Bhadrawahi Bible
2 इतिहास 17
यहोशापात राज़ेरू राज़
आसारू मट्ठू यहोशापात तैसेरे मरनेरां पत्ती तैसेरे जगाई पुड़ यहूदा प्रदेशेरो राज़ो बनो, ते इस्राएलेरे खलाफ अपनि सेना मज़बूत की। तैनी यहूदारे सारे क़िले बाले नगरन मां सिपेही केरि टोली ठहरेई, ते यहूदारे प्रदेशे मां ते एप्रैमेरे तैन नगरन मां भी ज़ैना तैसेरे बाजे आसा नियोरे थिये, सेनारी चौवकी बिशैली छ़ेडी। यहोवा यहोशापात राज़े सेइं साथी राव, किजोकि तै अपने पूर्वज दाऊदेरी पुरानी चाली पुड़ च़लतो राव ते बाल देबतां केरि तलाशी मां न लग्गो। बल्के तै अपने बाजी केरे परमेशरेरी तलाशी मां लगोरो राव ते तैसेरे हुक्मे पुड़ च़लतो थियो, ते इस्राएलेरां ज़ेरां कम्मां न थियो केरतो। एल्हेरेलेइ यहोवा यहूदारू राज़ तैसेरे हथ्थे मां मज़बूत कियूं, ते सारे यहूदी तैस कां लगान आनते रहते थिये, ते तैस कां बड़ी भारी दौलत ते तैसेरी शान-ओ-शोकत बेधी जेई। यहोवारी बत्ती पुड़ च़लते-च़लते तैसेरो दिले मघन भोइ जेव। फिरी तैनी यहूदा प्रदेशे मरां मूरती पुज़ारी उच्ची ठारां ते अशेरा देबरी मूरती दूर की।
कानूनेरी शिक्षा
यहोशापात राज़े अपने हुकूमतरे ट्लेइयोवं साले मां बेन्हैल, ओबद्याह, जकर्याह, नतनेल ते मीकायाह नंव्वेरे अपने हाकिम यहूदा प्रदेशेरे नगरन मां शिक्षा देनेरे लेई भेज़े। तैन सेइं साथी शमायाह, नतन्याह, जबद्याह, असाहेल, शमीरामोत, यहोनातान, अदोनिय्याह, तोबियाह ते तोबदोनिय्याह, नंव्वेरे लेवी ते तैन सेइं साथी एलीशामा ते यहोराम नंव्वेरे याजक थिये। एल्हेरेलेइ तैनेईं यहोवारे कानूनेरे किताब एप्पु कां साथी नेइतां यहूदा मां शिक्षा दित्ती, बल्के तैना यहूदारे सारे नगरन मां लोकन शिखालते जे। यहूदारे आसे-पासेरे मुल्खां केरे हुकूमती मां यहोवारो एरहो डर भोइ जेव, कि तैनेईं यहोशापाते सेइं जंग न की। किछ पलिश्ती यहोशापाते कां लगान ते कर सेमझ़तां चाँदी घिन्तां आए; ते अरब मुल्खेरे लोकेईं भी 7700 हुड़ ते 7700 थाव्वे आने।
यहोशापातेरी सेनारी ताकत
यहोशापात बड़ो मज़बूत ते हर तरीके सेइं बद्धतो जेव ते तैनी यहूदा मां क़िले ते भण्डारां केरे नगर तियार किये। ते यहूदारे नगरन मां तैसेरू बड़ू कम भोतू थियूं, ते यरूशलेम नगरे मां तैसेरे बड़े बहादर सिपाही रहते थिये। तैन केरे पूर्वजां केरे घराना केरे मुताबिक तैन केरि ई गिनती थी, मतलब यहूदी सेनापति इना थिये, प्रधान अदनह ते तैस सेइं साथी 300000 बहादर सिपाही थिये, ते तैसेरां बाद यहोहानान सेनारो प्रधान थियो, ज़ैस सेइं साथी 280000 सिपाही थिये। ते तैसेरां बाद जिक्री एरू मट्ठू अमस्याह, ज़ैनी एपनी खुशी सेइं ते अपने इच्छाई सेइं अपनो आप यहोवारी सेवारे लेई अर्पण कियोरो थियो, ते तैस सेइं साथी 200000 बहादर सिपाही थिये। फिरी बिन्यामीनी लोकन मरां एल्यादा नंव्वेरो अक बहादर शूरबीर, तैस सेइं साथी ढाल रखनेबाले 200000 धनुषधारी थिये। ते तैसेरां बाद यहोजाबाद, तैस सेइं साथी जंग लड़नेरे हथियारन बाले 180000 सिपाही थिये। इना तैना आन, ज़ैना राज़ेरी सेवाई मां मघन थिये। इना तैन करां अलग थिये ज़ैना राज़े सारे यहूदा प्रदेशेरे क़िले बाले नगरन मां रखोरे थिये।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.