Bhadrawahi Bible
दानिय्येल 8
हुड़ ते थाव्वेरू दर्शन
बेलशस्सर बाबेलेरे राज़ेरे राज़ केरनेरे ट्लेइयोवं साले मां मीं दानिय्येले अक होरू दर्शन हेरू। ज़ैखन अवं एलाम नंव्वेरे सूबे मां, शूशन नंव्वेरे राज़गढ़े मां रहतो थियो, तैखन मीं दर्शने मां लाव कि अवं ऊलै दरियाएरे बन्ने पुड़ आईं। फिरी मीं हेरू कि तैस दरियारे सामने दूई शिंगन बालो अक हुड़ खड़ोए, तैसेरां दूईये शिंगां बड़ां लम्मन, पन तैन मरां अक बड़ू बड्डू आहे, ते ज़ैन बड्डूए तैन दूइयोंवेरू बादे मां निस्सू। मीं तै हुड़ लाव कि तै पश्चिम, उत्तर ते दक्षिणेरे पासे शिंगां मारते, ते कोई जानबर तैसेरे सामने खड़ो न रेई सके, ते न कोई तैसेरे हथ्थे करां बच़ेइ सखे; ते तै एपनी मेर्ज़रे मुताबिक कम केरतां अग्रोवं च़लतो रहतो थियो।
फिरी अवं इस गल्लरे बारे मां सोची राहोरो थियो, त फिरी कुन लाव कि अक थाव्वो पश्चिम पासेरां निस्सतां सैरी धेरती पुड़ एरहो फिरो कि च़लते बार तैसेरे रौन्ने धेरती पुड़ न थिये लगते ते तैस थाव्वेरी एछ़्छ़ी केरे मझ़ाटे अक हेरने काबल शिंग थियूं। तै तैस दूई शिंगन बाले हुड़े कां गेइतां, ज़ै मीं दरियाएरे बन्ने पुड़ लाहोरो थियो, तैस सरकी सेइं पूरी ताकती सेइं तैस टक्कर मारी। मीं तै हुड़े पुड़ बड़े क्रोधे सेइं हमलो केरतो लाव; ते हुड़ मैरतां तैसेरां दूईये शिंगां ट्लोड़तां छ़डां; हुड़ बेबस भोइ जेव ते तैसेरी कोई पेश न च़ली; तैखन तैनी थाव्वे तै तल्ले मां बुछ़ोड़तां ढ्लेंच़तां छ़डो; ते हुड़े तैस करां छुटानेबालो कोई न मैल्हो। तैखन थाव्वो बड़ो ताकतबर भोव, पन बड़े ताकतबर भोने पुड़ तैसेरू बड्डू शिंग ट्लुटी जेव, ते तैसेरे ठैरी हेरने काबल च़ेवर शिंगां निस्तां च़ेवरे पासन बेडोने लग्गां।
फिरी तैन मरां अक निकड़ू ज़ेरू शिंग होरू निस्सु, ज़ैन दक्षिण, पूरब ते खूबसूरत इस्राएल मुल्खेरे पासे खूब बेडोवं। तैन सुर्गेरी सेना तगर बेधी जेवं; ते तैस मरां ते तारन मरां भी किछ ज़मीनी पुड़ ढ्लेन्च़े जे। बल्के तैन तैस सेना केरे प्रधाने तगर पुज़्ज़ू, ते तैसेरी रोज़ेरी होमबलि बन्द केरतां छ़डी; ते तैसेरी पवित्र भवन1 भी बुछ़ोड़तां छ़डो। ते लोकां केरे पापेरी वजाई सेइं रोज़ेरी होमबेलि सेइं सेना भी तैसेरे हथ्थे मां केरि दित्ती, ते तैनी शिंगे सच़्च़ाई मित्ती मां मिलेइतां छ़डी, ते तैन कम्मां केरते-केरते कामयाब भी भोइ जेवं। तैखन मीं अक पवित्र मैन्हु2 ज़ोतो शुनो; फिरी एक्की पवित्र मैन्हें तैस पेइले ज़ोनेबाले पुछ़ू, “रोज़ेरी होमबलि ते उज़ाड़ने बाले पापेरे बारे मां ज़ैन किछ दर्शन लाव, तैन केइस तगर फलतु रालू; मतलब पवित्र ठार ते सेना दूईयां केरू ढ्लन्च़नू केइस तगर च़लतू रालू?” ते तैनी मीं सेइं ज़ोवं3, “ज़ांतगर झ़ेझ़ ते ड्लोझ़ 2300 बार न भोए, तांतगर एन भोतू रालू; तैखन पवित्र ठार4 शुद्ध की गाली ते दुबारां इस्तेमाल की गाली।”
गब्रिएलेरे ज़िरिये दर्शनेरो मतलब ज़ोनो
इन दर्शन लेइतां अवं दानिय्येल एसेरे समझ़नेरी कोशिश केरने लगो; एत्रे मां एक्की मड़देरे रूपे मां मेरे सामने खड़ो भोव। तैखन मीं ऊलै दरियाए मरां एक्की मैन्हेरी आवाज़ शुनोने लगी, ज़ै हक्कां देइतां ज़ोतो थियो, “हे गब्रिएल, उस मैन्हु तैसेरी लेवरी गल्लां समझ़ेई दे।” तैखन ज़ैड़ी अवं खड़ो थियो, तैड़ी तै मीं कां नेड़े अव; ते तैसेरे एंइते अवं डेरि जेव; ते तुत्तरे भारे बिछ़ड़ी जेव। तैखन तैनी मीं सेइं ज़ोवं, “हे नाशवान मैन्हु तैना लाहोरी गल्लां समझ़, किजोकि एन दर्शन आखरी वक्तेरे बारे मांए।”
ज़ैखन तै मीं सेइं गल्लां लगोरो थियो केरने, तैखन अवं तुत्तरे भारे तल्ले मां डुग्घी निड्ली मां थियो, पन तैनी मीं सेइं हुरतां अवं सिद्धो खड़ो कियो। तैखन तैनी ज़ोवं, “परमेशरेरे क्रोध भड़कनेरे आखरी दिहाड़न मां ज़ैन भोल्हु, तैन अवं तीं सेइं ज़ोताईं; किजोकि आखरी दिहाड़न मां तैन सब किछ पूरू भोल्हु। ज़ै दूई शिंगन बालो हुड़ तीं लाव, तैसेरो मतलब मादी ते फारसी राज़े आन। ते तै ज़ड़न बालो थाव्वो यूनानेरो राज़ोए; ते तैसेरी एछ़्छ़ी केरे मझ़ाटे ज़ैन बड्डू शिंग निस्सु, तै पेइलो राज़ो भोव। ते ज़ैन शिंग ट्लोड़तां छ़डू ते तैसेरी ठैरी ज़ैना च़ेवर शिंगां निस्सां, एसेरो मतलब ईए कि तैस कौमी मरां च़ेवर रियासतां निस्सेली, पन तैन केरि ताकत तैस पेइलेरे बराबर न भोल्ही। ते तैन च़ेवर रियासतां केरे आखरी ज़माने मां पापी पूरी ताकती सेइं बलशाली भोल्हे, तैखन अक बुरे नज़री बालो राज़ो ते पुनैनी बुझ़नेबालो राज़ो खड़ो भोल्हो। तैसेरी शक्ति बड़ी भोल्ही, पन तैस पेइले राज़ेरी ज़ेरि न भोल्ही; ते तै बुरे तरीके सेइं लोकन नाश केरेलो, ते कामयाब भोइतां कम्मां केरतो रालो, ते तै ताकतबरन ते परमेशरेरे लोकन नाश केरेलो। तैसेरी च़लैकी सेइं तैसेरू फरेब कामयाब भोल्हु, ते तै अपने मने मां घमण्ड केरतां निडर भोइतां बड़े लोकन नाश केरेलो। तै सेभी राज़ां केरे राज़ेरे5 खलाफ खड़ो भोल्हो; पन आखरी मां तै बगैर केन्चेरे मार खाने सेइं ट्लुटी गालो। झ़ेझ़ां ड्लवझ़रे बारे मां ज़ैन किछ तीं लाव ते शुनेरूए तैन सच़्च़े। पन ज़ैन किछ तीं दर्शने मां लाहेरूए तैस बन्द रख, किजोकि तैन बड़े सालां केरे बाद पूरू भोल्हु।”
तैसेरां बाद मेरी दानिय्येलेरी ताकत खतम भोइ जेई, ते अवं काही दिहाड़न तगर बिमार राव; तैल्लां बाद अवं राज़ेरां कम्मां-काज़ केरने लगो; पन ज़ैन किछ मीं लाहेरू थियूं अवं तैसेरी वजाई सेइं हैरान थियो, किजोकि तैसेरो समझ़ाने बालो होरो कोई न थियो।
Source notes (5)
- Footnote पवित्र भवन यहोवारो भवन
- Footnote पवित्र मैन्हु स्वर्गदूत
- Footnote ते तैनी मीं सेइं ज़ोवं ई भी मतलब भोइ सकते, तैनी स्वर्गदूते तैस सेइं ज़ोवं।
- Footnote पवित्र ठार परमेशरेरो भवन।
- Footnote राज़ां केरे राज़ेरे परमेशर, ज़ै सेभन करां महान राज़ केरनेबालोए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.