Bhadrawahi Bible
1 शमूएल 20
योनातानेरी वफादारी
फिरी दाऊद रामाह नगरेरे नबायोते मरां नश्शो, ते योनाताने कां गेइतां ज़ोने लगो, “मीं कुन कियोरूए? मीं करां कुन पाप भोव? मीं तेरे बाजेरे नज़री मां एरहो को पाप कियोरोए, कि तै मीं मारनो चाते?” योनाताने तैस जुवाब दित्तो, “एरी गल नईं, तू मारो न गालो। शुन, मेरो बाजी मीं सेइं ज़ोनेरे बगैर न कोई बड्डू कम केरे ते न कोई निकड़ू; फिरी तै एरी गल मीं करां किजो छ़ुपालो? एरी कोई गल नईं।” पन दाऊदे कसम खेइतां ज़ोवं, “तेरो बाजी पक्को ज़ानते कि तेरी दयारी नज़र मीं पुड़े। ते तै सोचतो भोल्हो, कि योनाताने एस गल्लरो पतो न लोड़े लगोरो, एरू न भोए कि तै दुखी भोए। पन यहोवारे ज़िन्दगरी कसम ते तेरे ज़िन्दगरी कसम, इस मां कोई शक नईं मेरे ते मौतरे मझ़ाटे एक्की कदमेरो फासलोए।” योनाताने दाऊदे सेइं ज़ोवं, “ज़ैन किछ तेरो मन चाहे तैन्ने अवं तेरे लेई केरेलो।” दाऊदे योनाताने सेइं ज़ोवं, “शुन कालां अस नंव्वी चैंदनरू तिहार मनामेले, ते मेरे लेई ज़रूरी कि राज़े सेइं साथी बिशतां रोट्टी खेइं; पन तू मीं भेज़, ते अवं ट्लेईदी ड्लवझ़ां तगर उडारे मां छ़पोरो रालो। अगर तेरो बाजी मीं पुछ़े कि अवं कोड़ि आईं, त ज़ोइयां, ‘दाऊदे अपने नगर बैतलहम जो लूशी गांनेरे लेई मीं कां बिनती केरतां छुट्टी मग्गी; किजोकि तैड़ी तैसेरे सारे कुलेरे लेई सालेरू बलिदाने।’ अगर तै इन ज़ोए, ‘ठीके!’ तैखन त तेरे दासेरे लेई भलू भोल्हु; पन अगर तैस बड़ी जादे सरक एज्जे, त समझ़ा कि तैनी मीं नुकसान पुज़ानेरो इरादो कियोरोए। ते तू अपने दासे सेइं दयारो बर्ताव केरां, किजोकि तीं यहोवारी कसम खुवेइतां अपने दासे सेइं एप्पु करार कियोरोए। पन अगर मीं करां कोई पाप भोवरो भोए, त तू एप्पु मीं मार। तू मीं अपने बाजी कां किजो पुज़ास?” योनाताने ज़ोवं, “एरी गल कधी न भोल्ही! अगर मीं पक्को पतो भोथो कि मेरे बाजे तीं नुकसान पुज़ानेरो इरादो कियोरोए, त कुन अवं तीं सेइं न ज़ोइयेथो?” दाऊदे योनाताने सेइं ज़ोवं, “अगर तेरो बाजी तीं सखत जुवाब दे, त कौन मीं सेइं ज़ोलो?” योनाताने दाऊदे सेइं ज़ोवं, “च़ल अस उडारे मां गाम।” ते तैना दूईये उडारेरे पासे च़ले जे।
तैखन योनातान दाऊदे सेइं ज़ोने लगो, “इस्राएलेरे परमेशर यहोवारी कसम, ज़ैखन मीं कालां या ट्लेईदी इस्से मौके अपने बाजेरो पतो लगे, तैखन अगर दाऊदेरी भलियाई लेहीं, त कुन अवं तैस्से वक्ते तीं कां दूत भेज़तां तीं सेइं न ज़ोइलो? अगर मेरे बाजी केरो मन तेरो नुकसान केरनेरे लेई भोए, ते अवं तीं पुड़ तैन बांदू केरतां तीं न भेज़ेलो कि सुखे सेइं च़लो गेइयां, त यहोवा योनाताने सेइं एरू बल्के एस करां भी जादे केरे। यहोवा तीं सेइं तेरहो राए ज़ेन्च़रे तै मेरे बाजी सेइं साथी राव। ते न सिर्फ ज़ैखन तगर अवं ज़ींतो रेईं, तैखन तगर मीं पुड़ यहोवारी ज़ेरि महरबानी केरां, ताके अवं न मेरि। त मेरे घराने पुड़ेरां भी अपनि दयारी नज़र कधी नईं दूर केरनी! बल्के ज़ैखन यहोवा दाऊदेरे हर एक्की दुश्मने धेरती पुड़ेरां नाश केरेलो, तैखन भी एरू न केरां।” एन्च़रां सेइं योनाताने दाऊदेरे घराने सेइं इन ज़ोइतां करार कियो, “यहोवा दाऊदेरे दुश्मन्न करां बदलो ने।” ते योनातान दाऊदे सेइं प्यार केरतो थियो, ते तैनी तैस फिरी कसम दित्ती। किजोकि तै तैस सेइं अपने प्राणा केरे बराबर प्यार केरतो थियो।
तैखन योनाताने तैस सेइं ज़ोवं, “कालां अस नंव्वी चैंदनरू तिहार मनामेले; ते तू याद कियो गालो, किजोकि तेरी कुर्सी खाली राली। ते तू ट्लेइयोवं दिहाड़े लूशी एज्जां, ते तैस जगाई पुड़ गेइतां ज़ैड़ी तू पेइलो छ़पोरो थियो, मतलब घोड़ां केरे ढेरे कां ड्लखोरां रेइयां ज़ैस जो एजेल भी ज़ोतन। तैखन अवं तैसेरे पासे, मन्ना अपने कोन्ची ठहरावरे निशाने पुड़ ट्लाई तीर मारेलो। फिरी अवं अपने सेवक मट्ठे इन ज़ोइतां भेज़ेलो, कि गेइतां तीरन तोपतां इरां आन। अगर अवं तैस मट्ठे सेइं साफ-साफ ज़ोईं, ‘हेर, तीर तेरे इस पासे,’ तू तैस इरां आन, त तू एज्जी गेइयां किजोकि यहोवारे ज़िन्दगरी कसम, तेरे लेई भलियाई छ़ेडतां होरू किछ न भोल्हु। पन अगर अवं मट्ठे सेइं ज़ोईं, ‘शुन, तीर तीं करां अग्गरे,’ त तू च़लो गेइयां, किजोकि यहोवा तू भेज़ोरोस। ते तैस गल्लरी चर्चा ज़ेसेरे बारे मां मीं ते तीं एप्पु मांमेइं की, यहोवा मेरे ते तेरे मझ़ाटे हमेशा राए।”
एल्हेरेलेइ दाऊद उडारे मां गेइतां छ़प्पो; ते ज़ैखन संगरांतरू तिहार एवरू थियूं, तैखन राज़ो रोट्टी खाने बिश्शो। राज़ो त पेइलेरो ज़ेरो अपने तैस तखते पुड़ बिशोरो थियो ज़ै दिवारी कां थियो; ते योनातान खड़ो भोव, ते अब्नेर शाऊलेरे नेड़े बिश्शो, पन दाऊदेरी ठारी खाली राई।
तैस दिहाड़े त शाऊल इन सोचतां च़ुप राव, कि इसेरी कोई न कोई वजा भोल्ही; तै अशुद्ध भोल्हो, पक्को तै शुद्ध न भोल्हो। फिरी नंव्वी चैंदनरे तिहारेरे दूइयोवं दिहाड़े दाऊदेरी ठारी खाली राई। आखरकार शाऊले अपने मट्ठे योनाताने पुछ़ू, “कुन वजाए कि यिशैरू मट्ठू न हीज रोट्टी खाने एवरू थियूं, ते न अज़ एवरूए?” योनाताने शाऊले सेइं ज़ोवं, “दाऊदे त बैतलहम नगरे जो गाने लेई मीं कां बिनती केरतां छुट्टी मग्गी; ते ज़ोने लग्गो, ‘मीं गाने दे; किजोकि तैड़ी नगरे मां इश्शे कुले बलिदान देनूए, ते मेरे ढ्लाए मीं तैड़ी हाज़र भोनेरो हुक्म दित्तोरोए। ते हुनी अगर मीं पुड़ तेरे दयारी नज़र भोए, त मीं गाने दे कि अवं अपने ढ्लान सेइं मिलतां एज्जी।’ एस्से वजाई सेइं तै राज़ेरे मेज़े पुड़ नईं एवरो।”
तैखन शाऊल योनाताने जो सेरकोव ते तैनी तैस सेइं ज़ोवं, “हे बुरे राज द्रोही अम्मरे मट्ठां, कुन अवं न ज़ैनी कि तेरो मन त यिशैरे मट्ठे पुड़ लगोरोए? एस सेइं तेरी उमीद ट्लुटेली ते तेरी अम्मरी आदर न भोल्ही। किजोकि ज़ैखन तगर यिशैरू मट्ठू ज़ींतू रालू, तैखन तगर तू इस रियासती पुड़ राज़ो न बेनि सकस। एल्हेरेलेइ हुनी समाद भेज़तां तैस मीं कां आन, किजोकि पक्को तै मारो गालो।” योनाताने अपने बाजी शाऊले जुवाब देइतां तैस सेइं ज़ोवं, “तै किजो मारो गाए? तैनी कुन कियोरूए?” तैखन शाऊले तैस मारनेरे लेई तैस पुड़ भालो च़लाव, पन तैस पुड़ न बज़्ज़ो; एस गल्ली सेइं योनाताने बुझ़ू, कि मेरे बाजे दाऊद मारनो थापोरोए। तैखन योनाताने बड़ी सरक अई ते मेज़े पुड़ेरां खड़ो भोइ जेव, तैस दिहाड़े तैने किछ न खावं ते संगरांतरे तिहारेरे दूइयोवं दिहाड़े रोट्टी खाई, किजोकि तै बड़ो दुखी भोइ जेव, एल्हेरेलेइ कि तैसेरे बाजे दाऊदेरी बेज़ती कियोरी थी।
होरसां झ़ेझ़ां योनातान अक निकड़ू मट्ठू साथी नेइतां उडारे मां दाऊदे सेइं ठहरेवरी ठारी पुड़ जेव। तैखन तैनी तैस मट्ठे सेइं ज़ोवं, “दौड़तां ज़ै-ज़ै तीर अवं च़लेइलो तैस तोपतां आन।” मट्ठू दौड़ेरू थियूं, कि तैनी अक तीर तैस करां अग्रोवं च़लाव। ज़ैखन मट्ठू योनातानेरे च़लेवरे तीरेरी जगाई पुड़ पुज़्ज़ू, तैखन योनाताने तैस जो हक देइतां ज़ोवं, “तीर त तेरे उस पासे।” फिरी योनाताने मट्ठे जो पुतोरां हक देइतां ज़ोवं, “जल्दी केर, रुक न।” ते तैन मट्ठू योनाताने कां तीर अकोट्ठे केरतां तैस कां घिन्तां जेवं। एसेरो त किछ भी भेद मट्ठू न थियूं ज़ानतू; सिर्फ योनातान ते दाऊद एस गल्ली ज़ानते थिये। योनाताने तीर ते धनुष मट्ठे कां देइतां ज़ोवं, “गा, एन्न गिबा नगरे मां पुज़ा।” ज़ेरू मट्ठू जेवं, तेरो दाऊद घोड़ां केरे ढेरेरे पासे दक्षिण पासेरां निस्सो, ते तुत्तरेरे भारे ज़मीनी पुड़ झुकतां ट्लाई बार झुको; तैखन तैनेईं एक्की होरि फुम्मड़ी दित्ती, ते दूइयेईं लेरां दित्ती, पन दाऊदे जादे लेरां दित्ती। तैखन योनाताने दाऊदे सेइं ज़ोवं, “सुखे सेइं च़लो गा; किजोकि असेईं दूइयेईं एक्की होरि सेइं एन ज़ोइतां यहोवारे नंव्वेरी कसम खाई, कि यहोवा मेरे ते तेरे मझ़ाटे, ते मेरे ते तेरे खानदानेरे मझ़ाटे हमेशा राए।” तैखन दाऊद उठतां च़लो जेव; ते योनातान नगरे मां जेव।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.