Bhadrawahi Bible
कुलुस्सियों 3
ते ज़ैखन तुस मसीह सेइं साथी ज़ींते किये, त सुर्गेरे चीज़ां केरे तोपी मां राथ, ज़ैड़ी मसीह मौजूदे ते परमेशरेरे देइने पासे बिशोरोए। धेरतरे नईं पन सुर्गेरे चीज़न पुड़ ध्यान लाथ। किजोकि तुस त मरे, ते तुश्शी ज़िन्दगी मसीह सेइं साथी परमेशरे मां छ़पोरीए। ज़ैखन मसीह ज़ै इश्शी ज़िन्दगीए, बांदो भोल्हो, तैखन तुस भी तैस सेइं साथी महिमा साथी बांदे किये गाले।
पुरानी ते नंव्वी ज़िन्दगी
एल्हेरेलेइ अपने तैन अंगन मैरी देथ, ज़ैना धेरती पुड़ आन, मतलब बदमाशी, गन्दगी, बुरे खियाल, बुरी खुवैइश ते लालच़े ज़ैन मूरती पूज़ने बराबरे। इन केरे वजाई सेइं परमेशरेरो क्रोध हुक्म न मन्ने बालन पुड़ एइते। ते तुस भी, ज़ैखन इन बुरैइयन मां ज़िन्दगी बीताते थिये, त इन केरे मुताबिक च़लते भी थी। पन हुनी तुस भी इन सेब्भन मतलब क्रोध, सरक, बैर, तुहीन, गैई देनी इना सब गल्लां शारा। एक्की होरि सेइं झूठ न ज़ोथ किजोकि तुसेईं पुरानी इन्सानयत तैसेरे कम्मन समेत खोलोरीए। ते नव्वीं इन्सानयत लेवरीए ज़ै अपने बनाने बालेरे रूपेरे मुताबिक ज्ञान हासिल केरनेरे लेई नंव्वी बनातीए। तैस मां न कोई यूनानी राव, न यहूदी, न बगैर खतने बालो, न जंगली, न स्कूती, न गुलाम न आज़ाद, सिर्फ मसीह सब किछ ते सेब्भन मांए।
एल्हेरेलेइ परमेशरेरे च़ुनोरां केरे ज़ेरे ज़ैना पवित्र ते ट्लारेन, बड़ी करुणा, ते भलियाई, ते दीनता, ते नम्रता, ते बरदाशत धारण केरा। ते अगर केन्ची, केन्ची पुड़ दोष लांनेरी वजा भोए, त एक्की होरेरी झ़ैल्लां, ते एक्की होरेरे पाप माफ़ केरा, ज़ेन्च़रे प्रभुए तुश्शे पाप माफ़ केरे, तेन्च़रे तुस भी केरा। इन सेब्भन करां बा प्यारे ज़ै सेब्भन सिद्धतारो पटकोए बन्धा। ते मसीहेरी शान्ति ज़ेसेरे लेई तुस अक जान भोनेरे लेई कुजेवरे भी आथ, तुश्शे दिलन मां राज़ केरे, ते तुस शुक्र केरते राथ। मसीहेरे वचन अपने दिलन मां रोड़ेच़ारे बस्सने देथ; ते सारे ज्ञाने सेइं एक्की होरि शिखाला, ते नसीहत देथ, ते अपने-अपने मन्न मां अनुग्रहे साथी परमेशरेरे लेई भजन ते स्तुति ते आत्मिक गीत ज़ोते राथ। ते वचन या कम ज़ैन किछ भी केरा सब प्रभु यीशुएरे नंव्वे सेइं, ते तैसेरे ज़िरिये बाजी परमेशरेरू शुक्र केरा।
नंव्वे ज़िन्दगरे परिवारे मां नियम
हे कुआन्शव, ज़ेन्च़रे प्रभु मां जाइज़े, तेन्च़रे अपने-अपने मुन्शां केरे अधीन राथ। हे मुन्शव, एपनी-एपनी कुआन्शन सेइं प्यार रखा, ते तैन सेइं सखत बर्ताव न केरा। हे बच़ाव, सेब्भी गल्लन मां अपने-अपने अम्मा बाजी केरो हुक्म मन्ना, किजोकि प्रभु इस सेइं खुश भोते। हे बच्चन बालव, अपने बच्चन तंग न केरा, एरू न भोए कि तैन केरि हिम्मत न ट्लुटे। हे सेवकव, ज़ैना जिसमेरे मुताबिक तुश्शे मालिकन, सेब्भी गल्लन मां अपने मालिकां केरो हुक्म मन्ना, मैन्हन खुश केरनेरे बालां केरे ज़ेरे हिरानेरे लेई नईं, पन सच़्च़े मने सेइं ते परमेशरेरे डरे सेइं। ते ज़ैन किछ तुस केरतथ, तैन मने सेइं केरा, इन समझ़तां कि मैन्हु केरे लेई नईं पन प्रभुएरे लेई केरतथ। किजोकि तुस ज़ानतथ कि तुसन एसेरे बदले प्रभु करां बदले मां मीरास मैल्लनीए, तुस प्रभु यीशु मसीहेरी सेवा केरतथ। किजोकि ज़ै बुराई केरते, तैस एपनी बुरैइयरो फल मैलनोए; तैड़ी केन्चरी तरफदारी नईं।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.