Bhadrawahi Bible
1 इतिहास 4
यहूदारी वंशावली
यहूदारे खानदाने मरां इनां थिये: पेरेस1, हेस्रोन, कर्मी, हूर ते शोबाल। ते शोबालेरू रायाह थियूं, रायाहेरू मट्ठू यहत थियूं ते यहतेरां मट्ठां अहूमै ते लहद थियां, एना सोराई कुल आन। एतामेरां मट्ठां इनां थियां: यिज्रेल, यिश्मा, ते यिद्वाश, ज़ैन केरि बेइनरू नवं हस्सलेलपोनी थियूं। ते पनूएले गदोर नगरे बसाव, ते एजेरे हूशाह नगर बसाव। इनां एप्रातारे बड्डे मट्ठेरी हूरेरी औलाद थी, एप्राता बैतलहम नगर बसावरू थियूं। ते तकोआ नगरेरे बसाने बाले अशहूरेरी हेला ते नारा, नंव्वेरी दूई कौन्शां थी। नारारां मट्ठां इनां थियां: अहुज्जाम, हेपेर, तेमनी ते हाहशतारी। ते हेलारां मट्ठां इनां थियां: सेरेत, यिसहर ते एत्नान। कोसेरां मट्ठां आनूब ते सोबेबा थियां ते तैसेरे खानदाने मरां हारूमेरू मट्ठू अहर्हेलेरू कुल भी थियूं। ते याबेस अपने ढ्लान करां जादे इज़्ज़त मैल्ही, ते तैसेरी अम्मा एन ज़ोइतां तैसेरू नवं याबेस रख्खू, “कि मीं एस बड़े तकलीफी सेइं ज़र्म दित्तोरूए।” एक्सां याबेसे इस्राएलेरे परमेशरे कां एन ज़ोइतां प्राथना की, “रोड़ू भोथू, कि तू मीं सच़्च़े बरकत देथो, ते मेरी हद बद्धातो, ते तेरो हथ मीं पुड़ राथो, ते तू मीं बुरैई करां एन्च़रे बच़ेइतां रखेथो कि अवं तैस करां दुखी न भोथो!” ते ज़ैन किछ तैनी मग्गु, तैन परमेशरे तैस दित्तू। फिरी शूहारे ढ्ला कलूबे सेइं महीर पैदा भोव ज़ै एशतोनेरो बाजी थियो। एशतोनेरे मट्ठां बेतरापा, पासेह ते तहिन्ना थियां। तहिन्ना ईर्नाहाश नगर बसाव, पन तैन केरे घरानेरे लोक रेका नगरे मां रहते थिये। कनजेरां मट्ठां इनां थियां: ओत्नीएल ते सरायाह, ते ओत्नीएलेरां मट्ठां हतत ते मोनोतै थियां। मोनोतैरू मट्ठू ओप्रा थियूं। ते सरायाहेरू मट्ठू योआब थियूं ज़ैनी गेहराशीम वादी बसाई; किजोकि तैट्ठेरे लोक कारीगिर थिये। ते यपुन्नेरे मट्ठे कालेबेरां मट्ठां इनां थियां: ईरू, एला ते नाम। ते एलारू मट्ठू कनज थियूं। यहलेलेरां मट्ठां जीप, जीपा, तीरया ते असरेल थियां। ते एज्रारां मट्ठां: येतेर, मेरेद, एपेर ते यालोन, ते मेरेदेरी कौन्श बित्या ज़ै मिस्रेरे राज़ेरे कुई थी तैसेरां मट्ठां इनां थियां, मिर्याम, शम्मै ते यिशबह। यिशबहे एश्तमो नगर बसाव। मेरेदेरी एक्की होरी यहूदी कौन्शां येरेद, हेबेर ते यकूतीएले ज़र्म दित्तू। येरेदे गदोर नगर बसाव, हेबेरे सोको नगर बसाव, यकूतीएले जानोह नगर बसाव। ते होदिय्याहरी कौन्श ज़ै नहमेरी बेइन थी, तैसेरां दूई मट्ठां थियां, तैन सेइं गेरेमी ते माकाई कुल च़ले। गेरेमी कीला नगरे मां रहते थिये ते माकाई एश्तमो नगरे मां रहते थिये। ते शिमोनेरां मट्ठां अम्नोन, रिन्ना, बेन्हानान ते तोलोन थियां। ते यिशीएरां मट्ठां जोहेत ते बेनजोहेत थियां। यहूदारां मट्ठे शेलारां मट्ठां इनां थियां: एर, ज़ैनी लेका नगर बसाव, लादा, ज़ैनी मारेशा नगर बसाव, ते इसेरे अलावा तैसेरे खानदानेरे लोक बेत-अशब नगरे मां रहते थिये, ज़ैना सनेरां लिगड़ां बुन्नेरू कम केरते थिये। ते योकीम ते कोजेबा नगरेरे लोक ते योआश ते साराप ज़ैना मोआबे मां हुकूमत केरते थिये ते तैना याशूब-लेहेम नगरे मां राने लगे। ई पुरानो इतिहासे। इन मरां किछ लोक कुम्हार थिये, ते नताईम ते गदेरा नगरन मां रहते थिये ज़ैड़ी तैना राज़े कां रहते थिये ते तैसेरू कम काज़ केरते थिये।
शिमोनेरू खानदान
शिमोनेरां मट्ठां नमूएल, यामीन, यारीब, जेरह ते शाऊल थियां। शाऊलेरू मट्ठू शल्लूम, शल्लूमेरू मट्ठू मिबसाम ते मिबसामेरू मट्ठू मिश्मा थियूं। ते मिश्मारू मट्ठू हम्मूएल, तैसेरू मट्ठू जक्कूर, ते तैसेरू मट्ठू शिमी थियूं। शिमीएरां 16 मट्ठां ते 6 कुइयां भोइ, पन तैसेरे ढ्लां केरे जादे बच्चे न भोए। ते तैन केरू सारू कुल यहूदी केरू ज़ेरू न बधु। तैना इन नगरन मां रहते थिये: बेर्शेबा, मोलादा, हसर्शूआल, बिल्हा, एसेम, तोलाद, बतूएल, होर्मा, सिकलग, बेत्मर्काबोत, हसर्सूसीम, बेतबिरी ते शारैम। दाऊदेरे राज़ो बन्नेरे वक्ते तगर तैना इन नगरन मां राने लगे। ते तैन नगरां केरां ड्लाव्वां एताम, ऐन, रिम्मोन, तोकेन ते आशान नंव्वेरां पंच़ नगरां। ते बाल नगरे तगर ज़ेत्रां ड्लाव्वां, इन्ना नगरां केरे आसे-पासे थियां, तैन केरि बस्सनेरी ठारां इन्ना थी, ते ई तैन केरि खानदानी आहे।
फिरी मशोबाब, यम्लेक, अमस्याहेरू मट्ठू योशा। योएल, योशिब्याहरू मट्ठू येहू, ज़ैन सरायाहेरू पोट्लड़ू, ते असीएलेरू पड़पोट्लड़ू थियूं, ते एल्योएनै, याकोबा, यशोहायाह, असायाह, अदीएल, यसीमीएल, बनायाह, ते शिपी एरू मट्ठू जीजा ज़ैन अल्लोनेरू मट्ठू, इन यदायाहेरू मट्ठू, इन शिम्री एरू मट्ठू, इन शमायाहेरू मट्ठू थियूं। इना ज़ैन केरां नंव्वां लिखोरन, अपने-अपने कुले मां प्रधान थिये; ते तैन केरे पूर्वजां केरे घराने बड़े बेधी जे। एना लोक अपने गब्बां केरे लेई च़ारनेरी ठार तोपनेरे लेई गदोर नगरेरे पूर्वेरे पासे तगर जे। ते तैन रोड़े करां रोड़ी च़ारनेरी ठार मैल्ही, ते मुल्ख लम्मो-चौड़ो, ते आरामेरी जगाह थी। किजोकि तैड़ी पेइले रानेबाले हामेरे खानदानेरे लोक थिये। ते ज़ैन केरां नंव्वां बह लिखोरन, तैनेईं यहूदारे राज़े हिजकिय्याहेरे राज़ केरनेरे वक्ते मां एइतां ज़ैना मूनी कौमरे लोक तैड़ी मैल्हे, तैना डेरन सने मैरतां एरहो सत्यानाश केरतां छ़डू कि अज़ तगर तैन केरो पतो नईं, ते तैना तैन केरे ठारी मां राने लगे, किजोकि तैड़ी तैन केरे गब्बां केरे लेई च़ारनेरी ठार थी। शिमोनी लोकन मरां 500 मड़द एप्पु पुड़, पलत्याह, नार्याह, रपायाह ते उज्जीएल नंव्वेरे यिशीएरां मट्ठां अपने लेई प्रधान बनाए। तैखन तैना पहाड़े पुड़ जो जे, ते ज़ैना अमालेकी बेंच़तां रेई जेवरे थिये तैना मारे, ते तैना अज़्ज़ेरे दिहाड़न तगर तैड़ी रहतन।
Source notes (1)
- Footnote पेरेस सिर्फ पेरेस यहूदारू मट्ठू थियूं, बाकी यहूदारे खानदाने मरां थिये।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.