Bhadrawahi Bible
2 तीमुथियुस 4
ज़ैखन मसीह यीशु राज़ेरो ज़ेरो राज़ केरने एज्जेलो त तै ज़ींते ते ज़ैना मर्रेन, लोकां केरो न्याय केरेलो, अवं तीं परमेशरे ते मसीहे गवाह रेखतां हुक्म देताईं। कि तू परमेशरेरू वचन प्रचार केर, वक्त बे वक्ते तियार रा, तू लोकन ज़ैना बुरां कम्मां तैनेईं कियां हिरा, तैन केरे पापां केरे लेई तैन झ़िड़क पन तैन होसलो भी दे ते तैन सबरी सेइं शिखाल। किजोकि एरो वक्त एजनोए, कि लोक रोड़ी शिक्षा न शुन्नी चाले, पन तैना अपने मेर्ज़ी पुड़ च़लनू चाले ते तैना अपने लेई बड़े उस्ताद तोपेले ज़ैना तैन सेइं तैन ज़ोन ज़ैन तैना शुन्नू चातन। तैना तैन करां शुन्नू न चाले ज़ैना परमेशरेरू सच़्च़ू वचन शुनातन पन तैना झूठी कहैनी शुन्नी चाले (ज़ैना मैन्हु केरि बनेवरिन)। पन तू अपनो आप कैबू मां रख चाए किछ भी की न भोए, इस मां तीं ज़ैना भी दुख भी झ़ैल्लने पेन त झ़ल्ल, खुशखबरी शुनानेरे लेई बड़ो प्रचार केर, ते ज़ैन कम परमेशरे तीं केरनेरे लेई दित्तोरू तैन पूरे केर।
अवं इना हुक्म तीं देताईं किजोकि मेरी ज़िन्दगी ते परमेशरेरे लेई कम खतम भोवरूए किजोकि अवं ज़ानताईं अवं जल्दी मरेलो। मीं जंगी मां रोड़ो सिपेहेरे ज़ेरे ज़ै लड़ाई केरने मां कधी हार न मन्ने, तू भी मसीहेरे लेई बड़ी मेहनत केरनि कधे हिम्मत न हार, मीं तैन कम पूरू कियूं ज़ैन मसीह यीशुए मीं केरनेरे लेई दित्तोरू थियूं, मीं वफादैरी सेइं खुशखबरी प्रचार की। हुनी, प्रभुएरे मेरे लेई सुर्गे मां इनाम रखेरू किजोकि मीं तैस खुश केरनेबाली ज़िन्दगी ज़ीयोरीए। प्रभु ज़ै धर्मी न्याय केरनेबालोए मीं इन इनाम तेइस देलो ज़ेइस तै वापस न्याय केरनेरे लेई एज्जेलो। पन इन इनाम सिर्फ मेरे लेई नईं, पन तैन सेब्भी केरे लेई भी आहे, ज़ैना तैसेरे एजनेरी बड़ी इच्छा रखतन।
खास बिस्तार
मीं कां जल्दी एजनेरी कोशिश केर। किजोकि देमासे इस दुनियारी चीज़न सेइं प्यार केरतां अवं शारो, ते तै थिस्सलुनीके नगरे जो च़लो जेव, ते क्रेसकेंस गलातिया इलाके जो जेव ते तीतुस दलमतिया इलाके जो च़लो जेव। सिर्फ लूका मीं सेइं साथीए, ज़ैखन तू एजस त मरकुसे भी एप्पू सेइं साथी एना, किजोकि तै इड़ी मेरे मद्दत केरनेरे काबले। तुखिकुस मीं इफिसुस नगरे जो भेज़ोरोए। ज़ैखन तू एजस त तै चोगो एना ज़ै मीं त्रोआस नगरे मां मरकुसेरे घरे रखोरोए। ते मेरे चर्मपत्र भी एना, खास केरतां तै ज़ै छ़ेल्ली केरे खेड़ू सेइं बनोरोए। सिकन्दर ताम्बेरू कम केरनेबाले मीं बड़े बारे दुख दित्तोरोए, प्रभु तैस तैसेरे बुरे कम्मां केरे मुताबिक बदलो देलो। तू भी तैस करां खबरदार रा, किजोकि तैने इश्शे शिक्षारी बड़ी खलाफत की ज़ै मसीहेरे बारे मांए। ज़ैखन पेइले बार अवं आदालती मां अपनो आप बचाव केरनेरे लेई जेवरो थियो त कोई भी मीं सेइं साथी न थियो। पन तैना सारे मीं शैरतां च़ले जे, परमेशर इन तैन केरे खलाफ न गने। अवं प्राथना केरताईं परमेशर तैन हछु माफ़ केरे। पन प्रभु मेरो मद्दतगार राव, तैने मीं हिम्मत दित्ती, ते अवं यीशु मसीहेरी खुशखबरी शुनानेरे काबल भोव कि सारे गैर कौमां केरे लोक शुन्न, ते तैने अवं मौती करां एन्च़रे बच़ाव ज़ेन्च़रे शेरे करां। ते प्रभु मीं हर एक्की बुरे हमले करां बच़ालो ते अपने सुर्गेरे राज़्ज़े मां हिफाज़ती सेइं पुज़ालो, सारे महिमा हमेशा-हमेशा परमेशरेरी भोती राए। आमीन।
आखरी नमस्कार
मेरू नमस्कार प्रिस्का ते तैसेरे घरे बाले अक्विला ते कने उनेसिफुरूसेरे घराने दे। इरास्तुस कुरिन्थुस नगरे मां राहोरोए, ते त्रुफिमुस मीं मीलेतुस नगरे मां बिमार शारोरोए। हिवंतड़ेरे पेइले एजनेरी कोशिश केर, ते यूबूलुस ते पूदेंस ते लीनुस ते क्लौदिया, ते इठेरे सारे विश्वासी लोकेईं नमस्कार भेज़ोरूए।
अवं प्राथना केरताईं प्रभु तीं सेइं साथी भोए, ते तैसेरो अनुग्रह तुसन सेब्भन पुड़ भोतो राए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.