Bhadrawahi Bible
प्रेरितां केरां कम्मां 25
फेस्तुसे कां पौलुस
फेस्तुस तैस इलाके मां पुज़तां ट्लेइ दिहैड़ना बाद कैसरिया नगरेरां यरूशलेम नगरे मांजो जेव। ज़ैड़ी प्रधान याजकेईं ते यहूदी लीडर तैस कां एइतां पौलुसेरे खलाफ दोष लाने लगे। तैना तैस कां मिन्नत केरने लगे, कि लूशी पौलुसे यरूशलेम नगरे मां हाज़र भोनेरो हुक्म दे, द्रासले मां तैनेईं तैस बत्तां मारनेरी साज़िश कियोरी थी। फेस्तुसे जुवाब दित्तो, “पौलुस कैसरिया नगरे मां कैदे, ते अवं भी तैड़ी लूशी गाने बालोईं।” फिरी ज़ोवं, “कि तुसन मरां किछ खास अधिकार रखनेबाले मीं सेइं साथी च़लन, अगर सच़्च़े तैनी कोई गलत कम कियेरू भोए त तैस पुड़ दोष लान।”
ते फेस्तुस अठ दश दिहाड़े यरूशलेम नगरे मां राव, ते फिरी कैसरिया नगरे जो च़लो जेव, तैड़ी तै दूइयोवं दिहाड़े आदालतरे तखते पुड़ बिश्शो, ते हुक्म दित्तो कि पौलुसे हाज़र केरा। ज़ैखन पौलुस हाज़र भोव, त यरूशलेम नगरेरे यहूदी लीडरेईं तैस च़ुफुरते घेरो देइतां बड़े झूठे इलज़ाम लांने शुरू किये। पन कोई पक्कू सबूत न मैल्हू। पौलुसे अपनि सफाई देंते बार यहूदी केरे झूठे इलज़ामा केरे लेई इन्कार कियो, ते ज़ोवं, “मीं त यहूदी केरे कानूनेरे खलाफ कोई कसूर नईं कियोरो, ते न मन्दरेरे खलाफ ते न महाराज़ेरे खलाफ कोई कसूर कियोरोए।” पन फेस्तुस एप्पू यहूदी लीडरन खुश केरनेरे लेई पौलुसे पुछ़ू, “तीं यरूशलेम नगरे जो गानू मन्ज़ूरे, ताके अवं एस मुकदमेरो फैसलो तैड़ी केरि?” पौलुसे ज़ोवं, “अवं इड़ी महाराज़ेरे न्यायेरे तखतेरे सामने खड़ो आईं, ते मेरे मुकदमेरो फैसलो इस्से ठैरी भोवरो लोड़ते, ज़ैड़ी रोमी मैन्हेरो न्याय भोवरो लोड़े, तू एप्पू भी रोड़ेच़ारे ज़ानतस कि मीं यहूदी केरो कोई कसूर नईं कियोरो। अगर अवं कसूरवार आईं त मौतरी सज़ाहरे काबल आईं त मेरो मरनेरो इन्कार नईं, पन अगर ज़ैना झूठे इलज़ाम यहूदी मीं पुड़ लांने लगोरेन ते अगर तैना झूठेन त केन्ची हक नईं कि मीं तैन केरे हवाले केरे। ते अवं इड़ी महाराज़े कां बिनती केरताईं, कि मेरो न्याय इड़ी कियो गाए।” तैखन फेस्तुस सलहकारन करां मुशोरो केरतां जुवाब दित्तो, “तीं महाराज़े कां बिनती कियोरीए त तू महाराज़े कां गालो।”
राज़ो अग्रिप्पारे सामने पौलुस
किछ दिहैड़ना बाद अग्रिप्पा राज़ो ते तैसेरी निकड़ी बेइन बिरनीके कैसरिया नगरे मां एइतां फेस्तुसे सेइं मुलाकात की। तैन केरे बड़े दिहाड़े तैड़ी रानेरे बाद फेस्तुसे पौलुसेरे बारे मां राज़े ज़ोवं, “अक मैन्हु आहे, ज़ै फेलिक्से कैद कियोरोए। ज़ैखन अवं यरूशलेम नगरे मां थियो, त प्रधान याजक ते यहूदी बुज़ुर्ग तैस पुड़ दोष लगे लाने, कि एस सज़ाह दित्ती गाए। पन मीं तैन ज़ोवरू थियूं, कि रोमी केरे दस्तूरेरे मुताबिक कोई मैन्हु सज़ाह देनेरे लेई हवाले न कियो गाए, ज़ांतगर तैस अपने मुदेइ केरे सामने तैन इलज़ामा केरे बारे मां अपनि सफाई पेश केरनेरो मौको न दित्तो गाए। एल्हेरेलेइ ज़ैखन यहूदी लीडर इड़ी आए, त मीं ठढ न लाई, पन होरसां न्यायेरे तखते पुड़ बिशतां हुक्म दित्तो, कि पौलुस आदालती मां आनो गाए। ज़ैखन तैसेरे मुदेइ अपनो दाओ पेश केरनेरे लेई खड़े भोए त, तैनेईं कोई एरो इलज़ाम तैस पुड़ न लाव, ज़ेसेरे बारे मां अवं समझ़तो थियो। पन अपने फिरकेरे बल्के तैन केरि लड़ाई तैन केरे अपने धर्मेरे केन्ची यीशु नव्वेंरे मैन्हेरे बारे मां थी। तै मेरि जेवरोए, पन पौलुस तैस जो ज़ींतो ज़ोते। अवं बेड़ि उलझनी मां राहोरोइं कि केन्च़रे एन गल्लां केरो पतो केरि, एल्हेरेलेइ मीं पौलुसे पुछ़ू, कि तीं यरूशलेम नगरे मां गानू मन्ज़ूरे, ताके एन गल्लां केरो फैसलो तैड़ी भोए? पन पौलुसे बिनती कमाई कि इस मुकदमेरो फैसलो महाराज़े कां लोड़ते भोवरो, एल्हेरेलेइ मीं हुक्म दित्तो कि तै महाराज़े कां गाने तगर इड़ी पाबंद राए।” अग्रिप्पा राज़े फेस्तुसे सेइं ज़ोवं, “अवं भी एस मैन्हेरी गल्लां शुन्नी चाताईं।” तैनी जुवाब दित्तो, “तू तैसेरी गल्लां कालां शुनी सखतस।”
होरसां अग्रिप्पा राज़ो ते कने बिरनीके बड़े शानी सेइं आए, ते फौजी पलटनरे सरदारेइं ते नगरेरे खास लोक सभा मां दाखल भोए, फेस्तुसे हुक्म दित्तो कि पौलुसे हाज़र केरा। फिरी फेस्तुसे ज़ोवं, “हे अग्रिप्पा राज़ा ते बाकी लोकव तुस इस मैन्हु हेरतथ एसेरे खलाफ सैरी यहूदी कौमां मीं कां यरूशलेम नगरे मां भी ते इड़ी भी चिन्डां मैरतां दरखुवास कियोरी थी, कि ऐह मैन्हु ज़ींतो रखनो ठीक नईं। पन मीं पतो लगो कि एनी कोई एरू गलत कम नईं कियेरू, कि ऐह कत्ल कियो गाए, एल्हेरेलेइ एनी इड़ी बिनती कियोरीए, त अवं ठीक समझ़ताईं कि एस रोम नगरे मां भेज़ी। पन मीं तैसेरे बारे मां कोई ठीक गल न मैल्ही, कि महाराज़े जो लिखी, एल्हेरेलेइ मीं तै तुश्शे सामने ते खास केरतां अग्रिप्पा राज़ा, तेरे सामने पेश कियोरोए, ताके पुछ़ गन केरनेरे बाद अगर कोई खास गल भोए त अवं लिखी। किजोकि केन्ची कैदी भेज़ते बार तैसेरे इलज़ाम अगर अवं केन्ची न शुनेई त मेरी लेई ठीक नईं।”
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.