Bhadrawahi Bible
प्रेरितां केरां कम्मां 24
गवर्नर फेलिक्सेरे सामने पौलुस
पंच़े दिहैड़ना बाद हनन्याह महायाजके किछ बुज़ुर्ग ते तिरतुल्लुस नंव्वेरो वकील साथी कैसरिया नगरे मां पुज़े, ते गवर्नरे कां पेश भोइतां पौलुसेरे खलाफ फरियाद कमाई। ज़ैखन पौलुस पेश कियो त तिरतुल्लुस इलज़ाम लेइतां ज़ोने लाव, “हे महान फेलिक्स, तेरे वजाई सेइं अस बड़े खुशी सेइं रहतम, ते तेरे ज़िरिये सेइं इस कौमरी केत्री बुरैई सुधैरी गैतिन। एन अस हर ठैरी हर किसमे सेइं मन्तम। पन हुनी अवं तेरो जादे वक्त नेनो न चैईं, अवं तेरी मिन्नत केरताईं कि महरबानी केरतां इश्शी अक दूई गल शुन। असेईं लाहेरूए कि ई मैन्हु बड़ो फसाद केरनेबालोए, ई दुनियारे सारे यहूदन मां फितनाबाज़े, ते नासरी कुपंथेरो प्रधाने। एनी त मन्दरे भी अशुद्ध केरनेरी कोशिश की, ते एल्हेरेलेइ असेईं ऐह ट्लेइतां एस पुड़ अस अपने कानूनेरे मुताबिक मुकदमो च़लानो चाते थिये। पन फौजी पलटनरो सरदार लूसियास असन करां ज़बरदस्ती नेही जेव। ते इस पुड़ दोष लाने बाले तीं कां हाज़र भोनेरो हुक्म दे। इन सेब्भी गल्लां केरे बारे मां अस एस पुड़ दोष लातम, तू एप्पू सच़ ज़ान।” यहूदी लोकेईं भी तैस सेइं साथी भोइतां ज़ोवं, कि एना गल्लां केन्च़रां भोइ सेकतिन।
पौलुसेरो एगरोरां जुवाब
ज़ैखन गवर्नरे पौलुसे बियान देनेरे लेई इशारो कियो, त पौलुसे जुवाब दित्तो, “अवं ज़ानताईं कि तू केही सालां केरो देंतो इस कौमरो न्याय केरनेबालो आस, एल्हेरेलेइ अवं अपनि सफाई तीं कां पेश केरताईं। तू एप्पू पतो केरि सखतस कि अवं 12 दिहाड़े पेइले यरूशलेम नगरेरे मन्दरे मां आराधना केरनेरे लेई जेवरो थियो। मेरे मुदेइयेइं अवं मन्दरे मां केन्ची सेइं भी बेंस केरतो नईं लाहोरो, ते प्राथना घरे मां ते नगरे मां इरां उरां लड़ाई केरतो भी नईं लाहोरो। हुनी एना इलज़ाम ज़ैना मीं पुड़ लांने लगोरेन, ते तेरे सामने साबत न केरि सखे। हाँ अवं इकरार ज़रूर केरताईं कि ज़ैस पंथे एना कुपंथ ज़ोतन, अवं तैसेरे मुताबिक अपने दादे-पड़दादां केरे परमेशरेरी आराधना केरताईं, ते ज़ैन किछ मूसेरे कानूने ते नेबी केरि किताबी मां लिखेरूए, तैन सेब्भन पुड़ मेरो विश्वासे। अवं परमेशरे पुड़ तैए भरोसो रखताईं, ज़ै तैना रखतन कि धर्मी लोकन ते पापी लोकन परमेशर मुड़दन मरां ज़ींतो केरेलो। ते एल्हेरेलेइ मेरो ज़मीर परमेशरे कां भी ते इन्साने कां भी बेइलज़ाम राए। केही सालां केरे बाद अवं अपने गरीब लोकन दान पुज़ाने, ते च़ढ़तल च़ाढ़ने एवरो थियो। तैखन एनेईं अवं मन्दरे मां लाव, त अवं शुद्ध भोनेरी रीत पूरी केरने लगोरो थियो, बगैर लोक अकोट्ठे केरतां ते बगैर कोन्ची हंगामे इन कम केरतो लाव। पन तैना आसिया इलाकेरे किछ यहूदी थी, ते तैन जाइज़ थियूं। अगर मीं किछ गलत कियोरू भोथू त तैनेईं इड़ी तेरे सामने मीं पुड़ दोष लेवरो लोड़तो थियो, किजोकि तैनेईं एप्पू लाहेरूए कि मीं मन्दरे मां कुन कियूं। इना लोक ज़ैना इड़ी एवरेन, एना ज़ोन कि ज़ैखन अवं महासभा मां पेश भोवरो थियो, त एनेईं मीं मां कुन कसूर लाहोरो थियो? सुवाए इस गल्लरे कि ज़ै मीं बड़े ज़ोरे सेइं आवाज़ देइतां ज़ोवरी थी, कि अवं ई विश्वास केरताईं परमेशर मुड़दन ज़ींते केरते, एल्हेरेलेइ मीं पुड़ मुकदमो च़लाने लगोरेन।”
फेलिक्स ज़ै इस पंथेरे बारे मां ठीक-ठीक ज़ानतो थियो, एन ज़ोइतां मुकदमो बंद कियो, “ज़ैखन फौजी पलटनरो सरदारे लूसियास इड़ी एज्जेलो त अवं तुश्शे सामने इस मुकदमेरो फैसलो केरेलो।” तैनी सूबेदारे हुक्म दित्तो, कि पौलुसे पेरहे मां रखा, ते तैसेरे दोस्तन मरां केन्ची भी तैसेरी सेवा केरनेरे लेई न रोकथ।
फेलिक्स ते द्रुसिल्लारे सामने पौलुस
केही दिहैड़ना बाद गवर्नर फेलिक्स अपनि कुआन्श द्रुसिल्ला ज़ै यहूदी थी, तै तैस सेइं साथी कैसरिया मां अव, तैनी पौलुसे जो समाद भेज़ो ते यीशु मसीह पुड़ विश्वास केरनेरे बारे मां गल्लां शुनाए। ज़ैखन पौलुसे एन ज़ोवं, कि परमेशरेरी नज़री मां कुन रोड़ूए ते अपने इच्छा कैबू केरनेरे बारे मां ते एजने बाले परमेशरेरे न्यायेरे बारे मां भी ज़ोवं, त फेलिक्स डेरि जेव, ते ज़ोने लगो, “हुनी तू गा, अगर फुर्सत मैल्हेली त अवं तीं फिरी तीं कुजेइलो।” तैस पौलुसे करां किछ मैल्हनेरी उमीद थी, एल्हेरेलेइ तै तैस बार-बार कुजातो थियो, ते तैस सेइं गल्लां केरतो थियो। पूरे दूई सालना बाद पुरकियुस फेस्तुस, फेलिक्सेरे ठैरी गवर्नर बनो, ते फेलिक्से यहूदी खुश केरनेरे लेई पौलुस कैदखाने मां रख्खो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.