Bɛkwyel Bible
Etɛp e syela Sisim natel Zaŋ ɛ 19
Mɛdjeeb mɛ mɛsoob pɛ tɔ gwoo
Bhii tak, mɛ eezɛgwak dhiiti gwood elii pɛ tɔ gwoo tyee bhyeed ɛdhuu ɛ bot, gwood tak nadi eke ɛ: «Aleluya! Duwalka Ghɛŋ, tsik, duma nɛ mɛbwala ɛ́ nɛ Zɛɛb'enaka. Epɛ́ɛ bɛ ɛ́ tsɛɛtsɛ, tɔ epiki! Etɛɛ náá, nyɛ eekwyesal moma na ghaa-mɛzɔ djɛ sɔs, moma nadi epul bɔs nɛ mɛzɔ mɛ ɔ. Nyɛ nawa nyɛ é feŋ ɛ́, étɛp nyɛ naagó bot ɛ mɛsa mɛ.» Bɛ naabaazɛke-kea sis náá: «Aleluya! Duwalka Ghɛŋ! Eguluk boo ghaada nadi edyak ɛ, ye ɛpebyet kɔm-kɔm!» Tin, bɛpaa mɛkam-mɛmbá nɛ ená (24) zɛnɔɔ edjema ená di nɛ tsik ɔ, naazɛghaaga bhwoob si, da kwyit mɛboŋ étɛp ɛduwal Zɛɛb, mot di kɔ bóó mɛkoozi ɔ, bɛ eezɛke: «Amɛn! Aleluya! Duwalka Ghɛŋ!»
Edee e ɛbyoŋ ɛba ɛ Mɔn bhata
Wɔ gwaa, dhiiti gwood di edus pɛ bóó mɛkoozi di ɛ, zɛgék: «Duwalka Zɛɛb'enaka, biyɔ bot ɛ mɛsa mɛ djas, biyɔ bot ɛ di elooba nɛ nɛ ɔ, bot ɛ mbyok nɛ bot ɛ di ààdi bot ɛ mbyok ɔ». Bhii tak, mɛ eezɛgwak dhiiti gwood ebam tyee bhyeed bot ɛbuɛpe, bhyeed tak nadi eswak ɛ́ dáa eboo mɛsok, dáa eboo bɛghɛl ɛko. Ye nadi eke ɛ: «Aleluya! Duwalka Ghɛŋ! Etɛɛ náá, Ghɛŋ, Zɛɛb Mɛkaake yenaka eezekoobal ɛyoŋ ɛ lɛ! Djhoomyaalaka, djhoodika nɛ mɛmyaala, djhooduwalka nyɛ! Etɛɛ náá, ɛwala ɛ ɛbyoŋ ɛba ɛ Mɔn bhata eezedjala. Deenek, myɛl moo ɛ́ nyɛ eezekomsa. Bɛ eedjɛ nyɛ mbɛɛ kaad lɛn na kas-kas ààpuuza nɛ dhiiti sonok.» Kaad lɛn tak lyaal ɛ́ mɛsa mɛ epiki e bot ɛ zedum koŋ nɛ Zɛɛb ɔ.
Fofop eezɛke nɛ nam: «Kwyala: Mɛmyaala nɛ bot ɛ nadjóoaa étɛp ɛbela di tɔ ɛbyoŋ ɛba ɛ Mɔn bhata ɔ.» Bhii tak, nyɛ eebaazɛke nɛ nam náá: «Yɛ ɛ́ tin ɛ etɛtɛ Mɛkpa ɛ Zɛɛb.»
Mɛ naazɛghaaga sok bhwoob'ɛ, kwyit mɛboŋ si étɛp ɛduwal nyɛ, tin, nyɛ eezɛke nɛ nam: «Nàsa deenek! Mɛ ɛ́ mot-mɛsa dáa wɔy, nɛ bɔn-nyoog di ekɛ tɔ esosoob nɛ etsɛɛtsɛ ee Yezu natel ɛ. Yɛ ɛ́ Zɛɛb ɛ wɔ di egoka nɛ ɛduwal.»
Yɛ ɛ́ Sisim di edjɛ mbɛɛ esiiza etɛp ee bɛngoolel ɛ Mɛkpa ɛ Zɛɛb di egoola kɔ ɛsu ɛ lɛ ɛ́.
Mot di ebe yaaga na puu ɔ
Bhii tak, mɛ eezɛbee gwoo mbek, wɔ gwaa, yaaga na puu zɛtuula. Tin, mot nadi kɔ yaaga tak ɔ, din ɛ lɛ nabɛ ɛ́ Sosoob nɛ Tsɛɛtsɛ, nyɛ nɛ pɛ́ɛ bot, nyɛ lumla dɛɛb ɛ́ tɔ epiki. Mis mɛ nadi ekas ɛ́ dáa ngel du, nyɛ nadi ɛ́ nɛ bɛtɛ nɛ ekɔtɔ e bɛghɛŋ kɔ lo. É nyel'ɛ, nyɛ nadi ɛ́ nɛ kwyala din dinaa bot ààgu ɛsuk ɛ tak, yɛ di ààdi nyɛy ɛmet ɔ. Ye nabɛ ɛ́, nyɛ naabɔt ndjookuwa nyɔlɔlɔ nɛ ghiya é tak. Din ɛ lɛ ɛ́: «Mɛkpa ɛ Zɛɛb.» Mɛdhuu mɛ esodja djas di pɛ tɔ gwoo ɔ, nadi edu nyɛ pɛ bhis, bɔɔ djas kɔ eyaaga e na puu, bɛ nabɛ ɛ́, bɛ eebɔt embɛɛ ekaad e na puu, ààbɛ nɛ edhuud. Pɛl na zɔɔ-zɔɔ nadi ewyis tɔ nuub'ɛ, étɛp ɛgó bot ɛ mɛdhik. Nyɛ waadjɛɛd bot ɛ mɛdhik nɛ mɔɔ sek ghwooz. Nyɛ waatwaal ebhum e di edjóoaa lezɛ ɛ tɔ mɔɔ syaala mɛnyok mɛ vin mɛ ɛbuk ɛ Zɛɛb Mɛkaake. Tin, kɔ ndjookuwa yɛ, nɛ kɔ do yɛ, ye nabɛ ɛ́ nɛ kwyala din: «Mɛkoozi mɛ bɛmɛkoozi, Ghɛŋ bɛghɛŋ.»
Bhii tak, mɛ eezɛbee fofop ngɔt tetel pɛ tɔ gwyes. Nyɛ naazɛtsim ɛlyelɛpe nɛ enen djas nadi edhaa ɛtsetaɛpe pɛ tɔ gwoo ɔ náá: «Dhaka, sɛɛgaka étɛp boo ɛbyoŋ ɛ Zɛɛb! Dhadɛka epuud e bɛmɛkoozi, nɛ yii eboo ekukuma e esodja, nɛ yii bɛghɛŋ, nɛ epuud e eyaaga nɛ yii bot ɛ di edjɛɛd yɛ ɔ, epuud e bot djas, bot ɛ di ekwom ɔ nɛghu bot ɛ di ààdi ekwom ɔ, bot ɛ di nɛ mbyok nɛghu bot ɛ di ààbɛ nɛ mbyok ɔ.»
Bhii tak, mɛ eezɛbee tit, bɛmɛkoozi mɛ bɔs'ak nɛ mɛdhuu mɛ esodja, sɛɛga étɛp ɛlumla dɛɛb nɛ mot nadi kɔ yaaga, nɛ ɛdhuu ɛ esodja bɛ ɔ. Tin, tit naazɛmɛtaa, dɔɔ nɛ ngoolel-Mɛkpa ɛ Zɛɛb yii mɛkɔŋ nadi esa mɛsimba é mis mɛ, étɛp ɛsa náá, bot ɛ nadi, bɛ eezewaaa geka tit ɔ, bot ɛ nadi eduwal ekpaka e naghisɛ yɛ ɔ, wo ze. Bot ɛ nabwak ɔ naagóaa nɛ pɛl nadi ewyis tɔ nuub mot nadi kɔ yaaga yenɔk ɔ. É di'enek, enen djas naazɛdɛ epuud e bɔɔ.
Bɛkwyel Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.