Bhadrawahi Bible
दानिय्येल 6
दानिय्येलेरे खलाफ साज़िश
एक्सां दारा राज़े एन बड़ू रोड़ू लगू कि अपने रियासती पुड़ 120 अधिपति च़ुने, ज़ैना पूरे रियासती पुड़ हुकूमत केरन। ते तैन पुड़ तैनी ट्लाई अधिकारी भी रख्खे, तैन मरां दानिय्येल अक थियो, तैना एल्हेरेलेइ रखोरे थिये, कि तैन अधिपति लोकन करां हिसाब किताब घिन्न, कि एस तरीके सेइं राज़ेरो कोई नुकसान न भोइ सके। ज़ैखन एन हेरू कि दानिय्येले मां उत्तम आत्मा रहतीए, तैखन तैस तै अधिकैरन ते अधिपति लोकन करां जादे इज़्ज़त मैल्ही; बल्के राज़ो एन भी सोचतो थियो कि तै दानिय्येले सारे रियासती पुड़ ठहराए। तैखन अधिकारी ते अधिपति राज़ेरे कम्मेरे बारे मां दानिय्येलेरे खलाफ गलती तोप्पने लगे; पन तै वफादार थियो, ते तैना तैसेरे कम्मे मां कोई गलती न केढी बटे, ते तैन एरी कोई गलती भी न मैल्ही बटी। तैखन तैना लोक एक्की होरि सेइं ज़ोने लगे, “असां एस दानिय्येलेरे परमेशरेरे कानूनेरे अलावा होरि कोई गलती न केढी सखम।”
तैखन तैना अधिकारी ते अधिपति लोक जल्दी राज़े कां आए, ते तैस सेइं ज़ोवं, “हे दारा राज़ा, तू जुगे-जुगे ज़ींतो रास। राज़ेरे सारे अधिकारी, हाकिम, ते अधिपति, न्यायी, ते राज्यपालेईं एप्पु मांमेइं सलाह कियोरीए, कि राज़ो एरहो हुक्म दे ते एरी सखत सज़ारो हुक्म कढे, कि 30 दिहाड़न तगर अगर ज़ै कोई, हे राज़ा, कि तेरे अलावा होरि कोन्ची मैन्हु या देबते कां बिनती केरेलो, तै शेरां केरि कुढी मां छ़डो गालो। एल्हेरेलेइ हुनी हे राज़ा, एरहो हुक्म दे, ते इस पुड़ दसखत केर, ज़ैस सेइं ऐह गल मादी लोकन ते फारसी लोकन मां अक अटल कानूनेरे मुताबिक बदलाव न भोइसखे।” तैखन दारा राज़े एस हुक्मेरे पत्रे पुड़ दसखत किये।
शेरां केरि कुढी मां दानिय्येल
ज़ैखन दानिय्येले ऐह पतो लग्गो कि तैस पत्रे पुड़ दसखत राज़े कियोरेन, तैखन तै अपने घरे मां जेव ते बेहीं कोठरी दैरी मां ज़ै यरूशलेमेरे पासे खुल्ही रहती थी, ते अपने रीतरे मुताबिक ज़ेन्च़रे तै दिहैड़ी मां ट्लाई बार अपने परमेशरेरे सामने ज़ैधू केरे भारे बिशतां प्राथना ते शुक्र केरतो थियो, तेन्च़रे तैखन भी केरतो राव। तैखन तैना मैन्हु जल्दी आए ते दानिय्येल अपने परमेशरेरे सामने बिनती केरतो ते मद्दत मगतो मैल्हो। तैखन तैना राज़े कां गेइतां, तैस हुक्मेरे बारे मां राज़े सेइं ज़ोने लगे, “हे राज़ा, कुन तीं एस हुक्मेरे पत्रे पुड़ दसखत नईं कियोरे कि 30 दिहाड़न तगर ज़ै कोई तेरे अलावा होरि कोन्ची मैन्हु या देबते कां बिनती केरेलो, तै शेरां केरि कुढी मां छ़डो गालो?” राज़े जुवाब दित्तो, “हाँ मादी ते फारसी लोकां केरे अटल कानूनेरे मुताबिक ऐह गल कायमे।” तैखन तैनेईं राज़े सेइं ज़ोवं, “यहूदा प्रदेशेरे गुलामन मरां ज़ै दानिय्येले, तैनी, हे राज़ा, न त तेरे पासे किछ ध्यान दित्तू, ते न तेरे दित्तोरे हुक्मेरे पत्रे पुड़ दसखत कियोरां केरो खियाल कियो; तै दिहैड़ी मां ट्लाई बार अपने परमेशरे कां बिनती केरते।”
ज़ैखन राज़े तैन शुनू त बड़ो उदास भोइ जेव, ते दानिय्येल बच़ानेरे लेई कोई तरीको सोचने लगो; ते दिहाड़ो डुबने तगर तै एस सोच बिचारी मां राव। तैखन तैना उतावले भोइतां राज़े कां एइतां ज़ोने लगे, “हे राज़ां, एन याद रख, कि मादी ते फारसी लोकां केरे मुताबिक जारी कियोरो हुक्म दुबारां न बेदलोए।”
तैखन राज़े अपने सेवकन हुक्म दित्तो, ते दानिय्येल एन्हतां शेरां केरि कुढी मां छ़ेडी दित्तो। तैस मौके राज़े दानिय्येले सेइं ज़ोवं, “तेरो परमेशर ज़ेसेरी तू हमेशा भक्ति केरतस, तैए तीं बच़ाए।” तैखन अक घोड़ एन्हतां तैस कुढरे बैंधोरां रेखी दित्तो, तैखन राज़े ते तैसेरे प्रधानेईं एपनी एंवठी सेइं तैस पुड़ मोहर लाई कि दानिय्येलेरे बारे मां कोई कानून बदलो न गाए।
दानिय्येल शेरन करां भी बच़ते
तैखन राज़ो अपने मेहले मां जेव, ते तैनी ड्लवझ़ां रोट्टी न खाई; ते तैस कां सुखेरी कोई चीज़ न पुज़ाई जेई, ते तैनी परेशान भोइतां रात गुज़ारी, ते तैस निड्ल भी न अई।
होरसां झ़ेझ़ां राज़ो सुबेले उठो, ते शेरां केरि कुढरे पासे लूशी च़लो जेव। ज़ैखन राज़ो कुढी कां नेड़े पुज़्ज़ो, तैखन बड़े दुखेरे मारे दानिय्येले जो हक्कां लगो देने, “हे दानिय्येल, हे ज़ींते परमेशरे दास, कुन तेरो परमेशर ज़ेसेरी तू भक्ति केरतस, तैनी तू शेरन करां बंच़ेवरोस?” तैखन दानिय्येले राज़े सेइं ज़ोवं, “हे राज़ा तू जुग-जुग ज़ींतो रास! मेरे परमेशरे अपनो दूत भेज़तां शेरां केरू आशी बन्द केरतां रख्खू ते तैनेईं मेरो कोई नुकसान न कियो। एसेरी वजा ऐह थी कि अवं तैसेरे सामने बेकसूर थियो; ते हे राज़ा, तेरे सामने भी मीं कोई बुराई नईं कियोरी।”1 तैखन राज़े बड़े खुशी भोइतां, दानिय्येल शेरां केरि कुढी मरां बेइर कढनेरो हुक्म दित्तो। ते दानिय्येल शेरां केरि कुढी मरां बेइर कढो, तैस पुड़ नुक्सानेरो कोई निशान न थियो, किजोकि तै अपने परमेशरे पुड़ विश्वास केरतो थियो।
दारा राज़ो परमेशरेरी तारीफ़ केरते
तैखन राज़े हुक्म दित्तो कि ज़ैन लोकेईं दानिय्येले पुड़ इलज़ाम लेवरो थियो, तैना अपने-अपने बाल-वचन समेत ते एपनी कौन्शन समेत एन्हतां शेरां केरि कुढन मां छ़डे गान। ते तैना हेजू कुढी मां तल्ले भी न थिये पुज़ोरे त शेरेईं तैना बाँहां ट्लेइतां छ़िन्दी छ़डे ते हेड्डन समेत खेइतां चट केरतां छ़डे।
तैखन दारा राज़े सैरी धेरती पुड़ रानेबालन ते मुल्खे-मुल्खेरे लोकन ते कौमां-कौमां केरे सेभी लोकन ते अलग-अलग बोली केरनेबालन कां इन लिखतां भेज़ू, तुश्शी भलू भोए! अवं ऐह हुक्म देताईं कि ज़ैड़ी तगर मेरे हुकूमतरो अधिकारे, तैड़ी तगर लोक दानिय्येलेरे परमेशरेरे सामने कम्बते ते थरकते रान, किजोकि तैए ज़ींतो परमेशर ते जुगे-जुगे तगर रानेबालो परमेशरे; तैसेरू राज़ नाश न भोनू बालूए, ते तैसेरी हुकूमत हमेशा कायम राली। ज़ैनी दानिय्येल शेरन करां बच़ावरोए, तैए बच़ाने ते छुटानेबालो परमेशरे; ते सुर्गे ते धेरती पुड़ निशान ते चमत्कार बांदो केरनेबालो तैए परमेशरे।
ते दानिय्येल, दारा ते कुस्रू फारसी, दूईयां केरे राज़ केरनेरे वक्ते मां सुखे चैनी सेइं राव।
Source notes (1)
- Cross-reference यशा. 63:9;भज. 34:7.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.