Bhadrawahi Bible
1 राज़े 22
अहाब राज़ेरी मौत
एजने बाले ट्लाई साल अरामी सेना ते इस्राएली सेना एप्पु मांमेइं कोई जंग न भोइ। पन ट्लेइयोवं साले मां यहूदारो राज़ो यहोशापात इस्राएली केरे राज़े कां जेव। तैखन इस्राएलेरे राज़े अपने अधिकैरन सेइं ज़ोवं, “कुन तुसन भी पतोए, कि गिलाद प्रदेशेरू रामोत नगर इश्शू आहे? फिरी असां किजो च़ुप रहतम ते असां तैस अरामेरे राज़े करां कि न थुसोड़म?” फिरी अहाबे यहोशापाते पुछ़ू, “कुन तू मीं सेइं साथी गिलाद प्रदेशेरे रामोत नगरे सेइं लड़नेरे लेई च़लेलो?” यहोशापाते इस्राएलेरे राज़े जुवाब दित्तो, “ज़ेरो तू आस तेरहो अवं भी आईं। ज़ेरे तेरे लोक तेरहे मेरे लोक भी आन, ते ज़ेरे तेरे घोड़ेन तेरहे मेरे भी घोड़ेन।”
फिरी यहोशापात राज़े इस्राएलेरे राज़े सेइं ज़ोवं, “अज़ ई पतो केरा कि यहोवारी मर्ज़ी कुने।” तैखन इस्राएलेरे राज़े नबी ज़ैना कोई 400 थिये अकोट्ठे केरतां तैन पुछ़ू, “कुन अवं गिलाद प्रदेशेरे रामोत नगरे सेइं जंग केरनेरे लेई हमलो केरीं, या न केरीं?” तैनेईं जुवाब दित्तो, “हमलो केर। किजोकि यहोवा तैस राज़े तेरे हथ्थे मां केरेलो।” पन यहोशापाते पुछ़ू, “कुन इड़ी यहोवारो होरो भी कोई नबी आहे, ज़ैस अस पुछ़म?” इस्राएलेरे राज़े अहाबे यहोशापात राज़े सेइं ज़ोवं, “हाँ यिम्लारू मट्ठू मीकायाह अक होरो नबी भी आहे तैसेरे ज़िरिये अस यहोवा करां पुछ़ी सखतम? पन अवं तैस सेइं नफरत केरताईं, किजोकि तै मेरे बारे मां भलेरे बारे मां नईं बल्के नुक्सानेरे बारे मां नबूवत केरते।” यहोशापाते ज़ोवं, “राज़ा एन्च़रे न ज़ो।” तैखन इस्राएलेरे राज़े अक हाकिम कुजव ते तैस सेइं ज़ोवं, “यिम्लारू मट्ठू मीकायाह लूशी कुजेइतां इरां आन।” इस्राएलेरो राज़ो अहाब ते यहूदारो राज़ो यहोशापात, अपनो-अपनो राज़ेरो लबास लेइतां सामरिया नगरेरे फाटकेरे नेड़े खलाड़ी मां खुल्‍ली जगाई पुड़ अपने-अपने तखते पुड़ बिश्शोरे थिये, ते सारे नबी तैन केरे सामने नबूवत केरि राहोरे थिये। तैखन नेबन मरां कनानारे मट्ठे सिदकिय्याह लोंहेरां शिंगां बनेइतां ज़ोवं, “यहोवा एन ज़ोते, ‘इन सेइं तू अरामी मारते-मारते तैन केरो नाश केरि छ़ेडां।’” ते सेभी नबी लोकेईं एस्से उमीदी सेइं नबूवत केरतां ज़ोवं, “गिलाद प्रदेशेरे रामोत नगरे तगर हमलो केर ते तू कामयाब भो; किजोकि यहोवा परमेशर तैस राज़े तेरे हथ्थे मां केरेलो।”
ते ज़ै मैन्हु मीकायाह कुजाने जेवरो थियो तैने ज़ोवं, “शुन, सारे नेबेईं राज़े रोड़ी खबर दित्तोरीए, ते हुनी तू भी गा ते एन्च़रे ज़ोइयां।” पन मीकायाह ज़ोवं, “यहोवारी कसम ज़ैन किछ यहोवा मीं सेइं ज़ोलो, तैन्ने अवं भी ज़ोलो।” ज़ैखन मीकायाह, अहाब राज़े कां अव, तैखन राज़े तैस पुछ़ू, “हे मीकायाह! कुन अस गिलाद प्रदेशेरे रामोत नगरे सेइं जंग केरनेरे लेई हमलो केरम, या नईं?” तैनी तैस जुवाब दित्तो, “हाँ हमलो केर ते तू ज़ींत: किजोकि यहोवा तैस राज़े तेरे हथ्थे मां केरेलो।” राज़े तैस सेइं ज़ोवं, “अवं तीं केत्रे फेरेईं कसम देइतां ज़ोइ, कि तू यहोवा याद केरतां मीं सेइं सच़ ज़ो।” मीकायाह ज़ोवं, “मीं सारी इस्राएली सेना तैन भैड्डां-छ़ेल्‍ली केरि ज़ेरि पहाड़न पुड़ तितर-बितर लाही, ते यहोवा मीं सेइं ज़ोवं, ‘तैन केरो कोई पुहाल नईं; ते तैना अपने घरे जो सुखे सेइं च़ले गान।’”1 तैखन इस्राएलेरे राज़े यहोशापात राज़े सेइं ज़ोवं, “मीं तीं सेइं न थियूं ज़ोवरू, कि तै मेरे बारे मां भलेरे बारे मां नईं बल्के नुक्सानेरे बारे मां नबूवत केरेलो।” तैखन मीकायाह ज़ोवं, “एस वजाई सेइं तू यहोवारू एन वचन शुन! मीं तखते पुड़ बिशोरो यहोवा ते तैस कां आसे-पासे खड़ी सुर्गे मां सारी सेना लाहोरीए।2 तैखन यहोवा तैन स्वर्गदूतन पुछ़ू, ‘अहाबे कौन एन्च़रे भड़कालो, कि तै गिलाद प्रदेशेरे रामोत नगरे पुड़ हमलो केरे ते तै मरे?’ तैखन कोन्चे पुछ़ू, ते कोन्चे किछ न ज़ोवं। आखरी मां अक आत्मा नेड़े एइतां यहोवारे सामने खड़ी भोइ, ते ज़ोने लगी, ‘अवं तैस भड़काली।’ यहोवा तैस पुछ़ू, ‘कौस तरीके सेइं?’ तैसां जुवाब दित्तो, ‘अवं गेइतां तैसेरे सारे नेबन करां झूठी नबूत कराली।’ यहोवा ज़ोवं, ‘तू तैस भड़काने मां ज़रूर कामयाब भोल्ही, गा ते एन्च़रे केर।’ ते हुनी तू शुन यहोवा तेरे इना सारे नेबन करां झूठ ज़ुवावरूए, ते यहोवा तेरे बारे मां नुक्सानेरी गल ज़ोवरीए।”
तैखन कनानारे मट्ठे सिदकिय्याह नेबे मीकायाह कां नेड़े गेइतां तैसेरे खैखोड़ी पुड़ थप्पड़ बैइतां पुछ़ू, “यहोवारो आत्मा मीं शैरतां तीं सेइं गल्‍लां केरनेरे लेई कोरहां जेव?” मीकायाह ज़ोवं, “ज़ैखन तू छ़पनेरे लेई एक्‍की कमरे मरां होरी कमरे मां नश्शेलो, तैखन तीं पतो च़लेलो।” तैखन इस्राएलेरे राज़े ज़ोवं, “मीकायाह नगरेरे हाकिम आमोन ते योआश राजकुमारे कांजो ने; ते तैने ज़ोवं, ‘राज़ो एन ज़ोते, कि एस कैदखाने मां छ़डा, ते ज़ांतगर अवं सुखे सेइं वापस न एज्जी तांतगर एस थोड़ी-थोड़ी रोट्टी पानी देते राथ।’” ते मीकायाह ज़ोवं, “अगर तू सुखे सेइं वापस एजस, त एन समझ़ कि एन यहोवा मेरे ज़िरिये नईं ज़ोवरू।” फिरी तैनी ज़ोवं, “हे सब लोकव तुस भी शुना।” तैखन इस्राएलेरे राज़े अहाबे ते यहूदारे राज़े यहोशापाते दूइयेईं गिलाद प्रदेशेरे रामोत नगरे पुड़ हमलो कियो। ते इस्राएलेरे राज़े अहाबे यहोशापात राज़े सेइं ज़ोवं, “अवं त रूप बेदलतां जंगरे मैइदाने मां गेइलो, पन तू अपनो राज़ेरो लबास लेइतां रेखां।” तैखन इस्राएलेरो राज़ो रूप बेदलतां जंगरे मैइदाने मां जेव। अरामेरे राज़े त अपने रथां केरे 32 प्रधान्न हुक्म दित्तोरो थियो, “कि न निकड़े सेइं लेड़थ, ते न बड्डे सेइं, सिर्फ इस्राएलेरे राज़े सेइं लड़ाई लेड़थ।” ज़ैखन रथां केरे प्रधानेईं यहोशापात लाव, तैखन ज़ोवं, “पक्‍को इस्राएलेरो राज़ो तैए।” ते तैना तैस सेइं लड़ाई लड़नेरे लेई तैसेरे पासे मुड़े; तैखन यहोशापात मद्दतरे लेई चिन्डां मारने लगो। ते रथां केरे प्रधानेईं हेरू कि ऐह इस्राएली केरो राज़ो नईं, तैसेरो पीछो केरनो छ़ेडी दित्तो। तैखन केन्चे सिपेही अक तीर च़लाव, ते तै इस्राएलेरे राज़ेरी झिलमी ते कमर बन्देरे मझ़ाटे लग्गो; तैखन तैनी अपने रथ च़लानेबाले सेइं ज़ोवं, “अवं ज़खमी भोवरोईं एल्हेरेलेइ तू रथेरी लगाम मोड़तां मीं जंगरे मैइदाने करां बेइर पुज़ा।”
ते तैस दिहाड़े जंग बद्धती जेई ते अहाब राज़ो अपने रथे मां होरी केरे सहारे अरामी सेनारे सामने खड़ो राव, ते ड्लवझ़ां मेरि जेव; ते तैसेरे ज़खमेरो खून बेगतां रथ्थेरे पायदान भी भेरोई जे। दिहाड़ो डुबते सेना मां अक्‍के आवाज़ शुनोईं, “कि हर कोई अपने-अपने नगरे जो ते अपने-अपने प्रदेशे जो च़लो गाए।” ज़ैखन राज़ो मेरि जेव, तैखन तैसेरी लाश सामरिया नगरे मां पुज़ाई ते तैड़ी तै दब्बो जेव। ते यहोवारे वचनेरे मुताबिक ज़ैखन तैसेरू रथ सामरियारे एक्‍की तालाबे मां धोने लगे तैखन कुतरेईं तैसेरो खून च़ट्टो। ते वेश्यां तैड़ी निहान देती थी। अहाबेरां बाकी सारां कम्मां ज़ैना तैनी कियोरां थियां, ते हाथी दांतेरो मेहल ज़ै तैनी बनेवरो थियो, ते ज़ैना-ज़ैना नगर तैनी बसेवरे थिये, तैन सेभी केरे बारे मां इस्राएलेरे राज़ां केरि इतिहासेरी किताबी मां लिखेरूए। अहाब अपने दादे-पड़दादां केरो ज़ेरो मेरि जेव, ते तैसेरू मट्ठू अहज्याह तैसेरी जगाई पुड़ राज़ो बनू।
यहोशापातेरू राज़
इस्राएलेरे राज़े अहाबेरे राज़ केरनेरे च़ेवरोवं साले मां आसारू मट्ठू यहोशापात यहूदा प्रदेशेरो राज़ो बनो। ज़ैखन यहोशापात राज़ केरने लगो, तैखन तैसेरी उमर 35 साल थी, ते 25 साल यरूशलेम नगरे मरां राज़ कियूं। ते तैसेरी अम्मरू नवं अजूबा थियूं, तै शिल्हीएरी कुई थी। ते यहोशापातेरां सारां कम्मां हर किसमे सेइं तैसेरे बाजी आसारे ज़ेरां थियां, मतलब ज़ैन यहोवारी नज़री मां ठीक थियूं, तै तैन्ने केरतो राव, ते तैस करां न मुड़ो। पन फिरी भी मूरती पुज़ारी उच्‍ची ठारां न बिछ़ोड़ी, इस्राएली लोक तैस वक्त भी मूरती पूज़ारे उच्‍ची ठारन पुड़ बलि च़ाढ़ते थिये ते धूप बालते थिये। यहोशापाते इस्राएलेरे राज़े सेइं मेल मिलापेरो करार कियो। यहोशापातेरां कम्मां ते ज़ै बहादरी तैनी हिराई, ते तैनी ज़ै-ज़ै लड़ाई लड़ी तैना सब यहूदारे राज़ां केरि इतिहासेरी किताबी मां लिखोरिन। पुरुषगामी लोकन मां ज़ैना तैसेरे बाजी आसारे राज़ केरनेरे वक्ते राहोरे थिये, तैना तैनी प्रदेश मरां कढे।
तैस मौके एदोम प्रदेशे मां कोई राज़ो न थियो, तैड़ी अक हाकिम राज़ केरतो थियो ज़ै राज़े ठहरावरो थियो। फिरी यहोशापाते तर्शीशेरे समुन्दरी ज़िहाज़ां सोन्नू आन्नेरे लेई ओपीर नगरे गांनेरे लेई बनावां, पन तैना एस्योनगेबेरे मां ट्लुटी जेआं, एल्हेरेलेइ तैड़ी न गेइ सकां। तैखन अहाबेरे मट्ठे अहज्याहे यहोशापाते सेइं ज़ोवं, “अपने सिपेहिन सेइं साथी मेरे सिपेहिन भी समुन्दरी सफरे मां गाने दे,” पन यहोशापाते इन्कार कियो। यहोशापात राज़ो अपने दादे-पड़दादां केरो ज़ेरो मेरि जेव, ते दाऊदपुरे मां तै दब्बो जेव। ते तैसेरू मट्ठू यहोराम तैसेरी जगाई पुड़ राज़ो बनू।
अहज्याहेरू राज़
यहूदारे राज़ो यहोशापातेरे राज़ केरनेरे सतारोवं साले मां अहाबेरू मट्ठू अहज्याह सामरिया नगरे मां इस्राएले पुड़ राज़ केरने लगू ते तैनी दूई साल इस्राएले पुड़ राज़ कियूं। ते तैनी तैन्ने कियूं, ज़ैन यहोवारी नज़री मां बुरू थियूं, ते तैसेरी चाल तैसेरे अम्मा बाजी, ते नबातेरे मट्ठे यारोबामेरी ज़ेरि थी ज़ैनी इस्राएले करां पाप करेवरो थियो। ते ज़ेन्च़रे अहज्याहेरो बाजी बाल देबतां केरि पूज़ा केरतां ते मथ्थो टेकतां इस्राएलेरे परमेशर यहोवा सरकातो राव, तेन्च़रे अहज्याह भी केरतो राव।
Source notes (2)
- Footnote मत. 9:36; मर. 6:34.
- Cross-reference प्रका. 4:2;4:9-10;5:1;7:13;6:16;7:10;7:15;19:4-5.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.