Bhadrawahi Bible
दानिय्येल 9
लोकां केरे लेई दानिय्येलेरी प्राथना
किछ सालां केरे बाद मादी क्षयर्ष राज़ेरू मट्ठू दारा ज़ै कसदी लोकां केरे मुल्खे पुड़ राज़ो बनेवरो थियो, तैसेरे राज़ केरनेरे पेइले साले मां, मीं दानिय्येले शास्त्रां केरे ज़िरिये एन बुझ़ू कि यरूशलेमेरी उज़ड़ोरी हालत यहोवारे तैस वचनेरे मुताबिक, ज़ैन यहोवा यिर्मयाह नेबी सेइं ज़ोवरू थियूं, किछ सालां केरे बाद मतलब 70 सालां केरे बाद पूरू भोल्हु। तैखन अवं अपनु तुत्तर प्रभु परमेशरेरे पासे फेरतां, छंदे केरतां प्राथना केरने लगो, ते बरत रेखतां टाट पलेटतां ते मांज़नी मां बिशतां बिनती केरने लगो। मीं अपने परमेशर यहोवा कां एन्च़रे सेइं प्राथना की ते पापेरो इकरार कियो, “हे प्रभु तू महानस ते आदरारे काबल परमेशरस, ज़ै अपने प्यार रखनेबालन ते हुक्म मन्ने बालन सेइं अपनो करार पूरो केरते ते दया केरतो रहते, असेईं लोकेईं त पाप, बुराई, दुष्टता ते बगावत कियोरीए, ते तेरे हुक्म ते नियम ट्लोड़ी ट्लोड़ोरेन। ते असेईं तेरी सेवा केरनेबाले नेबी केरि गल नईं शुनोरी, ज़ैना तेरे नंव्वे सेइं इश्शे राज़े, हाकिम, दादे-पड़दादे, ते सब आम लोकन सेइं तेरे नंव्वे सेइं गल्लां केरते थिये, तैन केरि असेईं न शुनी। हे प्रभु, तू धर्मीस, पन असन अज़ शरमिन्दा भोनू पेवरूए, मतलब यरूशलेम नगरेरे रानेबाले सारे यहूदी, कुन नेड़े ते कुन दूर कुन इस्राएली लोक ज़ैना तीं तैन केरे धोखेरे वजाई सेइं ज़ै तैनेईं तीं सेइं कियोरो थियो, मुल्खे-मुल्खे मां तितर-बितर केरतां छ़डे, तैन सेभन शरमिन्दा भोनू पेवरूए। हे यहोवा, असेईं लोकेईं अपने राज़े, हाकिम ते दादे-पड़दादन समेत सेभेइं तेरे खलाफ पाप कियोरोए, एस वजाई सेइं असन शरमिन्दा भोनू पेवरूए। पन अगर असां अपने प्रभु परमेशरे करां दूर भोए फिरी भी तू दयारो समुन्दर ते माफ़ केरनेरी खानस। असां त अपने यहोवारी शिक्षा शुन्तां भी तैस पुड़ न च़ले, ज़ै तैनी अपने दास नेबी केरे ज़िरिये असन दित्तोरी थी। बल्के सेभी इस्राएली लोकेईं तेरे कानूनेरी बगावत की, ते एन्च़रे दूर भोए कि तेरी न शुनी। एस वजाई सेइं ज़ैस श्रापेरी चर्चा तेरे दासे मूसेरे कानूने मां लिखोरीए, तै श्राप असन पुड़ घेटी जेव, किजोकि असेईं तेरे खलाफ पाप कियोरोए। एल्हेरेलेइ तैनी इश्शे ते इश्शे नेबी केरे बारे मां ज़ैना वचन ज़ोवरे थिये, तैना असन पुड़ बड़ी मुसीबत छ़ेडतां पूरे कियोरेन; एड़ी तगर कि ज़ेरि मुसीबत यरूशलेम नगरे पुड़ पेवरीए, तेरही सैरी धेरती पुड़ कधे नईं पेवरी। ज़ेन्च़रे मूसेरे कानूने मां लिखेरूए, तेन्च़रे ऐह सारी मुसीबत असन पुड़ पेवरीए, फिरी भी असां अपने परमेशर यहोवाए मनानेरे लेई न त अपने अधर्मे करां फिरे, ते न तेरी सेच़्च़ी गल्लन पुड़ ध्यान दित्तू। एल्हेरेलेइ यहोवाए एन तियार केरतां असन पुड़ मुसीबत छ़डोरीए; किजोकि इश्शो यहोवा परमेशर ज़ेत्रां कम्मां केरते तैन सेभन मां धर्मी भोते; पन असेईं तैसेरी न शुनी। ते हुनी, हे इश्शे परमेशर, हे प्रभु तीं अपने लोक मिस्र मुल्खे मरां अपने शक्तिशाली हथ्थे सेइं केढतां एत्रू बड्डू कम कियूं, ज़ैन अज़ तगर मुशूरे, पन असेईं पाप कियोरोए ते बुराई भी कियोरीए। हे प्रभु, इश्शे पापन ते इश्शे दादे-पड़दां केरे अधर्मेरे कम्मां केरि वजाई सेइं यरूशलेमेरी ते तेरी प्रजा, ते इश्शे आसे-पासेरे लोकां केरि वजाई सेइं बेइज़्ज़ती भोइ राहोरीए; फिरी भी तू अपने धार्मिकतारे कम्मां केरे वजाई सेइं अपनो क्रोध ते अपनि जलन अपने नगर यरूशलेमे पुड़ेरां हटेइ दे, ज़ैन तेरे पवित्र पहाड़े पुड़ बस्सोरूए। हे इश्शे परमेशर, अपने दासेरी प्राथना ते बिनती शुन, ते अपने उज़ड़ोरी पवित्र भवने पुड़ अपनि लौ चमका; हे प्रभु, अपने नंव्वेरे खातर एन केर। हे मेरे परमेशर, ध्याने सेइं शुन, एछ़्छ़ी खोलतां इश्शी उज़ड़ोरी हालती ते तैस नगरे भी हेर ज़ैस जो तेरू नगर ज़ोतन; किजोकि असां ज़ैना तेरे सामने छंदे केरतां प्राथना केरतम, एल्हेरेलेइ इश्शे धार्मिकतारे कम्मन पुड़ नईं, बल्के तेरे बड़े दयारे कम्मन पुड़ भरोसो रेखतां केरतम। हे प्रभु शुन, हे प्रभु, पाप माफ़ केर; हे प्रभु, ध्यान देइतां ज़ैन किछ केरनूए तैन केर, च़िर न ला; किजोकि तेरू नगर ते तेरे लोक तेरे नंव्वे सेइं याद किये गातन; एल्हेरेलेइ अपने नंव्वेरे खातर एरू केर।”
70 हफतां केरि नबूवत
एस तरीके अवं प्राथना केरतो, ते अपने ते इस्राएली कौमरे ढ्लां केरे पापां केरो इकरार केरतो, ते अपने परमेशर यहोवारे सामने ते तैसेरे पवित्र पहाड़ेरे1 लेई छंदे केरतां हेजू बिनती केरि राहोरो थियो, तैखन गब्रिएल ज़ै मीं तैस मौके लाहोरो थियो, ज़ैखन मीं पेइलू दर्शन मैल्होरू थियूं, तै तेज़ी सेइं उडरने बाले हुक्म मैलतां, ड्लवझ़री अन्नबेलरे मौके मीं सेइं हुरो; ते मीं समझ़ेइतां मीं सेइं गल्लां केरने लगो। तैनी मीं सेइं ज़ोवं, “हे दानिय्येल, अवं एल्हेरेलेइ तीं कां एवरोईं कि तीं अक्ल ते समझ़ देईं। ज़ैखन तू छंदे केरतां बिनती केरने लगो, तैखने एसेरो हुक्म निस्सो, एल्हेरेलेइ अवं तीं सेइं ज़ोने एवरोईं, किजोकि तू मीं बड़ो ट्लारोस; एल्हेरेलेइ तैस बारे मां समझ़ ते दर्शनेरी गल्लां केरो मतलब बुझ़।
“तेरे लोकां केरे लेई ते तेरे पवित्र नगरेरे लेई 70 हफते 2रखोरेन कि ज़ैन केरे आखरती मां जुर्म भोनो बन्द भोए, पापेरो खातमों भोल्हो ते अधर्मेरो प्रायश्चित कियो गाए; ते जुगे-जुगेरी धार्मिकता बांदी भोए, दर्शन ते नबूवती पुड़ मोहर लग्गेली ते पवित्र नगर यरूशलेमेरू अभिषेक कियूं गाए। एल्हेरेलेइ एन समझ़ ते बुझ़, कि यरूशलेमेरो फिरी आबाद भोनेरो हुक्म निसने करां अभिषिक्त प्रधानेरे मौके तगर सत हफते बीतेले। फिरी 62 हफतां3 केरे बीतनेरां बाद चौक ते खडन समेत तैन नगर दुखेरे वक्ते मां फिरी बसाव गालू। ते तैना 62 हफतां केरे बीतनेरां बाद अभिषिक्त मैन्हु कट्टो गालो, ते तैसेरे हथ्थे किछ न रालू, ते एजने बाले प्रधानेरी प्रजा ते परमेशरेरो भवन ते नगरे तबाह केरि देले, पन एसेरो खातमों एन्च़रे भोल्हो ज़ेन्च़रे सैलाबे सेइं, फिरी भी जंग आखीरी तगर भोती राली, किजोकि तैसेरे उज़ड़ु गानू पक्कू आहे। ते तै प्रधान एक्की हफतेरे4 लेई बड़े लोकन सेइं करार केरेलो, पन अध्धो हफतो बीतने पुड़ तै मेलबलि ते अन्नबलि बन्द केरेलो; ते तै च़ोटी पुड़ उज़ाड़ने बाली भिट्टी चीज़ लेइहोली ते इरादो कियोरी गल्लरे खतम भोने तगर परमेशरेरो क्रोध उज़ाड़ने बाले पुड़ रालो।”
Source notes (4)
- Footnote पवित्र पहाड़ेरे यरूशलेम
- Footnote 70 हफते 70 बार सत साल।
- Footnote 62 हफतां 434 साल
- Footnote एक्की हफतेरे सत साल
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.