Bhadrawahi Bible
1 तीमुथियुस 4
झूठी शिक्षा देनेबाले
पन पवित्र आत्मा साफ ज़ोते, कि आखरी वक्ते मां किछ लोक मसीही शिक्षाई पुड़ विश्वास केरनो बन्द केरेले। तैना दुष्ट आत्मान कबूल केरेले, तैना तैन बुरी बत्ती च़लैली, त कने तैना लोक दुष्ट आत्मां केरि झूठी शिक्षाई पुड़ विश्वास केरेले। इन तैना झूठे पाखंडी लोक आन, ज़ैना इन झूठी शिक्षान शिखालतन, तैन केरो ज़मीर ज़ै रोड़े ते बुरे मां फैसलो केरते मर्रोए ते ज़ेन्च़रे तात्ते लोंहे सेइं तै फुकोरोए। एरे लोक इन शिखालतन कि ड्लाह नईं बनानो ते खानेरी किछ चीज़ां न लोड़न खेवरी, पन परमेशरे इन खानेरी चीज़ां विश्वासी लोकां केरे खानेरे लेई बनेवरिन ज़ैना सच़्च़ी शिक्षा ज़ानतन कि प्राथना केरतां खेवरू लोड़े। किजोकि परमेशरेरी बनेवरी हर चीज़ रोड़ीए। अस परमेशरेरू शुक्र केरतां सब किछ खेइ बटतम। किजोकि परमेशरेरे वचने, ते प्राथनाई सेइं शुद्ध भोते।
मसीह यीशुएरो रोड़ो सेवक
अगर तू ढ्लान ते बेइन्न लगातार इन्ना गल्लां याद करातो रालो, ज़ैन केरि हदायत मीं तीं दित्तोरीए त कने विश्वासेरे सन्देशे ते तैस रोड़ी शिक्षाई सेइं ज़ैस मां तू मज़बूत बनेवरोस ज़ै तू मन्तो एवरोस। त तू यीशु मसीहेरो रोड़ो सेवक भोल्हो। पन बनेवरी कहैनी ते बेकार कहैनी केरे वजाई सेइं वक्त बरबाद न केर ज़ैन सेइं परमेशरेरी आदर न भोए। पन तू लगातार परमेशरेरी आदर केरनेबाली ज़िन्दगी ज़ींनी शिखाल। किजोकि जिसमानी वर्जिशी सेइं जानी फैइदो त भोते, पन भक्ति सब गल्लां केरे लेई रोड़ी आहे, किजोकि इस वक्तेरी ते एजने बाले वक्तेरी ज़िन्दगरो फैइदो इस्से मांए ज़ेसेरो वाधो परमेशरे कियोरोए। ते ई गल सच़, ते हर तरीके सेइं मन्नेरे काबल। किजोकि अस मेहनत ते कोशिश एल्हेरेलेइ केरतम, किजोकि इश्शी उमीद तैस ज़ींते परमेशरे पुड़े। ज़ै सेब्भी लोकां केरो, ते खास केरतां विश्वास केरनेबालन मुक्ति देनेबालोए।
विश्वासी लोकन इना गल्लां शिखाल ते तैन ई हुक्म दे कि तैना इन मनन। तू एन्च़रे बर्ताव केर कि कोई भी तेरी अनादर न केरे किजोकि तू जुवान आस। पन तू विश्वासी लोकां केरे लेई इन सैरी गल्लन मां अक मिसाल बन, गलबाती मां, होरन सेइं बर्ताव केरने मां, ते होरन सेइं प्यार केरने मां, ते यीशु मसीह पुड़ विश्वास केरने मां, ते बेइलज़ाम ज़िन्दगी ज़ींने मां ताके लोक भी एन्च़रां केरन। ज़ांतगर अवं न एज्जी, तांतगर ज़ैखन विश्वासी लोक अकोट्ठे भोतन ज़ोरे सेइं पढ़ने मां, ते तैन केरो होसलो बद्धा ते पवित्रशास्त्रेरो मतलब शिखाल। इस गल्ली याद रख ज़ैखन बुज़ुर्गां केरे एक्की टोलां तीं पुड़ हथ रखोरे थिये, परमेशरे तैन अक सन्देश दित्तो कि तैस वरदानेरे बारे मां ज़ोन ज़ैन तैने तीं दित्तोरोए। तैस वरदानेरे नज़र अनदाज़ न केर। तैन गल्लन सोचतो रा, ते तैन मां अपनु ध्यान लेइतां रख, एन्च़रे हर कोई हेरी बटेलो कि तू विश्वासे मां बद्धने लगोरोस। इस गल्लरू ध्यान रख कि तू केन्च़रे ज़ीतस ते केन्च़रे शिखालतस। इसेरो नितीजो ई भोल्हो कि परमेशरे न्याये मां तेरे ज़िरिये तीं ते तेरे शुन्नेबालन बच़ालो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.