Bhadrawahi Bible
2 इतिहास 21
यहोरामेरू राज़
ज़ैखन यहोशापात राज़ो अपने दादे-पड़दादां केरो ज़ेरो मेरि जेव, ते दाऊदपुरे मां ज़ैड़ी तैसेरे दादे-पड़दादे दोबोरे थिये तै भी तैड़ी दब्बो जेव। ते तैसेरू मट्ठू यहोराम तैसेरे ठैरी राज़ो बनो। तैसेरे ढ्ला ज़ैना यहोशापातेरां मट्ठां थियां: मतलब अजर्याह, यहीएल, जकर्याह, अजर्याहू, मीकाएल ते शपत्याह; इना सब इस्राएलेरे राज़े यहोशापातेरां मट्ठां थियां। तैन केरे बाजी तैन चाँदी सोन्नू ते कीमती चीज़ां ते बड़े तोफे ते यहूदा मां क़िले बाले नगर दित्तोरे थिये, पन यहोरामे तैनी राज़ दित्तोरू थियूं, किजोकि तैन तैसेरू बड्डू मट्ठू थियूं। ज़ैखन यहोराम अपने बाजी केरे राज़े पुड़ राज़ो बेनतां मज़बूत भोइ जेव, तैखन तैनी अपने सारे निक्के ढ्ला ते इस्राएलेरे किछ हाकिम भी तलवारी सेइं मारे। ज़ैखन यहोराम राज़ो बनो तैखन तैसेरी उमर 32 साल थी, ते तैनी 8 साल यरूशलेम नगरे मां राज़ कियूं। तै इस्राएलेरे राज़ां केरि ज़ेरि चाली पुड़ च़लतो राव, ज़ेन्च़रे अहाबेरो घरानो च़लतो थियो, किजोकि तैसेरी कौन्श अहाबेरी कुई थी। ते तै तैन कम केरतो थियो, ज़ैन यहोवारी नज़री मां बुरूए। फिरी भी यहोवा दाऊदेरू खानदान नाश केरनू न चाव, ई तैस करारेरी वजा थी, ज़ै तैनी दाऊदे सेइं कियोरो थियो। तैस वाधेरे मुताबिक थियूं, ज़ै तैनी तैस सेइं कियोरो थियो, कि अवं एरू केरेलो कि तेरो ते तेरे खानदानेरो दीयो कधी न हिशेलो।
यहोरामेरे राज़ केरनेरे वक्ते मां एदोमे यहूदारी महतैती छ़ेडतां अपने लेई अक राज़ो बनाव। तैखन यहोराम अपने हाकिम ते अपना सारां रथां साथी नेइतां तैड़ी जेव, ते रथां केरे प्रधान मारे। एन्च़रे सेइं एदोम प्रदेशेरे लोक यहूदा प्रदेशेरे कब्ज़े करां छुट्टी जे ते अज़ तगर भी तैना तेन्च़रे। तैस्से वक्ते लिब्ना नगर भी तैसेरी महतैती करां छुट्टी जेव, एन एस वजाई सेइं भोवं, कि तैनी अपने दादे-पड़दादां केरे परमेशर यहोवा शारोरो थियो।
तैनी यहूदारे पहाड़न पुड़ मूरती पुज़ारी उच्ची ठारां बनेई ते यरूशलेम ते यहूदारे लोकन करां परमेशरेरे खलाफ मूरती पूज़ा केरतां पाप कराव।
यहोराम राज़े जो एलिय्याह नेबेरी चिट्ठी
एक्सां एलिय्याह नेबेरी अक चिट्ठी यहोराम राज़े कां अई, “तेरे पूर्वज दाऊदेरो परमेशर यहोवा इन ज़ोते, कि तू ज़ै न त अपने बाजी यहोशापातेरी बत्ती पुड़ च़लो ते न यहूदारे राज़े आसारे बत्ती पुड़ च़लो, बल्के इस्राएलेरे राज़ां केरी बत्ती पुड़ च़लतो राव, ते अहाबेरे घरानेरो ज़ेरो यहूदा ते यरूशलेमेरे रानेबालन करां परमेशरेरे खलाफ पाप करातो राव ते अपने बाजी केरे घराने मरां अपने निक्के ढ्ला मारे ज़ैना तीं करां रोड़े थिये, एस वजाई सेइं यहोवा तेरे लोकन, मट्ठन, कौन्शन ते सारे जाईदाती बुरे तरीके सेइं नाश केरेलो। तू एंट्लोड़ी केरे रोगे सेइं दुखी भोइ गालो, इड़ी तगर कि तैस रोगेरे वजाई सेइं तेरी एंट्लोड़ी रोज़ निस्सी गैली।”
यहोराम राज़ेरे आखरी दिहाड़े
एक्सां यहोवा किछ पलिश्ती ते कूशी लोकन कां रानेबाले अरबी लोक, यहोरामेरे खलाफ भड़काए। तैना यहूदा प्रदेशे पुड़ चढ़ाई केरतां तैस पुड़ ट्लुटतां पे, ते राज़ेरे मेहले मां ज़ेत्री जाईदात मैल्ही, तै सारी ते राज़ेरां मट्ठां ते कौन्शां भी नियां, इड़ी तगर कि तैसेरे निकड़े मट्ठे अहज्याहेरे1 अलावा, तैस कां कोई मट्ठू न राव।
एसेरां बाद यहोवा तै एंट्लोड़ी केरे सखत रोगे सेइं दुखी कियो। दूई सालन मां तैस रोगेरे वजाई सेइं तैसेरी एंट्लोड़ी निसने लेग्गी, ते तै बड़ो दुखी भोइतां मेरि जेव। ते तैसेरे लोकेईं ज़ेन्च़रे तैसेरे दादे-पड़दादां केरे खुशबूदार चीज़ां बैलोरी थी, तेन्च़रे तैसेरे लेई किछ न कियूं। योराम 32 सालां केरि उमरी मां राज़ो बनोरो थियो, ते तैनी यरूशलेम नगरे मां अठ साल राज़ कियूं। ते तैसेरे मरने पुड़ केन्चे मातम न कियो। तै राज़ां केरे कब्रस्ताने मां नईं, पन दाऊदपुरे मां दब्बो जेव।
Source notes (1)
- Footnote अहज्याहेरे इसेरू नवं यहोआहाज भी थियूं।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.