Bhadrawahi Bible
2 इतिहास 12
मिस्री राज़ो शीशक यहूदा प्रदेशे पुड़ हमलो केरते
ज़ैखन रहबामेरू राज़ मज़बूत भोइ जेवं, ते तै एप्पु भी मज़बूत भोइ जेव, तैखन तैनी ते तैसेरे सारे यहूदारे लोकेईं यहोवारो कानून मन्नो शारो। तैना यहोवा सेइं वफादार न राए, एल्हेरेलेइ रहबाम राज़ेरे पंच़ोंव साले मां मिस्र मुल्खेरे राज़े शीशके, यरूशलेम नगरे पुड़ 1200 रथ्थन ते 60000 सुवारन सेइं हमलो कियो, ते तैस सेइं साथी मिस्रे मरां बेशुमार लूबी, सुक्किय्यी ते कूशी सिपाही आए। शीशक राज़े यहूदा प्रदेशेरे क़िले बाले नगरन पुड़ कब्ज़ो कियो, ते यरूशलेमे तगर पुज़्ज़ो। तैखन शमायाह नबी रहबाम राज़े ते यहूदारे हाकिमन कां, ज़ैना शीशक राज़े करां डेरतां यरूशलेमे मां अकोट्ठे भोवरे थिये, एइतां ज़ोने लगो, “यहोवा इन ज़ोते, कि तुसेईं अवं शारोरोईं, एल्हेरेलेइ मीं तुस शैरतां शीशकेरे हथ्थे मां कियोरेथ।” तैखन इस्राएलेरे हाकिम ते राज़ो दीन भोइतां ज़ोने लगे, “यहोवा धर्मीए।” ज़ैखन यहोवाए हेरू कि यहूदारे लोक दीन भेवरेन, तैखन यहोवा शमायाह नेबी सेइं ज़ोवं, “किजोकि तैना दीन भोइ जेवरेन, अवं तैन नष्ट न केरेलो। अवं तैन केरो किछ बचाव केरेलो, ते मेरो क्रोध शीशकेरे ज़िरिये यरूशलेमे पुड़ न भड़केलो। फिरी भी तैना तैसेरे अधीन राले, ताके तैना मेरी ते मुल्खे-मुल्खेरे हुकूमतां केरि भी सेवाई मां फर्क समझ़न।”
तैखन मिस्रेरे राज़े शीशके यरूशलेम नगरे पुड़ हमलो केरतां यहोवारे भवनेरी कीमती चीज़ां ते राज़ेरे मेहलेरी भी कीमती चीज़ां नेइ। तै सब किछ घिन्नी जेव, ते सोन्नेरी ज़ैना ढालां सुलैमाने बनेवावरी थी, तैना भी तै घिन्नी जेव। तैखन रहबाम राज़े तैन केरे बदले पितलरी ढालां बनावेई ते तैना पहरेदारां केरे प्रधानां केरे हथ्थे सौंफी दित्ती, ज़ैना राज़ेरे मेहलेरे फाटके पुड़ रखवाली केरते थिये। ज़ैखन-ज़ैखन रहबाम राज़ो यहोवारे भवने मां गातो थियो, तैखन-तैखन पहरदार तैन ढालन छ़ुइतां च़लाते थिये, ते फिरी वापस एइतां हथियारां केरे कमरे मां रखते थिये। ज़ैखन रहबाम राज़ो दीन भोव, तैखन यहोवारो क्रोध तैस पुड़ेरां ठंडो भोव, ते तैनी तैसेरो पूरो नाश न कियो। ते यहूदा प्रदेशेरे लोकन मां किछ रोड़े गुण भी थी।
रहबाम राज़ेरो आखरी वक्त
रहबाम राज़ो यरूशलेम नगरे मां मज़बूत भोइतां राज़ केरतो राव। ज़ैखन तै राज़ो बनो, तैस वक्त तैसेरी उमर 41 साल थी, ते यरूशलेम नगरे मां, ज़ैन नगर यहोवाए इस्राएलेरे सारे गोट्लन मरां च़ुनोरू थियूं कि तैड़ी तैसेरू नवं रख्खू गाए, तैनी 17 साल राज़ कियूं। तैसेरी अम्मरू नवं नामाह थियूं, ज़ै अम्मोनी कौन्श थी। रहबामे तैन कम कियूं ज़ैन बुरू थियूं, मतलब तैनी अपनो मन यहोवारे तोपी मां न लव। शुरू करां आखरी तगर रहबामेरां कम्मां शमायाह नेबी ते इद्दो नेबेरी किताबन मां वंशावली केरे इतिहासेरी किताबी मां लिखोरन। रहबाम यहूदारे राज़े ते यारोबाम इस्राएलेरे राज़ेरे दरमियान हमेशा लड़ाई भोती राई। ते रहबाम अपने दादे-पड़दादां केरो मेरि जेव ते दाऊदपुरे मां तै दब्बो जेव। ते तैसेरू मट्ठू अबिय्याह तैसेरे जगाई पुड़ राज़ो बनो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.