Bhadrawahi Bible
2 इतिहास 1
सुलैमान राज़ेरे हुकूमतरी शुरुआत
दाऊद राज़ेरे मट्ठे सुलैमानेरू राज़ मज़बूत भोइ जेवं, ते तैसेरो परमेशर यहोवा तैस सेइं साथी राव ते तै महान राज़ो बनाव।
एक्सां सुलैमान राज़े सारे इस्राएली लोकन सेइं, मतलब हज़ारां ते शौवां केरे सिपेही केरे सेनापति, न्याय केरनेबालन ते इस्राएलेरे सब प्रधान्न ज़ैना पूर्वजां केरे घराना केरे खास मैन्हु थिये, गल्लां की। तैखन सुलैमान तैन सारे लोकन सेइं गिबोन नगरेरे आराधनारे उच्ची जगाई पुड़ जेव, किजोकि परमेशरेरो मिलापे बालो तेम्बु, ज़ै यहोवारे सेवक मूसा सुनसान ठैरी मां बनेवरो थियो, तै तैस ठारी पुड़ थियो। पन परमेशरेरे करारेरो सन्दूख दाऊद राज़े किर्यत्यारीम नगरे मरां तैस जगाई पुड़ आनोरो थियो ज़ै तैनी तैसेरे लेई तियार कियोरी थी। तैनी त तैसेरे लेई यरूशलेम नगरे मां अक तेम्बु खड़ो करारवरो थियो। पन पितलरी ज़ै वेदी ऊरी एरे मट्ठे बसलेले बनेवरी थी, ज़ैन हूरेरू पोट्लड़ू थियूं, तै गिबोन नगरे मां यहोवारे तेम्बेरे सामने थी। एल्हेरेलेइ सुलैमान सारे लोकन सेइं साथी तैस वेदी कां जेव। सुलैमाने तैड़ी तैस पितलरी वेदी कां गेइतां, ज़ै यहोवारे सामने मिलापे बाले तेम्बु कां थी, तैस पुड़ 1000 जानबरां केरि होमबलि च़ाढ़ी।
अक्लरे लेई सुलैमानेरी प्राथना
तैस्से राती परमेशरे सुलैमाने दर्शन देइतां तैस सेइं ज़ोवं, “ज़ैन किछ तू चातस कि अवं तीं देईं, तैन मग।” सुलैमाने परमेशरे जुवाब दित्तो, “तू मेरे बाजी दाऊदे पुड़ बड़ी दया केरतो राव ते तीं अवं तैसेरी जगाई पुड़ राज़ो बनेवरोइं। हुनी हे यहोवा परमेशर! ज़ै वाधो तीं मेरे बाजी दाऊदे सेइं कियोरो थियो, तै पूरो भोए। तीं त अवं एरे लोकां केरो राज़ो बनेवरोइं ज़ैना ज़मीनरे धूड़रे सिक्कां केरे ज़ेरे बड़े आन। हुनी मीं एरी अक्ल ते ज्ञान दे कि अवं एना लोकां केरि अगवाई केरि सेकी, किजोकि कौन एरहो आहे कि तेरे एत्रे लोकन पुड़ तेरे मद्दतरे बगैर राज़ केरि सके?” परमेशरे सुलैमाने सेइं ज़ोवं, “तीं ज़ै एरी इच्छा की, कि तीं न त धन-दौलत मग्गी, न ऐश्वर्य ते न अपने दुशमनां केरि मौत ते न अपने लेई लम्मी उमर मग्गी, पन सिर्फ अक्ल ते ज्ञान मगोरूए, ज़ैस सेइं तू मेरे लोकां केरो ज़ैन पुड़ तू राज़ो बनेवरोस, न्याय केरि सखस, एल्हेरेलेइ अक्ल ते ज्ञान तीं दित्तू गाते। अवं तीं एत्री धन-दौलत ते ऐश्वर्य भी देइलो, ज़ेत्रू न त तीं करां पेइले कोन्ची राज़े मैल्हू ते न तेरे बाद कोन्ची राज़े मैल्हेलू।”
सुलैमानेरी सेना ते धन-दौलत
इसेरे बाद सुलैमान राज़ो गिबोनेरे उच्ची जगाई पुड़ेरां, मतलब मिलापे बाले तेम्बु करां यरूशलेम नगरे जो वापस अव ते तैड़ी इस्राएले पुड़ राज़ केरने लगो। फिरी सुलैमान राज़ो रथ ते सुवार अकोट्ठे केरतो जेव। ते तैस कां 1400 रथ ते 12000 सुवार थिये, ते तैना तैनी किछ रथां केरे नगरन मां, ते बाकी यरूशलेम नगरे मां एप्पु कां रख्खे। सुलैमान राज़े अपने राज़ केरनेरे वक्ते मां एरू कियूं कि यरूशलेम नगरे मां सोन्नू-चाँदी बड़ू जादे भोनेरे वजाई सेइं तैसेरी कीमत घोड़ां केरि ज़ेरि, ते गैइड़ेरी लेकड़री कीमत प्रदेशेरे बुनीयें हिस्सेरे गूलर बुट्टेरे लेकड़री ज़ेरि बनाई। ज़ैना घोड़े सुलैमान रखतो थियो, तैना मिस्र मुल्खे मरां आने गाते थिये, ते सुलैमान राज़ेरे बुपारी झुण्डां केरां झुण्डां रख्खोरी कीमत देइतां आनते थिये। अक रथ त सत किल्लो चैंदी मां एइतू थियूं, ते अक घोड़ो लगभग दूई किल्लो मां मिस्रे मरां एइतो थियो, ते तैना कीमत देइतां मिस्र मुल्खे मरां आनते थिये। ते एस्से कीमती पुड़ तैना हित्ती लोकां केरे सारे राज़ां केरे लेई ते अरामेरे राज़ां केरे लेई बेच़ते थिये।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.