Bhadrawahi Bible
2 इतिहास 8
सुलैमान राज़ेरी कामयाबी
सुलैमान राज़े यहोवारो भवन ते अपने मेहल बनाने मां 20 साल लग्गे। तैखन ज़ैना नगर सोर नगरेरे राज़े हीरामे सुलैमान राज़े दित्तोरे थिये, सुलैमाने तैन केरि मरम्मत करेइतां तैन मां इस्राएली लोक बसाए।
तैखन सुलैमाने सोबा प्रदेशेरे हमात नगरे पुड़ हमलो कियो ते तैस पुड़ कब्ज़ो कियो। तैनी तदमोर नगर ज़ैन सुनसान ठैरी मां आहे, ते हमात प्रदेशेरे सारे भण्डार नगरां केरि मरम्मत की। फिरी तैनी बेइयें ते बुनीयें दूईये बेथोरोन नगरां केरि शहरपनाह बनेई ते मज़बूत फाटकन सेइं मरम्मत की। तैनी बालात नगर ते सुलैमानेरे ज़ेत्रां भण्डार-नगर थियां ते तैसेरां रथां ते सुवारां केरे ज़ेत्रां नगरां थियां तैना, ते ज़ैन किछ सुलैमाने यरूशलेम, लबानोन ते अपने हुकूमतरे सारे मुल्खे मां बनानू चावं, तैन सब बनावं। हित्ती, एमोरी, परिज्जी, हिब्बी ते यबूसी कुलां केरे बच़ोरे लोक ज़ैना इस्राएली न थिये, तैन केरे खानदानेरे लोक ज़ैना तैन केरे मुल्खे मां रेइजे, ज़ैन केरो अन्त इस्राएली लोकेईं न थियो कियोरो, तैन मरां बड़े मैन्हु सुलैमाने गुलाम मज़दूर रख्खे ते अज़ तगर तैन केरि एरी हालते। पन इस्राएली लोकन मरां सुलैमाने अपनु कम केरनेरे लेई कोई दास न बनाव, तैना त तैसेरे सेना मां सिपाही ते हाकिम, ते तैसेरे अधिकारी ते तैसेरे रथां ते सुवारां केरे प्रधान भोए। सुलैमानेरे अधिकैरी केरे प्रधान ज़ैना लोकन पुड़ निगरानी केरनेबाले थिये, तैना 250 थिये।
फिरी सुलैमाने फ़िरौनेरी कुई दाऊदपुरे मरां तैस मेहले मां आनोरी थी ज़ै तैनी तैसारे लेई बनेवरो थियो, किजोकि तैनी सोचू, “ज़ैस-ज़ैस ठारी मां यहोवारो सन्दूख एवरोए, तै पवित्रे, एल्हेरेलेइ मेरी रानी इस्राएलेरे राज़े दाऊदेरे मेहले मां रेइ न सके।”
तैखन सुलैमाने यहोवारी तैस वेदी पुड़ ज़ै तैनी ओसारे सामने बनेवरी थी, यहोवा जो होमबलि च़ाढ़ी। तै मूसेरे हुक्मे ते रोज़ेरे नियमेरे मुताबिक, आरामेरे दिहाड़े ते नंव्वे चाँदेरे दिहाड़े ते हर साल ट्लेइ बार ठहरावरां तिहारां मतलब अखमीरी रोट्टरू तिहार, ते हफतां केरू तिहार, ते झोफड़ी केरे तिहारे मां बलि च़ाढ़ते थिये। तैनी अपने बाजी दाऊदेरे नियमेरे मुताबिक याजकां केरे सेवारे कम्मां केरे लेई तैन केरि टोली बनेई, ते लेवी तैन केरे कम्मन पुड़ ठहराए, कि रोज़ेरे मुताबिक तैना यहोवारी आराधना ते याजकां केरि मद्दत केरते रान, ते हर एक्की फाटके कां पहरदार टोली बनेइतां ठहराए; किजोकि परमेशरेरे भक्त दाऊदे ऐह हुक्म दित्तोरो थियो। राज़े भण्डारन या कोन्ची गल्लरे बारे मां याजक ते लेवी लोकन ज़ै-ज़ै हुक्म दित्तोरो थियो, तैनेईं तै मन्नो।
एन्च़रे सेइं सुलैमानेरू सारू कम ज़ैन तैनी यहोवारे भवनेरी मुनीयादी करां लेइतां तैसेरे पूरे केरने तगर कियूं तैन पूरू कियूं। एन्च़रां सेइं यहोवारे भवनेरू कम पूरू भोवं।
तैखन सुलैमान एस्योनगेबेर ते एलोत नगरन जो जेव, ज़ैन एदोम मुल्खे मां समुन्दरेरे बन्ने पुड़ आन। हीराम राज़े तैस कां ज़िहाज़ ते समुन्दरेरे ज़ानकार मल्लाह भेज़े, ते तैनेईं सुलैमान राज़ेरे ज़िहाज़ च़लानेबालन सेइं साथी ओपीर नगरे मां गेइतां 15000 किल्लो सोन्नू सुलैमाने कां एन्हतां दित्तू।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.