अमल केरा, ताके ज़ैन किछ केरथ तैन कामयाब भोए।
“अज़ कुन बुज़ुर्ग लोक, कुन सरदार, तुश्शे खास-खास मड़द, कुन गोट्ले-गोट्लां केरे तुस सब इस्राएली मड़द, कुन तुश्शां मट्ठां कुइयां ते कौन्शां, कुन लकड़हारे, कुन पानी भरने बाले, कुन तेरे डेरन मां रानेबाले परदेशी, तुस सब अपने परमेशर यहोवारे सामने एल्हेरेलेइ खड़े भोवरेथ, कि ज़ै करार तेरो परमेशर यहोवा अज़ तीं सेइं केरते, ते ज़ै कसम तै अज़ तीं खुवाते, तैस मां तू शामल भोइ गास; एल्हेरेलेइ कि तैस वचनेरे मुताबिक ज़ै तैनी तीं दित्तोरोए, ते तैस कसमरे मुताबिक ज़ै तैनी तेरे पूर्वज अब्राहम, इसहाक, ते याकूबे सेइं खेवरी थी, तै अज़ तींजो अपने लोक बनाए, ते एप्पु तेरो परमेशर ठहरे। फिरी अवं इस करारे ते इस कसमी मां सिर्फ तुसन नईं, पन तैन्न भी, ज़ैना अज़ असन सेइं साथी इड़ी इश्शे परमेशर यहोवारे सामने खड़े आन, ते ज़ैना अज़ इड़ी असन सेइं साथी नईं, शामल केरताईं। तुस ज़ानतथ कि ज़ैखन अस मिस्र मुल्खे मां रहते थिये, ते ज़ैखन बत्तरी कौमां केरे मझ़मेइं भोइतां एज्जी राहोरे थिये, तैखन तुसेईं तैन केरि केरही-केरही भिट्टी चीज़ां, ते काठ, घोड़, चाँदी, सोन्नेरी मूरती हेरी। एल्हेरेलेइ एरू न भोए, कि तुसन लोकन मां एरहो कोई मड़द, या कौन्श, या कुल, या गोट्लेरे लोक भोन ज़ैन केरो मन अज़ इश्शे परमेशर यहोवा करां दूर भोए, ते तै गेइतां तैन कौमां केरे देबतां केरि सेवा केरे; फिरी एरू न भोए कि तुश्शे दरमियाने मां एरू कोई ज़ील भोए, ज़ैस सेइं बिष या ट्लिठो फल निस्से, ते एरहो मैन्हु इस लानतरे वचन शुन्तां एप्पु जो आशिर्वादेरे काबल मन्ने, ते इन सोचे कि चाहे अवं अपने मनेरी मर्ज़ी पुड़ च़ेलि, ते रेज़्ज़तां ट्लिश मिटेई छ़ेडी, त फिरी भी मेरू सब सुख भोल्हु। यहोवा तेरो पाप माफ़ न केरेलो, बल्के यहोवारी सरक ते जलनरो तू तैस पुड़ पेलो, ते ज़ेत्री लानतां इस किताबी मां लिखोरिन तैना सब तैस पुड़ एज्जेली, ते यहोवा तैसेरू नवं धेरती पुड़ेरां मिटेई देलो। ते कानूनेरी इस किताबी मां ज़ैस करारेरी गलबात आहे तैसेरी सब लानतां केरे मुताबिक यहोवा तैस इस्राएलेरे सब गोट्लन मरां नुक्सानेरे लेई अकैल्लो रखेलो।1 ते एजनेबाली पीढ़न मां तुश्शे खानदानेरे लोक ज़ैना तुश्शे बाद पैदा भोल्हे, ते परदेशी मैन्हु भी ज़ैना दूर मुल्खे मरां एज्जेले, तैना भी तैस मुल्खेरी आफतां ते तैस मां यहोवारे फैलवरे बिमैरी हेरतां, ते इन भी हेरतां कि इसेरी सब ज़मीन गन्धक ते लूने सेइं भेरोई जेवरीए, ते इड़ी तगर कि फुकोई जेई कि इस मां न किछ बीज़ बेवरू भोथू, ते न किछ ज़मीनी मां ज़ेम्मी सके, ते न घास लेगि सके, बल्के सदोम ते गमोरा, अदमा ते सबोयीमेरो ज़ेरो भोइ जेवरोए ज़ैन यहोवाए अपने बड़े सरकरे वजाई सेइं नाश कियोरू थियूं; ते सेब्भी कौमां केरे लोक पुछ़ेले, ‘यहोवाए इस मुल्खे सेइं एरू किजो कियूं? ते इस बड्डे सरकरे भड़कनेरी कुन वजा थी?’ तैखन लोक ई जुवाब देले, ‘तैन केरे बुज़ुर्गां केरे परमेशर यहोवाए ज़ै करार तैन सेइं मिस्र मुल्खे मरां निस्सनेरे वक्ते कियोरो थियो तै तैनेईं ट्लोड़ोरोए। ते बखले देबतां केरि सेवा कियोरीए ज़ैन तैना पेइले न थिये ज़ानते, ते यहोवाए तैन्न न थिये दित्तोरे; एल्हेरेलेइ यहोवा परमेशरेरो कोप इस मुल्खे पुड़ भड़कोरोए, कि किताबी मां लिखोरी सब लानतां इस पुड़ एजीन्न; ते यहोवारी सरक, ते जलजलाहट, ते बड़ो क्रोध केरतां तैन्न तैन केरे मुल्खे मरां पुटतां होरि मुल्खे मां शारेलो, ज़ेरू कि अज़ बांदू आहे।’
“छ़ेपोरी गल्लां इश्शो परमेशर यहोवारे कैबू मां आन; पन ज़ैना बैंदी कियोरिन तैना हमेशारे लेई इश्शे ते इश्शे खानदानेरे कैबू मां रहेली, एल्हेरेलेइ कि इस कानूनेरी सब गल्लां पूरी की गान।
Source notes (1)
- Footnote अकैल्लो रखेलो तैस अक बुरी मसाल बनालो
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.