Bhadrawahi Bible
2 इतिहास 28
आहाज राज़ेरे राज़
ज़ैखन आहाज राज़ो बनो तैखन तैसेरी उमर 20 साल थी, ते तैनी 16 साल यरूशलेम नगरे मां राज़ कियूं। ते अपने पूर्वज दाऊदेरू ज़ेरू कम केरतो न राव, ज़ैन यहोवारी नज़री मां ठीक थियूं, पन तै इस्राएलेरे राज़ां केरि चाली पुड़ च़लतो राव, ते बाल देबतेरी मूरती ढैलतां बनावेईं। ते हिन्नोमेरे मट्ठेरी वैदी मां गुग्गल बालो, ते तैना कौमां केरे भिट्टां कम्मां केरे मुताबिक ज़ैना यहोवा इस्राएली लोकां केरे सामने मुल्खे मरां केढी दित्तोरे थिये, अपने बच्चे अग्गी मां होमबलि केरि दित्ते। मूरती पुज़ारी उच्ची ठारन पुड़, ते पहाड़न पुड़, ते सारे तैन सब्ज़ बुट्टन हैठ बलि च़ाढ़ते ते गुग्गल बालते थिये।
यहूदा पुड़ हमलो
एल्हेरेलेइ तैसेरे परमेशर यहोवा तैना अरामी केरे राज़ेरे हथ्थे किये, ते तैना तैस ज़ींतां, तैसेरे बड़े लोकन कैदी बनेइतां दमिश्क नगरे जो निये। ते तै इस्राएलेरे राज़ेरे कब्ज़े मां दित्तो जेव। ज़ैनी तैन केरि बड़ी सेना मारोरी थी। रमल्याहेरे मट्ठे पेकह, यहूदा मां एक्सां 120000 सिपाही मारे ज़ैना सारे बहादर शूरबीर थिये, किजोकि तैनेईं अपने पूर्वजां केरो परमेशर यहोवा शारोरो थियो। जिक्री नंव्वेरो अक एप्रैमी शूरबीर बहादर मासेयाह नंव्वेरू अक राज़ेरू मट्ठू, ते राज़ेरे मेहलेरो प्रधान अज्रीकाम, ते एल्काना, ज़ै राज़ेरो मंत्री थियो, मैरी छ़डे।
ओदेद नबी
इस्राएली अपने यहूदा मां रानेबाले यहूदी भियालां केरि कौन्शां, मट्ठां ते कुइयां मिलेइतां 200000 लोक कैदी बनेइतां, ते तैन केरि बड़ी लूट नेइतां सामरियारे पासे च़ले जे। पन तैड़ी यहोवारो अक नबी ज़ेसेरू नवं ओदेद थियूं। तै सामरिया जो एजनेबाली सेनाई सेइं ज़ोने लगो, “शुना, तुश्शे दादे-पड़दादां केरे परमेशर यहोवा यहूदी लोकन पुड़ गिथिरकतां तैना तुश्शे हथ्थे मां किये, ते तुसेईं तैना एरे सेरकोइतां नाश किये कि तैन केरि शौर सुर्गे तगर पुज़्ज़ी। हुनी तुसेईं थापोरूए कि यहूदी लोकेईं ते यरूशलेमेरे लोकेईं अपने दास दैसी बनेइतां दबेइतां रख्खे। कुन तुस भी अपने परमेशर यहोवारे पापी न भोए? एल्हेरेलेइ हुनी मेरी शुना ते एन कैदन ज़ैना तुसेईं अपने भियालन मरां गुलाम बनेइतां आनोरेन, वापस देथ, यहोवारो क्रोध त तुसन पुड़ भड़के।” तैखन एप्रैमी लोकां केरे किछ खास मैन्हु मतलब योहानानेरू मट्ठू अजर्याह, मशिल्लेमोतेरू मट्ठू बेरेक्याह, शल्लूमेरू मट्ठू यहिजकिय्याह, ते हदलैरू मट्ठू अमासा, जंगी मरां एजनेबालां केरो मुकाबलो केरतां, तैन सेइं ज़ोने लगे। “तुस एना गुलामन इड़ी न ऐनथ। किजोकि तुसेईं तै गल थापोरीए ज़ेसेरी वजाई सेइं असां यहोवारे सामने पापी भोइ गामेले, ते तैस सेइं इश्शो पाप ते दोष बद्धतो गालो, इश्शो दोष त बड़ोए ते इस्राएले पुड़ बड़ो क्रोध भड़कोरोए।” तैखन तैना हथियारन बालेईं ते लूट अधिकैरी केरे ते सैरी सभारे सामने छ़डी। तैखन ज़ैना मड़दां केरां नंव्वां बहा लिखोरन, तैनेईं उठतां गुलाम ने, ते लुट्टी मरां सारे नग्गे लोकन लिगड़ां, ते जुट्टी लुवेई। ते रोट्टी खुवाई ते पानी पियावं, ते तैन केरे ज़खमन तेल मल्लो। ते तैखन कमज़ोर लोक गधन पुड़ च़ेढ़तां, यरीहो जो ज़ैस जो खजूरां केरू नगर भी ज़ोतन, तैन केरे ढ्लान कां पुज़ेई दित्ते। तैखन तैना सामरिया जो वापस आए।
आहाज राज़े अश्शूरे राज़न करां मद्दत मगते
किछ वक्तेरां बाद आहाज राज़े अश्शूरेरे राज़े कां दूत भेज़तां मद्दत मग्गी। किजोकि एदोमी सेना यहूदा मां एइतां तैना मारोरे थिये, ते कैदी बनेइतां नियोरे थिये। पलिश्ती सेना बुनियों मुल्ख ते यहूदारे दक्षिणेरे नगरन पुड़ हमलो केरतां, बेतशेमेश, अय्यालोन ते गदेरोत, ते अपने-अपने ड्लाव्वन समेत सोको, तिम्नाह, ते गिमजो नगरे पुड़ कब्ज़ो कियो। ते तैन मां राने लगोरे थिये। यहोवा इस्राएलेरे राज़े आहाजेरे वजाई सेइं यहूदा दबेइ दित्तो, किजोकि तै पस्त भोइतां च़लोरो थियो, ते यहोवा सेइं बड़ो धोखो कियोरो थियो। तैखन अश्शूर मुल्खेरो राज़ो तिग्लत्पिलेसेर तैसेरे खलाफ खड़ो भोव, ते तैन बड़ो दुख दित्तो। मज़बूत न कियो। आहाजे यहोवारे भवनेरे ते राज़ेरे मेहले ते हाकिमां केरे घराने मरां रुपेइये केढतां अश्शूर मुल्खेरे राज़े दित्ते, पन एस सेइं तैन केरि किछ मद्दत न भोइ।
आहाज राज़ेरे पाप ते तैसेरी मौत
दुखेरे मौके आहाज राज़े यहोवा सेइं होरो भी धोखो कियो। तैनी दमिश्क नगरेरे देबतां केरे लेई ज़ैनेईं तै हारावरो थियो, बलि च़ाढ़ी। किजोकि तैनी इन सोचू, कि अरामी राज़ां केरे देबतेईं तैन केरि मद्दत की, त अवं भी तैन केरे लेई बलि च़ाढ़ेलो कि तैना मेरी मद्दत केरन। पन तैना तैसेरे ते सारे इस्राएलेरे लेई नाश भोनेरी वजा बने। फिरी आहाजे परमेशरेरे भवनेरां भांडां अकोट्ठां केरतां ट्लोड़ी छ़ड्डां, ते यहोवारे भवनेरां दारां बंद करावां। ते यरूशलेम नगरेरे सारे कून्न मां वेदी बनेई। यहूदारे हर एक्की नगरे मां तैनी बखले देबतन कां गुग्गल बालनेरे लेई उच्ची ठारां बनेई, ते अपने पूर्वजां केरे परमेशर यहोवा सरकाव। तैसेरां बाकी कम्मां, शुरू करां आखरी तगर तैसेरी पूरी चाल च़लनेरे बारे यहूदा ते इस्राएलेरे राज़ां केरे इतिहासेरी किताबी मां लिखेरूए। आखरी मां आहाज अपने दादे-पड़दादां केरो ज़ेरो मेरि जेव, ते तै यरूशलेम नगरे मां दब्बो जेव, पन तै इस्राएलेरे राज़ां केरे कब्रस्ताने मां न दब्बो। तैसेरू मट्ठू हिजकिय्याह तैसेरे जगाई पुड़ राज़ो बनो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.