Bhadrawahi Bible
1 तीमुथियुस 3
कलीसियाई मां काबलीत
ई गल सच़्च़े, कि ज़ै कलीसियाई मां अगुवो भोनो चाते, त तै आदरारे पदेरी इच्छा रखते। ते इन ज़रूरीए कि अगुवो बेइलज़ाम भोए, ते तैसेरी अक कुआन्शां लोड़े, ते तै अपने आपे पुड़ कैबू केरनेबालो, समझ़दैरी सेइं ज़ींनेबालो भोए, इज़्ज़तदार भोए, ते ट्लाहना केरि आदर केरनेरे लेई तियार रानेबालो भोए, ते होरि लोकन परमेशरेरो सन्देश रोड़े च़ारे शिखालनेरे काबल भोए। तै शराबी या मार-पीट केरनेबालो न लोड़े, बल्के दया केरनेबालो लोड़े, ते लड़ाई न केरनेबालो लोड़े ते पेइंसां केरे लालच़ी न भोए। तै अपने घरेरो रोड़े च़ारे च़लानेबालो ते बन्दो बसत केरनेबालो लोड़े, ते तैनी अपने बच्चन शिखालोरू लोड़े कि तैना हर गल्ली मां इज़्ज़ती सेइं तैसेरी मनन। ज़ैखन अगर कोई अपने घरेरो बन्दो बसत केरनो न ज़ानतो भोए, त तै परमेशरेरी कलीसियारी हेरगेश केन्च़रे केरेलो? तै नंव्वो विश्वासी न लोड़े, एरू न भोए अभिमान केरे ते शैतानेरी ज़ेरि तैस सज़ाह मैल्हे। ते ज़ैना लोक विश्वासी नईं तैनेईं भी तैसेरे बारे मां इन ज़ोवरू लोड़े कि ऐह रोड़ो मैन्हु आहे। ताके एरू न भोए कि तै घटिया भोए ते शैतानेरे ज़ाले मां फंसे।
कलीसियाई मां सेवक
तेन्च़रे सेवक भी तेरहे लोड़न ज़ैन केरि लोक आदर केरन। ईमानदार लोड़न, ते पीनेबाले न भोन, ते एरे मैन्हु न भोन ज़ैना पेइंसां केरे लेई किछ भी केरि बटतन। पन तैन केरे ज़मीर साफ लोड़न ते ज़ै शिक्षा परमेशरे बांदी कियोरीए, तैस पुड़ लगातार विश्वास केरनेबाले लोड़न। ज़ैखन कलीसियारे सेवक च़ुने गान त पेइलू तैन केरू चाल चलन परखू गाए, कि तैन मां रोड़े गुण आन, ते केन्ची तैन मां कोई गलती न लेइहोए, त फिरी सेवकेरू कम केरन। एन्च़रे कलीसियाई मां सेवा केरनेबालां केरि कुआन्शां भी आदरारे काबल भोन, होरन बदनाम केरनेबैली न लोड़न, पन शांत स्भावे बैली, ते सेब्भी गल्लन मां ईमानदार भोन। कलीसियारो सेवक अपने कुआन्शरे लेई वफादार लोड़े, ते बच्चां ते अपने घरेरे सारे लोकां केरो रोड़ो च़ारे हेरगेश केरनेबालो लोड़े। किजोकि ज़ैना सेवकेरू कम रोड़े च़ारे केरतन, तैना लोकां केरि नज़री मां इज़्ज़तदार भोतन। ते तैना अपने तैस विश्वासेरे बारे मां ज़ै यीशु मसीहे पुड़े बड़े दिलेरी सेइं ज़ोतन।
महान भेद
अवं तीं कां जल्दी एजनेरी उमीद रखने पुड़ भी इना गल्लां एल्हेरेलेइ लिखताईं। अगर मीं एजने मां च़िर लगे, त तू ज़ानस, कि लोकेईं परमेशरेरे टब्बरेरे होरि लोकन सेइं केन्च़रे बर्ताव कियोरो लोड़े। इन टब्बर तैना लोकन सेइं बनोरू, ज़ैना यीशु पुड़ विश्वास केरतन ते ज़ींते परमेशरेरे कलीसियारेन। इना विश्वासी सच़्च़ी शिक्षाई मज़बूती सेइं मनतन ते सम्भालतन ज़ेन्च़रे बुनीयाद ते खम्भे इमारती सम्भालतन ते मज़बूत केरते।
ते इस मां शक नईं, अस पूरे याकीने सेइं ज़ोई बटतम, ज़ैना शिक्षां परमेशरे बैंदी की एना बिलकुल सच़्च़ी आन, मतलब,
मसीह मैन्हेरे रूपे मां बांदो भोव,
पवित्र आत्मा तै हर कम्मे मां धर्मी ठहराव,
स्वर्गदूतेईं तै लाव,
लोकेईं तैसेरे बारे मां कौमन मां प्रचार कियो,
सारे दुनियाई मरां लोकेईं तैस पुड़ विश्वास कियो,
परमेशरे तै उबरे सुर्गे जो नियो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.