Bhadrawahi Bible
कुलुस्सियों 1
अभिवादन
अवं पौलुस ई चिट्ठी लिखने लगोरोईं, अवं परमेशरेरी मेर्ज़ी सेइं मसीह यीशुएरो प्रेरित आईं, ते विश्वासी ढ्ला तीमुथियुस भी मीं साथीए। मसीह मां तैन पवित्र ते विश्वासी ढ्लां केरे नंव्वे ज़ैना कुल्लुसे नगरे मां रहतन।
इश्शो बाजी परमेशर तुसन अनुग्रह ते शान्ति देतो राए।
शुक्रेरी प्राथना
अस ज़ैखन तुश्शे लेई प्राथना केरतम त अपने प्रभु यीशु मसीहेरे बाजी, परमेशरेरू शुक्र केरतम। किजोकि असेईं शुनोरूए, कि मसीह यीशु पुड़ तुश्शो विश्वासे, ते तुस सेब्भी पवित्र लोकन सेइं प्यार केरतथ। तैस उमीद कियोरी चीज़रे वजाई सेइं ज़ै तुश्शे लेई सुर्गे मां रख्खोरीए, ज़ेसेरे बारे मां तुसेईं तैस खुशखेबरारे सच़्च़े वचने सेइं शुनू, ज़ैन तुसन कां पुज़ोरूए। ते ज़ेन्च़रे दुनियाई मां भी फल आनते, ते बद्धतो गाते; मतलब ज़ैस दिहैड़ी करां देंतू तुसेईं तैन शुनू, ते सच़्च़ैई सेइं परमेशरेरो अनुग्रह पिशानो, तुसन मां भी एरू केरि बटते। तैसेरी शिक्षा तुसेईं इश्शे ट्लारे मद्दतगार इपफ्रासे करां हासिल की, ज़ै इश्शे लेई मसीहेरो वफादार सेवके। तैने तुश्शे प्यारेरे बारे ज़ोवं ज़ै होरि लोकां केरे लेईए, ज़ै पवित्र आत्मा मांए तुसन दित्तोरोए।
एल्हेरेलेइ ज़ैस दिहैड़ी करां इन शुनू, त असेईं हमेशा तुश्शे लेई प्राथना की, कि परमेशरेरी आत्मा तुसन अक्ल ते समझ़ दे ज़ैस सेइं तुस तैसेरी मर्ज़ी पूरे तरीके सेइं सेमझ़ी बटेले। ताके तुस तेरही ज़िन्दगी ज़ीथ ज़ेरि प्रभुएरे लोकेईं ज़ीयोरी लोड़े, ते तुस प्रभुए हर बत्तां खुश केरथ, ताके तुस लगातार हर किसमेरी भलियाई केरते राथ, ते परमेशरेरी पिशानी मां बद्धते गाथ। अवं प्राथना केरताईं कि परमेशर अपनि महिमारे शेक्तरे इस्तेमाल केरनेरे ज़िरिये तुसन मज़बूत केरे, ताके तुस आनन्दे ते सबरी सेइं दुख झ़ेल्ली बटतथ। बाजी परमेशरेरू शुक्र केरते राथ, ज़ैने अस इस काबल बनाए कि सुर्गेरे राज़्ज़े मां तैसेरे अपने लोकन सेइं साथी विरासती मां हिसेदार भोम। किजोकि तैने अस शैतानेरे अधिकारे मरां छुटेइतां अपने ट्लारे मट्ठेरे राज़्ज़े मां आने परमेशरेरे अपने मट्ठेरे बलिदाने सेइं असन पापां केरि माफ़ी दित्ती (यानी शैतानेरे राज़्ज़े करां आज़ाद किये)।
मसीह महान आए ते तैसेरां कम्मां
परमेशरे त कोई न लेही बटे, पन ज़ैखन तैसेरू मट्ठू मैन्हु बनू त तैनी परमेशर लोकन पुड़ बांदो कियो, ज़ैन किछ परमेशरे बनाव तैस पुड़ तैस कां सेब्भना जादे अधिकारे। किजोकि ई तै (मसीह) थियो ज़ैने सब किछ बनानेरे वक्ते परमेशरे सेइं कम कियूं, चाए अम्बरे पुड़ भोन या धेरती पुड़ भोन, लेवहरी भोन या आलेई, कुन तखत भोन, या रियासतां, कुन हुकूमतां भोन या अधिकार, सैरी चीज़ां तैस्से सेइं ते तैसेरेलेइ बनेइ। ते मसीह सेब्भी चीज़ां बनाने करां पेइलो थियो, ते सब चीज़ां तैस मां बनोरी रैतिन। तैए कलीसियारो प्रधाने ज़ै तैसेरी जाने; तैए पेइलोए ते मुड़दन मरां ज़ींतो भोने बालन मरां पेइलोए कि सेब्भी गल्लन मां तैए प्रधान भोए। किजोकि बाजी परमेशर इस्से मां खुशी भोते कि मसीह मां तैसेरे सारे सुभाव बास केरतन। परमेशरे फैसलो कियो कि अपने मट्ठे भेज़े, ज़ैने अपनो खून बगाव ते क्रूसे पुड़ अपनि जान दित्ती। परमेशरे सेब्भी चीज़न सेइं मेल मलाप केरनेरे लेई एन कियूं। एन्च़रे तैनी मसीहेरे ज़िरिये सेइं सेब्भी चीज़ां केरो मेल मिलाप एप्पू साथी कियो, चाए तैना धेरतरी भोन, चाए सुर्गेरी भोन।
ते तुस ज़ैना पेइले परमेशरे करां दूर थिये, ते बुरे कम्मन सेइं मने सेइं बैरी थी। फिरी भी परमेशर अपने मट्ठे यीशुएरे मैन्हु बन्ने सेइं ते क्रूसे पुड़ मौतरे ज़िरिये तुश्शो मेल कराव, ताके तुसन एप्पू कां पवित्र ते बे दाग ते बेइलज़ाम हज़ार केरे। पन तुस मसीह पुड़ विश्वास केरनेरे मां बुनियादरे ज़ेरे मज़बूत राथ, ते तैस खुशखेबरारे उमीदी पुड़ ज़ै तुसेईं शुनोरी एन शारथ, ज़ेसेरो प्रचार अम्बरे करां बुन सैरी सृष्टि मां कियो जेव; ते ज़ैस मां अवं पौलुस सेवक बनो।
कलीसियारो सेवक-पौलुस
हुनी अवं तैन दुखन सेइं खुशी आईं, ज़ैना तुश्शे लेई झ़ल्लताईं, ते मसीहेरी दुखां केरि घटी तैसेरे जानरे लेई, मतलब कलीसियारे लेई, अपने जिसमे मां पूरी केरताईं। ज़ेसेरो अवं परमेशरेरे इंतज़ामेरे मुताबिक सेवक बनो, ज़ै तुश्शे लेई मीं सौंफो, ताके अवं परमेशरेरू वचन पूरो-पूरो प्रचार केरि। मतलब तैस भेदे ज़ै ज़ुमाना ते पीढ़न करां छ़पोरो थियो, पन हुनी तैसेरे तैन पवित्र लोकन पुड़ बांदो भोवरोए। ज़ैन पुड़ परमेशरे बांदो केरनो चाव, कि तैन ज्ञान भोए होरि कौमन मां तैस भेदेरी महिमारी कीमत कुने ते तै ईए, कि मसीह ज़ै महिमारी उमीदे तुसन मां रहते। ज़ेसेरो प्रचार केरतां अस हर एक्की मैन्हु ज़ोतम ते सारे ज्ञाने सेइं हर एक्की मैन्हु शिखालतम, कि अस हर एक्की मैन्हु मसीह कां सिद्ध केरतां पेश केरम। ते एल्हेरेलेइ अवं तैसेरी शेक्तरे मुताबिक ज़ै मीं मां शेक्ति सेइं साथी अस्सर केरतीए तन मन लेइतां मेहनत भी केरतम।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.