Bhadrawahi Bible
दानिय्येल 5
बेलशस्सर राज़ेरी धाम
बड़े सालां केरे बाद एक्की राती बेलशस्सर राज़े अपने 1000 प्रधाना केरे लेई अक बड़ी धाम दित्ती, ते तैन सेइं साथी शराब पीने लगो।
शराब पीते बार बेलशस्सर राज़े ऐह हुक्म दित्तो, कि सोन्ने चैंदरां तैना भांडां ज़ैना मेरे बाजे नबूकदनेस्सर राज़े यरूशलेमेरे भवने मरां कढोरां थियां, तैना इरां आन कि राज़ो अपने प्रधान्न ते रैनी ते रखैलन सेइं साथी तैन मां शराब पीए। तैखन ज़ैना सोन्नेरां भांडां यरूशलेम नगरे मां परमेशरेरे भवने मरां कढोरां थियां, तैना आनां, ते राज़ो अपने प्रधान्न ते रैनी ते रखैलन सेइं साथी तैन मां शराब पीने लगो।
तैना शराब पीतां सोन्ने, चैंदी, पितल, लोंह, लकड़ी ते घोड़ां केरे मूरती केरि तारीफ़ केरि राहोरे थिये।1 त तैस्से वक्त अचानक मैन्हेरे हथ्थेरी ज़ेरि एंगलोई लेइहोने लेग्गी ते राज़ेरे मेहलेरे चुन्नो लेवरी दिवारी पुड़ लिखने लेग्गी; ते हथ्थेरो ज़ै हिस्सो लिखने लगोरो थियो तै राज़े लाव। तैस लेइतां राज़ो डेरि जेव, ते तै अपने मने मां घेमरोव, ते तैसेरू ट्लिग भी ढिलु भोइ जेवं, ते थरकते-थरकते तैसेरां ज़ैंधू एक्की होरि सेइं बज़ने लगां। तैखन राज़े ज़ोरे सेइं हक़ देइतां ज़ोवं, तांत्री, कसदी ते एजने बाले वक्तेरे बारे मां ज़ोनेबालन कुजानेरे लेई हुक्म दित्तो। ज़ैखन बाबेलेरे ज्ञानी तैस कां आए, तैखन तै तैन सेइं ज़ोने लगो, “ज़ै कोई तैस लिखोरे पेढ़तां मीं तैसेरो मतलब समझ़ाए तैस बैंगनी रंगेरां शाही लिगड़ां ते गले जो सोन्नेरी माला लुवाई गाली; ते मेरे हुकूमती मां ट्लेइयोवं दर्जो दित्तो गालो।” तैखन राज़ेरे सब ज्ञानी अन्तर आए, पन तैन लिखोरू कोन्ची भी पढ़नू न अव, ते न राज़े तैसेरो मतलब समझ़ेई बटे। एस गल्लरी वजाई सेइं बेलशस्सर राज़ो बड़ो घेमरोई जेव ते डेरि जेव, ते तैसेरे प्रधान भी बड़े परेशान भोइ जे।
राज़ेरी ते प्रधाना केरि गल्लां शुन्तां, रानी धांमरे घरे मां आई, ते ज़ोने लगी, “हे राज़ां, तू जुग-जुग ज़ींतो रास, ते अपने मने मां न घेमरोव ते न उदास भो। तेरे रियासती मां दानिय्येल नंव्वेरो अक मैन्हु आहे, ज़ेसेरू नवं तेरे बाजे बेलतशस्सर रखोरू थियूं, तैस मां पवित्र ईश्वरां केरि आत्मा रहतीए, तेरे बाजेरे हुकूमतरे दिहाड़न मां तैस मां प्रकाश, प्रवीणता ते ईश्वरां केरि ज़ेरि अक्ले। हे राज़ा तेरे बाजी नबूकदनेस्सर राज़े तै जोष्टन, तांत्री, कसदी ते एजने बाले वक्तेरे बारे मां ज़ोने बालां केरो प्रधान बनेवरो थियो, किजोकि तैस मां उत्तम आत्मा, ज्ञान ते प्रवीणता, ते सुपना केरो मतलब ते पुनैनी पुन्ने मां ते तैन केरो मतलब कढनेरी कबलियत थी; ते शक दूर केरनेरी काबलीत हासिल थी। एल्हेरेलेइ हुनी दानिय्येले कुजाथ, ते तै इसेरो मतलब ज़ोलो।”
कंथी पुड़ लिखोरेरो मतलब शुनानो
तैखन दानिय्येल, राज़े कां अन्तर कुजव, ते राज़े दानिय्येले पुछ़ू, “कुन तू तैए दानिय्येल आस ज़ै मेरे बाजी नबूकदनेस्सर राज़ेरे यहूदा प्रदेशेरे मरां यहूदी गुलामन मरां आस? मीं तेरे बारे मां शुनेरूए कि ईश्वरां केरि आत्मा तीं मांए; ते प्रकाश, प्रवीणता ते उत्तम अक्ल तीं आहे। हेर, हुन्ना ज्ञानी ते तांत्री, मीं कां एल्हेरेलेइ आनोरे थिये कि तैना एन लिखोरू पढ़न ते तैसेरो मतलब मीं समझ़ान, पन तैना एस गल्लरो मतलब न समझ़ेई बटे। पन मीं तेरे बारे मां शुनेरूए कि दानिय्येल एस गल्लरो भेद खोल्ली सखते ते शक दूर केरि सखते, एल्हेरेलेइ अगर तू तैस लिखोरे पेढ़ी सखस ते तैसेरो मतलब ज़ोस त तीं शाही बैंगनी रंगेरां लिगड़ां, ते तेरे गले मां सोन्नेरी माला लुवाई गाली, ते हुकूमती मां ट्लेइयोवं दर्जो तेरो भोल्हो।”
दानिय्येले राज़े सेइं ज़ोवं, “अपने तोफे एप्पु कां रख; ते ज़ैन किछ तू देनो चातस, तैन कोन्ची होरि दे; ते तैन लिखोरू पेढ़तां तीं शुनेइलो, ते तैसेरो मतलब तीं सेइं ज़ोइलो। हे राज़ां, परमप्रधान परमेशरे तेरे बाजी नबूकदनेस्सर राज़े राज़, शोहोरत, आदर ते शान-ओ-शोकत दित्तोरी थी; ते तैस शान-ओ-शोकतरे वजाई सेइं ज़ै तैने तैस दित्तोरी थी, मुल्ख-मुल्ख ते कौम-कौमरे सब लोक, ते अलग-अलग भाषा केरनेबाले तैसेरे सामने कम्बते ते थरकते थिये, ज़ैस तै चातो थियो तैस तै मारतो थियो, ते ज़ैस तै चाते तैस तै ज़ींतो रखतो थियो ज़ैस तै चाते उच्चो दर्जो देतो थियो, ते ज़ैस तै चाते तैस तै बिछ़ोड़तो थियो। पन ज़ैखन तै घमण्डे सेइं भेरोई जेव, ते तैसेरी आत्मा सखत भोइ जेई, एड़ी तगर कि तै अभिमान केरने लगो, तैखन तै अपने शाही तखते पुड़ेरां उसालो, ते तैसेरी इज़्ज़त खतम कीजेई;2 तै मैन्हन मरां केढतां छ़डो, ते तैसेरो मन जानबरां केरो ज़ेरो भोइ जेव, ते तै जंगली गधन सेइं साथी बिशने लगो, ते तै दांतां केरो ज़ेरो घास खातो, ते तैसेरी जान अम्बरेरी ट्लेली सेइं सिज़ती थी, ज़ांतगर तैनी बुझ़ू न कि परमप्रधान परमेशरे मैन्हु केरे हुकूमती पुड़ राज़ केरते ते तै ज़ैस चाते तैस्से तैस पुड़ अधिकारी बनाते। फिरी भी, हे बेलशस्सर, तू ज़ैन तैसेरू मट्ठूस, ते एन सब किछ ज़ानतो थियो, फिरी भी तू हलीम न भोव। बल्के तीं सुर्गेरे प्रभुएरे खलाफ खड़े भोइतां तैसेरे भवनेरां भांडां मगेइतां अपने सामने रखां, ते तीं अपने प्रधान्न, रैनी ते रखैलन सने तैन मां शराब पी; ते चाँदी-सोन्ने, पितल, लोंह, लकड़ी ते घोड़ां केरि मूरती, ज़ैना न किछ लान, न शुन्न ते न किछ ज़ानन, तैन केरि तारीफ़ केरने लगे, पन परमेशर, ज़ेसेरे हथ्थे मां तेरो प्राण थियो, ते तैसेरे वशे मां तेरू सब च़लनू फिरनुए, तैसेरी आदर न की।3
“एल्हेरेलेइ ऐह हथ्थेरो अक हिस्सो परमेशरे बांदो कियोरोए ते तैना लफ़ज़ लिखोरेन। ते ज़ैना लफ़ज़ लिखोरेन तैना इना आन, मने, मने, तकेल, ऊपर्सीन। एन लफ़ज़ां केरो मतलबे, मने, मतलब परमेशरे तेरे हुकूमतरे दिहाड़े गेनतां तैन केरो हिसाब कियोरोए। तकेल, तू मन कि तू ट्लेकड़ी मां तुल्लो ते घट निस्सो। पर्सीन, मतलब तेरू राज़ बेंटतां मादी लोकन ते फारसी लोकन दित्तोरूए।”
तैखन बेलशस्सरे हुक्म दित्तो, ते दानिय्येले बैंगनी रंगेरां लिगड़ां ते तैसेरे गले मां सोन्नेरी माला लुवाई जेई; ते तैसेरे बारे मां ढुंढूरो पिटवाव, कि हुकूमती मां दानिय्येल ट्लेइयोवं दर्जे पुड़ राज़ केरेलो।
बेलशस्सर राज़ेरी मौत
तैस्से राती कसदी लोकां केरो राज़ो बेलशस्सर मारो जेव। ते दारा मादी केरो राज़ो ज़ेसेरी उमर 62 साल थी बाबेलेरो राज़ो बनो।
Source notes (3)
- Cross-reference हब. 2:19;भज. 135:15-18.
- Cross-reference कह. 16:15.
- Cross-reference अय्यू. 12:10;भज. 115:4-8.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.