Bhadrawahi Bible
2 इतिहास 10
इस्राएलेरे दूई हिस्से भोइ गातन
रहबाम शेकेम नगरे जो जेव, किजोकि सारे इस्राएली तैस राज़ो बनानेरे लेई तैट्ठी जेवरे थिये। ज़ैखन नबातेरे मट्ठे यारोबामे इस बारे मां शुनू (तै त मिस्र मुल्खे मां रहतो थियो, तैड़ी तै सुलैमान राज़े करां डेरतां जेवरो थियो), त तै मिस्र मुल्खे मरां वापस अव।1 तैखन तैनेईं तैस जो समाद भेज़ो, एल्हेरेलेइ यारोबाम ते सारे इस्राएली एइतां रहबामे सेइं ज़ोने लगे, “तेरे बाजे सुलैमाने असन पुड़ बड़ो बोझ छ़डोरो थियो, एल्हेरेलेइ तू हुनी अपने बाजेरी सखत सेवा छ़ेडतां, ते असन पुड़ेरां तै भारी बोझ, ज़ै तैनी असन पुड़ रखोरो थियो, तू इश्शे लेई किछ पोल्लो केर; तैखन असां तेरे अधीन भोल्हे।” तैनी तैन सेइं ज़ोवं, “ट्लेइ दिहाड़ना बाद फिरी मीं कां एज्जथ।” तैखन तैना लोक च़ले जे।
तैखन रहबाम राज़े तैन सियानन कां गेइतां ज़ैना तैसेरे बाजी सुलैमानेरी ज़िन्दगी भर तैसेरी सेवाई मां खड़े रहते थिये, तैन पुछ़ने जेव, “एन लोकन केन्च़रे जुवाब देनो ठीक भोल्हो, एस बारे मां तुसां मीं कुन सलाह देतथ?” तैनेईं तैस ई जुवाब दित्तो, “अगर तू एन लोकन सेइं रोड़ो बर्ताव केरतां तैन खुशी केरतां ते तैन सेइं मिट्ठी गल्लां केरस, त तैना हमेशा तेरे अधीन राले।” पन रहबामे तैन सियांनां केरि सलाह न मन्नी, ते तैनी तैन जुवानन सेइं सलाह की, ज़ैना तैस सेइं साथी बेडोरे थिये ते तैसेरी अधिकारी थिये। तैनी तैन पुछ़ू, “एन लोकन केन्च़रे जुवाब देनो ठीके, एसमां तुस मीं कुन सलाह देतथ? तैनेईं त मीं सेइं ज़ोवं, ‘एल्हेरेलेइ हुनी तू अपने बाजी केरो बोझ ज़ै तैनी असन पुड़ रखोरो थियो तैस किछ पोल्लो केर।’” जुवान तैस सेइं तैस ई जुवाब दित्तो, ज़ैन लोकेईं तीं सेइं ज़ोवं, “एल्हेरेलेइ हुनी तू अपने बाजी ज़ै तैनी असन पुड़ बड़ो बोझ रखोरो थियो तैस किछ पोल्लो केर। तू तैन सेइं एन ज़ोइयां, ‘मेरी निकड़ी अंगलोइ भी मेरे बाजी केरे लख्खे करां मोट्टीए। मेरे बाजे तुसन पुड़ ज़ै बड़ो बोझ रखोरो थियो, तैस अवं होरो भी भारी केरेलो; मेरे बाजी त तुसन कोड़ेइं सेइं सज़ाह देतो थियो, पन अवं तुसन बिच़्च़न करां दुवेइलो।’”
ट्लेइयोवं दिहाड़े ज़ेन्च़रे राज़े ज़ोवरू थियूं, “ट्लेइयोवं दिहाड़े मीं कां फिरी एज्जथ,” तेन्च़रे यारोबाम ते सारे लोक रहबाम राज़े कां हाज़र भोए। तैखन राज़े तैन सेइं सखत गल्लां की, ते रहबाम राज़े सियांनां केरि दित्तोरी सलाह शैरतां, जुवाना केरि सलाहरे मुताबिक तैन सेइं ज़ोवं, “मेरे बाजे ज़ै तैनी तुसन पुड़ बड़ो बड्डो बोझ रखोरो थियो, पन तैस अवं होरो भी भारी केरेलो। मेरे बाजी त तुसन कोड़ेइं सेइं सज़ाह देतो थियो, पन अवं तुसन बिच़्च़न करां सज़ाह दुवेइलो।” एन्च़रां सेइं राज़े लोकां केरि बिनती न मन्नी। एसेरी वजा ई आहे, कि ज़ैन वचन यहोवा शीलो नगरेरे रानेबाले अहिय्याह नेबेरे ज़िरिये नबातेरे मट्ठे यारोबामे सेइं ज़ोवरू थियूं, तैन पूरू केरनेरे लेई परमेशरे एन्च़रे ठहरावरू थियूं।
ज़ैखन सारे इस्राएली लोकेईं हेरू कि राज़ो इश्शी न शुने, तैखन तैना ज़ोने लगे,
“दाऊदे सेइं इश्शो कोई अंश नईं?
इश्शो त यिशैरे मट्ठे मां कोई हिस्सो नईं।
हे इस्राएली लोकव, अपने-अपने डेरे जो च़ले गाथ!
हुनी हे दाऊद, अपने घरानेरी फिक्र केर।”
तैखन सारे इस्राएली अपने-अपने डेरे जो च़ले जे। सिर्फ ज़ेत्रे इस्राएली यहूदा प्रदेशेरे नगरन मां बस्सोरे थिये, तैन्ने पुड़ रहबाम राज़ केरतो राव। तैखन रहबाम राज़े हदोराम ज़ै सारे गुलाम मज़दूरन पुड़ अधिकारी थियो इस्राएली लोकन कां भेज़ी दित्तो, ते इस्राएली लोकेईं तैस पुड़ पथराव कियो ते तै मेरि जेव। तैखन रहबाम जल्दी सेइं अपने रथे पुड़ च़ेढ़तां, यरूशलेम नगरे जो नेश्शी जेव। ते तैखन करां इस्राएली लोकेईं दाऊदेरे खानदाने सेइं बगावत की ते अज़ तगर भी तैना खलाफन।
Source notes (1)
- Cross-reference 1 राज़. 11:26-40.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.