2 Vakolindo 10

Paulo akuyitasa Kasi lyake

1Nene Paulo, ndiwoneka kuva mfokomasi pendikali na nyenye, ila mng'ali pendivecha kutali na nyenye ngita vanu vangi pevilonga, ndikuvasuka kwa lusungu na usanzi vake Kilisito. 2Ndikuvasuka msindigite kuvecha mng'ali chipindi pendikwacha, kwakuva ndiwesa kulonga undakyene kuva ndiwesa kuva mng'ali kwa vala vonda vevakutuchela kuva tukwikala muinyi hela. 3Ata ngita tukwikala muinyi, ila setukwitova fita ngita vanu va muinyi iyi pevikwitova fita. 4Kyalukilo fyetutumila mufita fyetu sekyalukilo fya muinyi iyi, ila ndi ludali cha Nguluvi chene kuhananga lugombo chonda cha vachindwama. Tunahananga makani gyonda gya udesi, 5tukwibata kwa ludali mahocho na kila kinu kyekikang'isa, kila kinu kyekivikilwe kukanicha Njowo nofu cha Nguluvi na kuchigita luhala chonda chimudikile Kilisito. 6Pemukali muidikiye hilo, suwe nefwe twiandalise kutova kila munu yeseidikila. 7Nyenye mwilola makani aga kwa kwivala hela. Wuli, koyuli munu yoyonda akwichela kuva mwene ndi munu va Kilisito? Suwe, ahoche kuva nefwe kangi ndi va Kilisito ngita mwene peakali munu va Kilisito. 8Sendilola nyoni kwidumba kwa umwimike veandigavile Mtwa kwakuva umwimike uvo nde kwaajili lya kuvatanga nyenye na sekwakuvahananga ila kuvachenga muidikilo. 9Ndilema muwoche kuva ndikela kuvawogofya kwa baluwa chanene. 10Munu iwesa kulonga, “Baluwa cha Paulo ndi ng'ali na chigehe na malichwi mang'ali, ila mwene peagehe na nefwe ndi munu msosovafu na peilonga malichwi gyake sekinu!” 11Munu ngita uyo na ahoche ndena, kuva ngita peisimbilwe mubaluwa. Chipindi tugehe kutali na gala getukugagita chipindi dapetukali pamwi. 12Setwikela kwivika awu kwiwananisa na vala vanu vevakwinjuma vavene. Vanu avo vakwigele vavene na kwiwananisa vavene kwa vavene, vene ndi vapufi. 13Ila nefwe dasetukwidumba hilo, kwidumba kwa nefwe daivecha mukasi yeatugavile Nguluvi, kasi yeifikile mbaka kwa nyenye. 14Nefwe setukachumbaniche kwinjuma kwa nefwe. Nefwe nde tulonguwe kuvaletela Njowo Nofu lya Kilisito. 15Suwe, setukwidumba kwa kasi yevagitile vanu vangi saidi lya kigelo cheatuvikile Nguluvi, ila tuhuvilila kuva kudikila kwa nyenye dakuhongeleka tuwese kugita kasi ngomi mugati lyenu, kufwatila peikela Nguluvi. 16Baho, tuwisa kudalika Njowo Nofu muinyi chingi chechigehe kutali na nyenye. Kwakuva setung'ang'a kwidumbila kasi yeigitilwe na munu yungi na pono pangi. 17Ila ngita peisimbilwe mumasimbo gya Nguluvi, “Mwene kwidumba na ayidumbile kasi lya Mtwa.” 18Kwakuva yeidikilwa seyula yekwijuma yumwene, ila ndi yula yeinjumwa na Mtwa.