Bhadrawahi Bible
2 इतिहास 14
आसा राज़ेरू राज़
ज़ैखन अबिय्याह राज़ो अपने दादे-पड़दादां केरो ज़ेरो मेरि जेव, त तै दाऊदपुरे दब्बो जेव। ते तैसेरू मट्ठू आसा तैसेरे जगाई पुड़ राज़ो बनू। आसारे राज़ केरनेरे वक्ते मां 10 सालन तगर सुख चैन राव। आसा तैन्ने कियूं ज़ैन तैसेरे परमेशर यहोवारी नज़री मां रोड़ू ते ठीक थियूं। तैनी बखले देबतां केरि वेदी ते पुज़ारी उच्चे ठारां दूर की, ते मूरती ट्लोड़तां छ़ेडी, ते अशेरा देबरी मूरती भी केट्टी। ते यहूदा प्रदेशेरे लोकन हुक्म दित्तो कि अपने दादे-पड़दादां केरे परमेशर यहोवारी तलाश केरा, ते परमेशरेरो कानून ते तैसेरे हुक्म मन्ना। तैनी मूरती पुज़ारी उच्ची ठारां ते धूपवेदी यहूदारे सारे नगरन मरां दूर की, ते तैसेरे सामने राज़े मां सुख चैन राव। तैनी यहूदा मां क़िले बाले नगर बसाए, किजोकि मुल्खे मां सुख चैन थियो। तैन सालन मां तैस कोन्ची सेइं लड़ाई न केरनी पेई किजोकि यहोवाए तैस आराम दित्तोरो थियो। तैनी यहूदा प्रदेशेरे लोकन सेइं ज़ोवं, “एज्जा अस इना नगर बसाम ते तैन केरे च़ेवरे पासन शहरपनाह, क़िले ते फाटकां केरे पल्ले ते बेड़े बनाम। मुल्ख हुना तगर इश्शे सामने आहे, किजोकि असेईं, अपने परमेशर यहोवारी तलाश कियोरीए। असेईं तैसेरी तलाश की ते तैनी असन च़ेवरे पासन आराम दित्तो।” तैखन तैनेईं इना नगर बसाए ते कामयाब भोए। फिरी आसा राज़ेरी अक सेना थी ज़ैस कां ढाल ते भाले थिये, यहूदा गोट्ले मरां त 300000 सिपाही ते बिन्यामीन गोट्ले मरां 280000 सिपाही थिये, इनां सब बड़े बहादर सिपाही थिये।
तैन केरे खलाफ 100000 सिपेही केरि सेना ते 300 रथ एन्हतां जेरह नंव्वेरो अक कूशी निस्सो ते मारेशा नगरे तगर पुज़्ज़ो। तैखन आसा राज़ो तैसेरो मुकाबलो केरनेरे लेई निस्सो ते मारेशारे सापता नंव्वेरे वैदी मां जंग लड़नेरे लेई अपनि सेना तियार की। तैखन आसा अपने परमेशर यहोवा कां प्राथना की, “हे यहोवा! ज़ेन्च़रे तू ताकतबरेरी मद्दत केरि सखतस, तेन्च़रे कमज़ोरेरी भी मद्दत केरि सखतस; हे इश्शे परमेशर यहोवा! इश्शी मद्दत केर, किजोकि इश्शो भरोसो तीं पुड़े ते तेरे नंव्वेरो भरोसो केरतां असां इन लोकां केरे खलाफ एवरेम। हे यहोवा, तू इश्शो परमेशर आस। मैन्हु तीं करां हावी न भोइ सकन।” तैखन यहोवाए कूशी सेना आसा ते यहूदन करां हाराए ते कूशी सेना नेश्शी जेई। आसा राज़े ते तैसेरी सेना तैन केरो पीछो गरार नगरे तगर कियो, ते एत्रे कूशी सिपाही मेरि जे, कि तैना फिरी लड़नेरे लेई हिम्मत न केरि सके, किजोकि तैना यहोवा ते तैसेरी सेनाई करां हैरी जे, ते आसा राज़े ते तैसेरी सेना दुश्मना केरि कीमती चीज़े नेइ। ते तैनेईं गरार नगरेरे आसे-पासेरे सारे नगर ज़ींते, किजोकि यहोवारो डर तैन नगरां केरे रानेबालां केरे दिले मां बिश्शी जेवरो थियो ते तैनेईं तैना नगरां केरि कीमती चीज़ां नेइ, किजोकि तैन मां बड़ी धन-दौलत थी। फिरी तैनेईं पुहालां केरे डेरन पुड़ हमलो कियो ते बड़ां गब्बां ते ऊँट नेइतां यरूशलेम नगरे जो जे।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.